نەوزاد محەمەد
ئەوەی باوە کاتێک لە هەر وڵاتێک دا پرۆژەیەکی گەورە و ستراتیجی جێ بە جێ دەکرێت، بۆ پێکانی چەند ئامانجێکە.
بۆ نمونە کاتێک لە وڵاتێک دا فڕۆکەخانەیەک بە پێوەری نێودەوڵەتی بونیاد دەنرێت، بێ گومان ئەو پرۆژە گەورەیە پەیوەندی راستەوخۆی بە ستراتیژیەتی وڵاتەوە هەیە و لە رووی سیاسی و ئابوری یەوە کاریگەری خۆی دەبێت.
جگە لەوەی دیاردەیەکی شارستانی و نیشانەی پێشکەوتنی وڵاتە، کاریگەری دەکاتە سەر ئابوری وڵات، لە رووی گەشە پێدان و بازرگانی و گواستنەوە و گەشت و گوزار.
واتا هەبوونی فڕۆکەخانە، ئەنجامی ئەرینی دەبێت بۆ سەر بوژانەوەی چەندین سکتەر لە ناوخۆی وڵات دا و هۆکارێکی سەرەکی یە لە بوژانەوەی ئابوری.
جگە لەوەش هەندێک جار هەبوونی فرۆکەخانە لە ناوچەیەکی تایبەت دا، لە رووی سیاسیشەوە کاریگەری خۆی پەیدا دەکات.
ئەوەی مەبەستمانە، فڕۆکەخانەی نێودەوڵەتی کەرکوکە و کردنەوەی ئەم فڕۆکەخانەیە لە ڕۆژی ٢٠٢٢/١٠/١٦، کە ڕۆژی ١٦ ئۆکتۆبەرەی خیانەتە !.
پرسیاری هەر گرنگ ئەوەیە بۆچی لەو رۆژە و بە چ شێوەیەک ئەو فڕۆکەخانەیە کرایەوە ؟.
هەر لە سەرەتای دەستبەکاربوون لەم پرۆژەیەدا، هەوڵ دراوە بابەتی بودجە و چۆنیەتی بەڕێوەبڕدنی قۆناغەکانی پرۆژەکە شاراوە بن، لەبەر ئەوەی گەندەڵیەکی زۆری تێدا دەکرا، تا لە کاتی کردنەوەی فڕۆکەخانەش کەم و کوڕی زۆری تێدا بووە و بە پێی پێوەر و مەرجەکان نەبووە.
دەست نیشان کردنی ڕۆژی ١٦ ی ئۆکتۆبەر بۆ کردنەوەی فڕۆکەخانە، چەند مەبەستێکی تری بە دواوەیە، لە لایەک هەوڵی پەردەپۆش کردنی خیانەتی ١٦ ی ئۆکتۆبەر و ڕۆڵی خائینان و خاک فرۆشان، لە لایەکی تریش خودی شیعەکان دەیانەوەێ باسی ئەو ڕۆژە نەکرێت کە ڕۆلێکی قیزەوەن یان هەبووە لە داگیر کردنی خاکی کوردستان و خزمەت کردنی ئەجندای دەرەکی.
ئەوەی زیاتریش گومانی خستە سەر ئەم پرۆژەیە، شێوازی کردنەوەی بوو، کە بە شێوەیەیکی کتوپڕ کرایەوە، بە بێ ئەوەی وەکو پڕۆتۆکۆل لایەنە پەیوەندار و فەرمیەکان ئاگادار بن و دەعوەت بکرێن، بەڵکو تەنها چەند دەموچاوێکی گوماناوی و گەندەل ئامادەی ئاهەنگی بوون، کە خاڵی تەبەعیە و دژە کورد هەموویانی کۆ دەکردەوە.
هەر بۆیە گومان دروست دەبێت لەسەر ئایندەی ئەم فڕۆکەخانە بە ناو نێودەوڵەتیە، کە لە پێناو خزمەت کردنی گەلانی عیراق بێت، وە لە ئەنجامی هەلومەرجە بەستراوەکان بە چۆنیەتی مامەڵە کردن هەر لە سەرەتای دەست بەکاربوون و تا رۆژی کردنەوەی، قەناعەتی تەواو دروست دەکات کە مەبەستی سەرەکی لەم فڕۆکەخانەیە خزمەت کردنی ئەجندای درەکی یە و ڕێگا خۆشکردنە بۆ گواستنەوەی زیاتری تیرۆر، ئەگەر بزانین ئەو وڵاتەی زیاتر دەستی تێدا هەیە و سوود مەندی سەرەکی یە، وڵاتێکی خاوەن رژێمێکی تیرۆریست و فاشیزمە و دەستی لە تیرۆری نێو دەوڵەتی دا هەیە.
قەناعەتمان وایە، ئەم فڕۆکەخانەیە هیچ سودێکی بۆ گەلانی عیراق و ئابوری عیراق نابێت، بەڵکو زیاتر خزمەتی سیاسەتی تیرۆریزمی رژێمێکی ناوچەکە دەکات و زیاتر عیراق دەخاتە ژێر هەژمونی ئەو رژێمە.
Comments are closed, but trackbacks and pingbacks are open.