سەرۆکێ پەرلەمانێ عێراقێ نامەیەکا توند ئاراستەی ئەمیندارێ گشتیێ پرۆژەیێ عەرەبی ل عێراقێ کر

سەرۆکێ پەرلەمانێ عێراقێ نامەیەکا توند ئاراستەی ئەمیندارێ گشتیێ پرۆژەیێ عەرەبی ل عێراقێ کر و تێدا دبێژیت، “دێ تە زڤرینم بۆ قەبارێ تە یێ دروست”.

محەمەد حەلبوسی سەرۆکێ پەرلەمانێ عێراقێ، کو سەرکردەیەکێ دیارێ سونەیانە نامەیەکا توند ئاراستەی خەمیس خەنجەر ئەمیندارێ گشتیێ پرۆژەیێ عەرەبی ل عێراقێ و سەرکردێ دیارێ سیاسی یێ سونەیێن عێراقێ کر.

ل گورەی وان نامەیێن بەلاڤبووین حەلبوسی ئاماژە ب وێیەکێ کریە، “چەندین جاران من بزاڤ کرینە تە ب ڕاست بزانم و پلانێن دژی دوستێن مە یێن سونە گرنگ وەنەگرم، ب هیڤیا وێیەکێ خۆ رێک بئێخی، لێ من بڕیاردایە و یێ ژێ دوو دل نینم کو رێ ل پلانێت تە بگرم و نەهێلم هەر تشتێ مە هەی ئەرزان ب فرۆشی”.

ئەڤە ژی ددەمەکیدایە، دڤان چەند حەفتیێن داویێ دا و ل دەمێ نێزیکبوونا هەلبژارتنێن بەروەختێن عێراقێ، ئالوزیێن دناڤبەرا پارت و سەرکردێن سونی سەرهلداینە و بتایبەتی دناڤبەرا کەسێن ئێکێ یێن وان پارت و ئالیان.

بەریا چەند حەفتیان، خەمیس خەنجەر سوز ب ئاوارەیێن “جەرف سەخر” ل باشورێ بەغدا دابوو کو دێ ڤەگەرینیتە سەر ئەردێ وان، لێ چالاکڤانێن مەدەنی دبێژن کو چ پێنگاڤەکا بڤی رەنگی نە هاتیە هاڤێتن، رەنگە ئەڤە سەدەمێ تۆڕەبوونا سەرۆکێ پەرلەمانی بیت ژ وی سەرکردێ سیاسی.