مه‌حمود ئه‌حمه‌دی نه‌ژاد سه‌رۆك كۆمارێ به‌رێ یێ ئیرانێ راگه‌هاند كو ئیران د قه‌یرانه‌كا گه‌له‌ك مه‌زن دایه، ئه‌ڤرۆكه هه‌ژاری ل ئیرانێ گه‌له‌ك به‌لاڤ بوویه، پتر ژ نیڤا جڤاكێ ئیرانێ د ره‌وشه‌كا گه‌له‌ك خراب دانه و نه‌شێن پێدڤیاتێن سه‌ره‌كی یێن ژیانێ بۆ خوه دابین بكه‌ن و گۆت: (به‌رپرسێن ئیرانێ بووینه ئه‌گه‌رێ هندێ كو ئه‌ڤرۆكه جڤاك د ره‌وشه‌كا وه‌سا خراب دا بیت، چونكو رێبه‌رێ ئیرانێ و كه‌سێن نێزیكی وی خوه گه‌له‌ك مه‌زنتر ژ خه‌لكی دبینن و وه‌سا دده‌نه دیار كرن كو چو كه‌سه‌كێ مافێ هندێ نینه شاشیێن وان دیار بكه‌ت، ئانكۆ ئه‌و دبێژن ئه‌م مرۆڤێن ته‌مامین و مه چو شاشی نینن، ژ به‌ر هندێ ژی ئه‌ز دبێژم كو به‌رپرسێن نها یێن ئیران بووینه ئه‌گه‌رێ روودانا كاره‌ساتێن گه‌له‌ك مه‌زن و خه‌لك ژی نه‌چاره ب هه‌موو ره‌نگه‌كێ داخوازا مافێن خوه بكه‌ت).
ئه‌ڤ داخۆیانیا ئه‌حمه‌دی نه‌ژادی پشتی هندێ هات كو ل باژێرێ ئیسفه‌هانێ ب هزاران وه‌لاتی ژ به‌ر قه‌یرانا ئاڤێ و گرانبوونا بهایێن كه‌لوپه‌لێن خوارنێ ده‌ست ب خوه‌نیشادانان كرن و دیار كرن كو ئێدی دڤێت ل ئیرانێ ده‌ست ب گوهۆرینێن بنگه‌هین بهێته كرن.
چاڤدێرێن سیاسی یێن ئیرانێ ژی دیار دكه‌ن كو خوه‌نیشادانێن ل ئیسفه‌هانێ دشێن ببنه ئه‌گه‌رێ ده‌ستپێكرنا قۆناغه‌كا نوو ل ئیرانێ، چونكو رێژا هه‌ژاریێ ل ئیرانێ گه‌له‌ك زێده بوویه، خه‌لك بێكارن و رۆژ ب رۆژێ ژی نان و هه‌موو پێدڤیاتێن دی یێن ژیانێ گران دبن، ژ به‌ر هندێ ژی ره‌نگه ل هه‌موو باژێرێن ئیرانێ خوه‌نیشادان ل دژی ده‌ستهه‌لاتێ ده‌ستپێ بكه‌ن.
Comments are closed, but trackbacks and pingbacks are open.