شارەزایەک: ئەمریکا یا پێگیرە ب ڤەکێشانا سەربازێن خوە

• زێ بادینان :

بڕیارە ھەتا دوماھیا ئەڤسالە ئەمریکا سەربازێن خۆ ل ئیراقێ ڤەکێشیت و شارەزایەکێ سیاسەتا ئەمریکاژی دبێژیت، ئەمریکا یا پێگیرە ل رێکەفتنا دیالۆکا ستراتیژی بۆ ڤەکێشانا سەربازێن خوە ل ئیراقێ، بەلێ لڤینێن داعش ناکۆکی پەیداکرینە ل ناڤا حوکمەتا ئەمریکا.
کارۆخ خۆشناو، شارەزا ل سیاسەتا ئەمریکا بۆ ئاژانسا خانی دیارکر” ئەمریکا یا بەردەوامە لسەر بەندێن رێکەفتنا دیالوگا نیشتیمانی دگەل ئیراقێ، کو لسەر چوار ئاستانە و ئێک ژوان ڤەکێشانا ٢٥٠٠ سەربازێن خۆیە ھەتا دوماھیا ئەڤسالە، یاکو بڕیارە تنێ تیمێن شێوەرمەندی بمینن ل ئیراقێ و ئەمریکا یا پێگیرە ب رێکەفتنا دگەل ئیراقێ، بەلێ روویدانێن چەند رۆژێن بۆری ل ئیراقێ ناکۆکی دناڤبەرا پنتاگۆن و جەنەڕالێن سوپایێ ئەمریکا دگەل کۆچکا سپی پەیداکریە، چونکە ئەو ناخوازن لەز بھێتەکرن ل ڤەکێشانا سەربازێن ئەمریکی ژبەر مەترسیێن داعش.
کارۆخ خۆشناو ئاماژەکر” ئەز باوەرم ڤەکێشنا ھندەک سەربازێن ئەمریکا زێدەتر تاکتیکە بۆ رازیکرنا ھندەک لایەنێن شیعی، ئەگەر ئەمریکا خۆ ڤەکێشیت ئەڤە دێ ھاریکاریا پێشمەرگەی بکەت بۆ بەرھنگاربوونا چەکدارێن داعش، پشکەکا سیاسەتا ئەمریکا ئەڤە ل دەڤەرێ بمینیت ھەتا سەقامگیری تێدا ھەبیت، چونکە د بەرژەوەندیا ئەمریکادا نینە رەوشا دەڤەرا رۆھەلاتا ناڤین ئالۆز ببیت، ئەگەر ئەمریکا بخوازیت بمینیت ل ئیراقێ و دەڤەرێ ئەڤە ئەمریکا سۆپەر پاوەرە ل دەڤەرێ و دێ بڕیارا مانا سەربازێن خۆ بدەت.