وەزارەتا ساخلەمیا هەرێمێ ڕاگەهاند، بڕیار هاتیە دان شاندەکێ وەزارەتا ساخلەمیا عێراقێ سەرەدانا هەرێمێ بکەت ب مەرەما راهێنان و چارەسەریکرنا ئاریشەیێن کەرتێ ساخلەمیێ.
ئەڤرۆ پێنجشەمبی، وەزارەتا ساخلەمیا هەرێمێ ڕاگەهاندنەک بەلاڤکر و تێدا هاتیە، پشتی پێکئینانا لژنەیەکێ ژ ئالیێ وەزیرێ ساخلەمیا حکومەتا هەرێمێ و جڤین دگەل وەزیرێ ساخلەمیا عێراقێ ل بەغدا گەهشتینە چەند دەرئەنجامان.
بەحسا وێ یەکێ ژی کر، گرنگترین خالێن د جڤینێدا ئاماژە پێ هاتینە کرن ئەڤە بوون:
ئێک: بڕیار هاتە دان ئاریشەیێن دەرمان و چارەسەریێن نوژداریێن شێرپەنجێ ل هەرێما کوردستانێ بهێنە چارەسەرکرن.
دوو: داخاز هاتیە کرن باژێرێن هەرێما کوردستانێ بێ بەش نەبن ژ وان گرێبەستێن دهێنە ئیمزاکرن بۆ کڕینا ئامیرەیێن نوژداری.
سێ: هەماهەنگیا زێدەتر دناڤبەرا سندوقا کۆمەک بۆ تووشبوویێن نەخۆشیا شێرپەنجێ، هانی موسا وەزیرێ ساخلەمیا عێراقێ پرۆژەیێ سندوقا کۆمەکان بۆ تووشبوویێن نەخۆشیێن شێرپەنجێ یێن هەرێما کوردستانێ ب سەرکەفتی بناڤکر و داخاز ژ ئالیێن پەیوەندیدارێن وەزارەتا ساخلەمیا عێراقێ کر کو کار بکەن و پرۆژەیەکێ ب وی رەنگی ل عێراقێ ژی بهێتە جێبەجێ کرن.
چار: وەزیرێ ساخلەمیێ سوز دا ب چارەسەرکرنا ئاریشەیان ل پارێزگەها دهۆکێ هەم ژ روویێ دەرمان و پێدڤیاتیێن نوژداری د هەمان دەم ژیدا ستافێ ساخلەمیێ ژ ئالیێ وەزارەتا ساخلەمیا حکومەتا ناڤەندی بهێتە دابینکرن.
پێنج: داخاز هاتیە کرن باژێرێ هەلەبجە وەکو پارێزگەهـ سەرەدەری دگەل بهێتە کرن ژ روویێ دابینکرنا دەرمانان و پێدڤیاتیێن نوژداری و ئامیرەیێن نوژداری، وەزیرێ ساخلەمیا عێراقێ پێشنیارکریە دگەل پەرلەمان و ئەمینداریێن گشتی ل جڤاتا وەزیران ئەڤ ئاریشە بهێنە ئێکلاکرن، ژبەرکو ئەڤە ل دەستهەلاتا وەزارەتا ساخلەمیا حکومەتا عێراقێ نینە.
ئەڤە ددەمەکیدایە، نێزیکی سالەکێ یە ئاریشەیا دەرمانان لناڤ نەخۆشخانەیێن حکومیێن هەرێمێ بەردەوامە و وەلاتی ژی نەچاردبن بۆ ب دەستئێخستنا دەرمان و پێدڤیێن نوژداری بەرەف دەرمانخانێن دەرڤە بکەن.
Comments are closed, but trackbacks and pingbacks are open.