پەرلەمانتار: ژیان طاهر زێوەی
د مێژوویا مروڤایه‌تیێدا، هه‌رده‌مێ بنه‌مایێن مروڤایه‌تیێ هاتینه بنپێكرن و ژناڤبرن، و تالانكرن بوویه كلتوورێ ده‌ستهه‌لاتداران، گەلێن بنده‌ستێن وان ب نه‌چاری هه‌وارا خو بریه به‌ر شورش و سه‌رهلدانان و به‌رده‌وام ژ بو رزگاربوون ژ نه‌مانێ و پاراستنا كه‌ساتی و مافێن سروشتیێن خو كو زمان، كلتوور و خاكن، بزاڤ و سه‌رهلدان و شورش کرینە. سه‌ركه‌فتن و سه‌رنه‌كه‌فتنا شورشێن نه‌ته‌وێن ژێرده‌ست گرێدایی هێزا ئیرادا وان و چاوانیا رێبه‌رایه‌تیكرنا شورشان ژ لایێ سه‌ركێشێن شوڕشگێرانڤه بوویه. گه‌لێ كوردستانێ ژی ئێك ژ وان نه‌ته‌وانه یێن كو رزگاربوون و ده‌ركه‌فتن ژ تاریاتیا شه‌ڤا زولم و زورداریێ و ڤه‌دیتنا تیشكێن روژا ئازادیێ هه‌رده‌م خه‌ون و حه‌زه‌كا وان یا دێرین بوویه. لێ پێتڤی ب كه‌ساتیه‌كێ خودان كاریزما و نیشتماندوست و خونه‌ویست بوویه كو ئه‌و بوێری و باوه‌ریه ل ده‌ف هه‌بیت و بشێت وی بارێ گرانێ خه‌ونا گه‌له‌كێ لێقه‌ومای بدانیته سه‌ر ملێت خو و خو ل حه‌ز و ئارمانجێن وان بكه‌ته خودان و سه‌ركێشیا وان بكه‌ت.
هه‌لكرنا چریسكا ئاگرێ شورشا ئیلونا مه‌زن ب رێبه‌ریا ژه‌نه‌رالێ چیا و هێمایێ به‌رخودان و بابێ روحیێ نه‌ته‌وا كورد بارزانیێ نه‌مر ژ بو گه‌لێ كوردستانێ ب هه‌می چین و توێژ و نه‌ته‌وێن خوڤه ڤه‌ژیانه‌كا پر ژ هیڤی و ئومێد بوو. ڤیان و ئیرادا بده‌ستڤه‌ئینانا ئارمانجێ و باوه‌ریا موكوما گه‌لێ كوردستانێ ب سه‌ركردایه‌تیا حه‌كیمانه‌یا بارزانیێ نه‌مر دوو فاكته‌رێن سه‌ره‌كیێن درستبوونا هێزه‌كا پولایین بوون ل ده‌ف شورشگێران و هه‌ر ئه‌و هێزا باوه‌ریێ و ئیرادێ بوو كو به‌غدا نه‌چار كر هزرێ ل رێكه‌فتنا دگه‌ل سه‌ركردایه‌تیا كوردان بكه‌ت.
بڤێ هه‌لكه‌فتا پیروز سلاڤان بو گیانێ پاكێ ته‌ڤایا شه‌هیدێن رێیا ئازادیێ و سه‌ركاروانێ وان بارزانی نه‌مر و ئدریسێ هه‌رده‌م ساخ دهنێرین. سه‌رێ رێزو نه‌وازشێ بو وان پێشمه‌رگه و خه‌باتكارێن دێرین د چه‌مینین یێن كو ب ئیراده و هێزه‌كا ئاگرین به‌رده‌وام د چه‌په‌راندا بوون و نها ژی ژ ئه‌نجامێ ماندیبوون و قوربانیدانا وان و هزاران لاو و خورتێن ولاتی ئه‌ڤ كیانه کو هەرێما سەربلندا کوردستانێ یە، بده‌ست مه‌ڤه هاتیە.
Comments are closed, but trackbacks and pingbacks are open.