قانوونێن جوان و بێ سیستەم

غیاس خالد زێباری

قانوون بۆ رێکخستنا جڤاکا دهێنە دارشتن ، لەوما هەر جڤاکەکی قانوونێن خۆ یێن تایبەت هەنە لدیف پێتڤیاتیێ ، هندەک قانوونێن گشتی ژی هەنە ، مینا یێن ئاسمانی و نیڤ نەتەوەیی . لێ بۆ بجهـئینانا قانوونان پێتڤی یە سیستەم هەم هەبیت ، باشترین سیستەم ژی دەستوورە ، ئەگەر دەستوور ژی نەبیت پێتڤی یە سۆزنامەکا نشتیمانی دناڤبەرا لایەنێن سیاسی هەبیت بۆ چەسپاندنا قانوونا ، ژپێخەمەت دابینکرنا دادوەریێ و دادوەریا جڤاکی و سەقامگیریا جڤاکی و ئابووری ، بۆ ڤێ چەندێ پێتڤی یە دەستهەڵاتدارێن وەڵاتی باوەری و ئیرادە هەبیت بۆ چەسپاندنا وان قانوونێن بەرکار لسەر هەمی تەخ و چینا بێ جوداهی .

هەرچەندە ل هەرێما قانوونێن باش هاتینە دەرکرن کۆ ل قانوونێن زۆر وەڵاتان پێشکەفتیترن، لێ ئەگەر هەلسەنگاندنا وان قانوونا بهێتەکرن ژلایێ چاوانیا بجهئینانێ ، دێ دیار بیت کۆ هەرێما کوردستانێ ژلایێ چەسپاندنا قانوونان زۆرا پاشکەفتی یە و سەرپێچیێن زق و بەرچاڤ هەنە ، خەلکەکێ هەی لسەرڤەی یاسایانە ….!

ژوان سەرپێچیا سیستەم نەبوونا سازیێن حکومی، چونکی ئەگەر سازیێن حکومەتێ د سازیکری بان ، دەستهەلاتا حکومەتێ دا یا سەرتاسەری بیت و هەمی سازیێن ڕێڤەبرنێ و ئێمناهیێ دا دبن فەرمانا حکومەتێ بن ، نەک بن فەرمانا حزبا و کەسایەتیێن سیاسی و فەرماندێن لەشکری ، یان داهاتێ وەڵاتی کۆ سامانەکێ نشتیمانی یە و ملکی هەمی وەڵاتیانە ، ئەڤرۆ حزب و کەسێن سیاسی بۆ بەرژەوەندێن خۆ ب کار دئینن و وەناکە بۆ خەزینا حکومەتێ بزڤریت و مۆچە پێ بهێنەدان ، بێ کۆ چ یاسا رێگریێ لێ بکەن ،
نە تنێ نەشێن رێگریێ لێ بکەن بەلکی نەشێن ڕاستیا ڤێ چەندێ ژی دیار بکەن ..!
هەر وەسا مانەڤا سازیێن لەشکری و ئێمناهی بن فەرمان و ڕاسپاردێن حزبێن سیاسی ، مەزنەرین سەرپێچیا یاسایی یە ،

سەروەری نەبوونا قانوونێ ل هەرێما کوردستانێ، بوویە ئەگەرێ دوورکەفتنا خەلکی ل دەستهەڵاتێ و نەبوونا باوەریێ دناڤبەرا وان دا و لاوازکرنا هەستا نشتیمانی و نەتەوی ژلایێ خەلکی .
بەردەوامیا رەوشا کوردستانێ بڤی ڕەنگی ، نیشانێ باوەری نەبوونا حزب و لایەنێن سیاسی یە ب پاشەرۆژا سیاسی یا کوردستانێ .
ئەگەر حزب و سیاسیێن کوردستانێ باوەری ب بڤێ ئەزمۆنا هەرێمێ و پاشەرۆژا وێ هەبان ، دڤان سیهــ و ئێک ساڵان دا، دا شێن حکومەتا هەرێمێ کەنە حکومەتا خەلکی و حکومەتەکا سازیکری و سەروەریا یاسایێ بەرپا بیت .

ئەگەر دەستوور و سازی هەبان ، نە ئاریشا مۆچەی و بۆدچەی هەدبوو و نەژی بەردەوامیا قەیرانا سۆتەمەنی و نەژی هەوونا ب دەهان هزار مۆچەخۆرێن بن دیوار و دووبارە و سێبارە ..!
ئەگەر قانوون سەروەربا و حکومەت یا سازیکری با ، چ کەس و لایەنان ئەو وێرەکی نەدبوو دژی پرۆژێ چاکسازیێ سەرۆکێ حکومەتێ راوەستیت و دەستێ خۆ درێژکرنا سەروەت و سامانێ وەڵاتی .

پێتڤی یە سیاسیێن کوردستانێ بۆ گەرا داهاتی یا هەلبژارتنا، گاڤێن بلەز و وێرەکانە بۆ بسازیکرنا سازیێن حکومەتێ و سەروەریکرنا قانوونێ و ڤەگەراندنا باوەریێ دناڤبەرا خەلکی و دەستهەڵاتێ بهاڤێژیت و بەرژەوەندێن گشتی ل سەرڤەی هەمی بەرژەوەندا بن و کابینا داهاتی ببیتە حکومەتا وەڵاتیا و دەستهەڵاتا سەرتاسەری هەبیت و ببیتە خودان لەشکرەکێ ئێکگرتی و راکرنا دەستهەڵاتا حزبێن سیاسی لسەر داهات و سامانێن نشتیمانی ، داکۆ داهات و سامانێن نشتیمانی بکەڤنە د خزمەتا وەڵاتی و وەڵاتیان دا ، داخازیێن خەلکێ کوردستانێ تنێ بەردەوامیا مۆچەی و دابینکرنا پێتڤیێن سەرەتایی یێن ژیانێ نە ، وەک ئاڤ و کارەب و سۆتەمەنی و جادە ، ئەڤەژی بۆ هەرێما کوردستانێ یا خودان چەندین ژێدەرێن داهاتی، زۆرا گران نیە .

هیڤیا خەلکێ کوردستانێ ئەوە هەرێما کوردستانێ ، یا خودان قانوونێن جوان ، ببیتە خودان سازیێن جوانتر .

• دکاری هەموو بابەتێن خۆ ببینی ….