‎سەرۆک بارزانی و كلیلی چارەسەر

فرسەت سەید شکور

سەرەتا

‎هەر کاتێک کێشە سیاسییەکانی عێراق ئاڵۆز بووبێت، سەرۆک بارزانی بووەتە فریادڕەس و هۆی گۆڕینی کەشی نائاسایی عێراق بۆ ئارامی و تەناهی.

هەر دەمێک، لایەنە سیاسییەکانی عێراق نەیانتوانبێت، لەسەر پرسە هەستیارەکان بگەنە ڕێککەوتن هەتا لەگەڵ هەرێمی کوردستانیش، سەرۆک بارزانی، توانیوویەتی ببێتە کلیلی چارەسەری گرفتەکان لە عێراق.
‎پرسی بودجە، پێکهێنانی حکوومەتی خۆجێی کەرکووک، دۆسیەی شنگال و هەڵبژاردنی سەرۆکی پەرلەمانی عێراق تەوەری گرنگی کۆبوونەوەکان دەبن.
‎سەردانەکەی سەرۆک بارزانی، بۆ چارەسەرکردنی چەند پرسێکی نێوان شیعە و سووننەکانە کە هەمیشە لە بارودۆخە هاوشێوەکاندا سەرۆک بارزانی نێوەندگیریی کردوون.

‎ تێگەیشتن و ئەزموونی سەرۆک بارزانی بە تایبەت لە ڕۆڵگێڕانی ئاشتییانە و خستنەڕووی ئەڵتەرناتیڤی دیکە بۆ چارەسەری کێشە چەقبەستووەکانی نێوان لایەنە سیاسییەکان، دەرخەری ئەوەیە کە سەرۆک بارزانی چ لە ناوخۆی عێراق، چ لە دونیای دەرەوە، خاوەن بڕیار و ئاراستەکاری داھاتووی عێراقە، ئەوەمان لە یاد نەچێت کە بە دانپێدانانی عەرەبی سوننە خۆیان، ھەر سەرۆک بارزانی بووە هۆی نێوەندگیریان.

سەرۆک بارزانی، دوای شەش ساڵ سەردانی بەغدای کردەوە، ئەمەش دوای داخوازیی و بانگهێشتی هەموو سەرکردە باڵاکانی عێراق دەهات، بەشێوەیەک بەردەوام جەختیان دەکردەوە، کە هاتنی سەرۆک بارزانی بۆ بەغدا، کلیلی چارەسەر و پاکی ئەو نیەتەی هەرێمی کوردستانە کە بەردەوام بەرامبەر حکوومەتی عێراق و عێراقییەکان هەیانبووە.

پێشوازی گەرم و باڵا

لەسەر ئاستی دامەزراوە حکوومییەکان، سەرۆکوەزیران، ئەنجوومەنی نوێنەران، چوارچێوەی هەماهەنگی، دامەزراوەیی دادوەریی، سەرکردە سەربازییەکان، کەسایەتیی سیاسی و ڕۆشنبیران و شەقامی عێراقی و کونسوڵ و باڵێوز و نوێنەرانی نێودەوڵەتی لە عێراق، سەردانەکەی سەرۆک بارزانی بە پێشهاتێکی مێژوویی زێدە مەزن لە قەڵەم دراوە، چونکە ئەوان دەزانن کە سەرۆک بارزانی، نەک لە ناوخۆی عێراق بەڵکو لەسەر ئاستی ڕۆژهەڵاتی ناوەڕاست و جیهان، پێگە و کاریگەرییەکی یەکجار بەهێزی هەیە، چەندین پرسی گەورەی جیهانیی هەیە، کە لەسەر پرس و بیر و ڕای سەرۆک بارزانی یەکلایی دەکرێتەوە.

‎محەممەد شیاع سوودانی، سەرۆکوەزیرانی عێراق لەبارەی سەردانەکەی سەرۆک بارزانی دەڵێت:
‎”شەرەفمەندبووم بەم سەردانەی برای بەڕێز کاک مەسعود بارزانی، ئەم سەردانەی بۆ بەغدا گرنگە بە مەبەستی دیدار و گفتوگۆکان، چونکە سەرکردەیەکی نیشتمانپەروەرە و ڕۆڵێکی کارا و کاریگەری هەبووە لە پرۆسەی سیاسیدا”

فەلاح مشعەل نوسەر و رۆژنامەنووسی ناوداری عێراق دەڵێت :
زیاد لە 250 هێزی سیاسی لە عێراقدا هەن، هیچ کات روینەداوە سەرکردەیەک بەم گەرم و گوڕی و شکۆیەوە، شاهانە پێشوازی لێبکرێ ، وانەیەکە لە واتای زەعامەتی سیاسی کە هیچ کات لە پرەنسیپە سیاسیە نەگۆڕەکانی خۆی لاینەداوە.

سەرۆک بارزانی ڕێنوێنیکارێکی ژیر

‎پێش گەیشتنی عێراق بە هەر دۆخێکی ناهەمواری سیاسی، ھەمیشە سەرۆك بارزانی ڕێنوێنیی خۆی بۆ ڕێککردنەوەی پەیوەندییەکان و ھێنانەدیی کەشێکی سیاسیی لەبار لە عێراق خستووەتە ڕوو، ئێستا ئەمریکا” و ئێران و زۆرینەی لایەنە سیاسییەکانی عێراق، چاویان لە ڕۆڵ و پێگەی سەرۆک بارزانییە بۆ چارەسەری کێشە چارەنەبووەکان.

کۆبەند

‎پێشتر ھەموان چاوەڕوانی دید و بۆچوونی سەرۆک بارزانی بوون، لەو پێناوەش زۆربەی حزب و لایەنە سیاسییەکانی عێراق ڕوویان کردە (پیرمام) و داوای پشتگیری لە سەرۆک بارزانی، چونکە ئەو ڕاستییە بۆ تەواوی عێراقییەکان ڕوون بووەتەوە کە ئێستا سەرۆك بارزانی ڕابەرایەتیی ڕەوتێکی گەورەی نەتەوەیی لە ھەرێمی کوردستان و عێراق دەکات، ھەتا وڵاتانی ناوچەکە و ئەمریکا و کۆمەڵگەی نێودەوڵەتییش لەو حەقیقەتە تێگەیشتوون.

چاوەڕێ دەکرێت سەردانی ئەم جارەی سەرۆک بارزانی بۆ بەغدا؛ چەندین کێشەی هەڵپەسێردراوی نێوخۆی عێراق چارە بکات و پەیوەندییەکانی هەولێر و بەغداش بباتە قۆناغێکی دیکەوە، ئەمەش دوات ئەوەی دێت سەرۆک بارزانی لە بەغداوە ڕایگەیاند: بە پێویستی دەزانین، دیالۆگ ببێتە بنەمایەکی جێگیر بۆ چارەسەرکردنی کێشەکانی هەردوو حکوومەتی هەرێمی کوردستان و عێراق.