جان لودریان وه‌زیرێ ده‌رڤه یێ فره‌نسا راگه‌هاند كو به‌رنامێ ئه‌تۆمی یێ ئیرانێ نه تنێ بۆ رۆژهه‌لاتا ناڤین به‌لكو بۆ هه‌موو جیهانێ جهێ مه‌ترسیێ یه و هه‌كه ئیران ببیته خوه‌دانا چه‌كێن ئه‌تۆمی دێ ئه‌و یه‌ك بیته مه‌ترسیه‌كا گه‌له‌ك مه‌زن بۆ هه‌موو جیهانێ، ژ به‌ر هندێ ژی دڤێت ب رێیا دانوستاندنان به‌رنامێ ئه‌تۆمی یێ ئیرانێ بهێته چاره‌سه‌ر كرن، به‌ری هه‌ر تشته‌كێ ژی دڤێت ئیران پێگیریێ ب رێككه‌فتنا به‌ری نها بكه‌ت و ل ئالیێ دی دڤێت ئیران ده‌ستان ژ پیتاندنان یۆرانیۆمێ به‌رده‌ت چونكو ئه‌و یه‌ك ل دژی وێ رێككه‌فتنێ یه كو به‌ری نها د ناڤبه‌را ئیرانێ و وه‌لاتێن ئورۆپی ل گه‌ل ئه‌مریكا دا هاتیه ئیمزا كرن.
وه‌زیرێ ده‌رڤه یێ فره‌نسا ئه‌و یه‌ك ژی دیار كر كو ئیرانێ هه‌تا نها رێ نه‌دایه كو ئاژانسا ئه‌تۆمی یا جیهانی سه‌ره‌دانا بنگه‌هێن ئه‌تۆمی یێن ئیرانێ بكه‌ت و دووڤچوونا چالاكیێن ئه‌تۆمی یێن ئیرانێ بكه‌ت، ئه‌و یه‌ك ژی ب چو ره‌نگه‌كێ ناهێته قه‌بوولكرن.
ل ئالیێ دی حسێن ئه‌میر عه‌بدوللاهیان وه‌زیرێ ده‌رڤه یێ ئیرانێ ژی راگه‌هاند كو وه‌لاتێن ئورۆپی ب چو ره‌نگه‌كێ ناخوازن به‌رنامێ ئه‌تۆمی یێ ئیرانێ بهێته چاره‌سه‌ركرن و ئه‌و ژی باش دزانن كو به‌ری نها ئه‌مریكا خوه ژ رێككه‌فتنا ئه‌تۆمی ڤه‌كێشا و د سه‌رده‌مێ ترامپی دا سزایێن گه‌له‌ك مه‌زن ل سه‌ر ئیرانێ هاتنه سه‌پاندن، هه‌تا ئه‌مریكا سزایێن ل سه‌ر ئیرانێ نه‌راكه‌ت دانوستاندن ژی چو ئه‌نجامێن خوه نابن، لێ مخابن وه‌لاتێن ئورۆپی ل گۆر به‌رژه‌وه‌ندیێن ئه‌مریكا داخۆیانیان دده‌ن.
Comments are closed, but trackbacks and pingbacks are open.