سەرۆكێ هەرێما كوردستانێ ل هەولێرێ لگەل بالیۆزێ ئەلمانیا ل عیراقێ كۆمبوو و پێشهاتێن سیاسی یێن دەڤەرێ گۆتوبێژكرن.
سپێدەهییا ئەڤرۆ نێچیرڤان بارزانی، سەرۆكێ هەرێما كوردستانێ دگەل مارتن یێگەر، بالیۆزێ ئەلمانیا ل عیراقێ و شاندێ دگەلدا كۆمبوو و دۆماهی پێشهاتێن سیاسی و دەربازبوونا سالەكێ ب سەر هەلبژارتنێن گشتی یێن عیراقێ و بزاڤ بۆ راستەرێكرنا پرۆسا سیاسی و پێكئینانا حكومەتا نوی یا فیدرالی ل عیراقێ گۆتوبێژكرن.
سەرۆكێ هەرێمێ بۆ پشتەڤانی و هاریكارییا عیراقێ و هەرێما كوردستانێ د شەرێ دژی تیرۆرێ دا و درێژكرنا ئەركێ هێزێن ئەلمانیا ل عیراقێ و هەرێما كوردستانێ، سۆپاسییا ئەلمانیا كر و پیرۆزباهییا دەستبكاربوونا بەرێز كلاوس شترایس، كۆنسولێ گشتی یێ نوی یێ ئەلمانیا ل هەرێما كوردستانێ كر و هیڤییا سەركەفتنێ بۆ خواست.
د كۆمبوونێ دا هەردوولا دۆپاتی ل پێشڤەبرنا پەیوەندییێن هەرێمێ و ئەلمانیا و گرنگییا پشتەڤانییا ناڤدەولەتی یا وەلاتێن دۆست یێن عیراقێ و هەرێما كوردستانێ كر و رەوشا ناڤخۆ یا هەرێما كوردستانێ و پێنگاڤێن داهاتی گۆتوبێژكرن.
پەیوەندییێن هەرێمێ و بەغدا، پەیوەندییێن عیراقێ و هەرێمێ لگەل وەلاتێن جیران و داوی پێشهاتێن دەڤەرێ ب گشتی و چەند پرسەكێن دی، تەوەرێن سەرەكی یێن كۆمبوونێ بوون.
Comments are closed, but trackbacks and pingbacks are open.