سۆپایێ پاسداران ئۆپەراسیۆنێن خوە ل هەرێما كوردستانێ راگرتن

سۆپایێ پاسدارێن ئیرانێ هێرشێن خوە بۆ سەر بارەگایێن حزبێن رۆژهەلاتا كوردستانێ ل ناڤا ئاخا هەرێمێ راگرتن.

ئەڤرۆ میدیایێن نێزیك ژ سۆپایێ پاسداران ژ زارێ ژێدەرەكی بەلاڤكرییە، ژ سپێدەهییا ئەڤرۆ هێرشێن سۆپایێ پاسداران بۆ سەر حزبێن رۆژهەلاتا كوردستانێ ل ناڤا باشوورێ كوردستانێ هاتنە راگرتن.

وی ژێدەری ئاشكەرا ژی كرییە، ئەگەر هەرێما كوردستانێ رێكێ ل چالاكییێن حزبێن دژی ئیرانێ بگریت، ئاگربەست دێ یا بەردەوام بیت و ئەگەر نە جارەكا دی سۆپایێ پاسداران دێ ئۆپەراسیۆنان ل دژی وان گرۆپان دەستپێكەت.

رۆژا 24/9/2022ێ پاسدارێن ئیرانێ دەستپێكرنا ئۆپەراسیۆنێن دژی حزبێن رۆژهەلاتا كوردستانێ راگەهاند و داخواز ژ خەلكێ كوردستانێ كر ژ بارەگایێن وان حزبان دویركەڤن.

پشتی چار رۆژان ژ راگەهاندنا ئۆپەراسیۆنێ، سۆپایێ پاسداران دەمژمێر 10:34 خولەكی سپێدێ یا رۆژا چارشەمبی 28/9/2022ێ ب 73 مووشەكان و دەهان درۆنان هێرش كرە سەر قەلا دیمۆكرات و بارەگایێن حزبێن رۆژهەلاتا كوردستانێ و د ئەنجامدا 17 كەسان ژیانا خوە ژ دەست دا و زێدەتری 50 كەسان برینداربوون و نێزیكی چار هزار و پێنج سەد پەنابەرێن رۆژهەلاتا كوردستانێ مال و حالێن خوە بجهـ هێلان و حەفت گۆندێن دەڤەرا برادۆست ژی هاتنە چۆلكرن.