سه‌رۆك وه‌زیرێن عیراقێ راگه‌هاند، عیراق ل به‌ر ده‌رازینكا شه‌رێ نافخۆبوو، لێ ئه‌وى بریاردا دئه‌ڤێ هه‌ڤركییێدا یێ پشكدار نه‌بیت، كازمى وه‌سا دبینیت، سه‌درى خه‌له‌تى كر ده‌مێ خوه ژ په‌رله‌مانى ڤه‌كێشاى، لایه‌نێن سیاسى ژى باوه‌رى ب هێز و ده‌ستهه‌لاتا دیموكراسى نه‌مایه.
سه‌رۆك وه‌زیرێن عیراقێ د دیداره‌كێدا دگه‌ل رۆژنامه‌یا لۆڤیگارو یا فره‌نسى زانیارییێن نوو ل دوور خۆپیشاندانێن لایه‌نگرێن سه‌درى و پێكدادانێن چه‌كدارى دگه‌ل پشكه‌كا حه‌شدا شه‌عبى ل ده‌ڤه‌را كه‌سك به‌لاڤكرن.
شه‌رێ نافخۆ
كازمى راگه‌هاند، عیراق ل به‌ر ده‌رازینكا شه‌رێ نافخۆ بوو، هه‌ردوو لایان دڤیا كابینه‌یا نوكه یا حكومه‌تێ پشته‌ڤانییا ئێك ژ ئه‌وان بكه‌ت، لێ ئه‌وى بریاردا پشكداری هه‌ڤركییان نه‌بیت، له‌وما هه‌موو تشت بۆ رێگرتنێ ل روودانا شه‌رێ نافخۆ كرن.
سه‌رۆك وه‌زیرێن عیراقێ گوت ژى : ئه‌وى فه‌رمان ب هێزێن ئێمناهییێ كر دهه‌ر ره‌وشه‌كێدا بیت ته‌قه‌یێ ل خۆپیشانده‌ران نه‌كه‌ن، ئه‌و دناڤ زه‌ڤییه‌كا میناندانه و دڤێت ئه‌ڤى ئاگرى ب ڤه‌مرینن، و زێده‌تر دیاركر، ئه‌وى دڤیا خوه پشتراست بكه‌ت كو ده‌ستێن هێزێن ئێمناهییێ و له‌شكه‌رى ب خوینا عیراقییان سوور نه‌بن و دسه‌ركه‌ڤتى بن.
كازمى ل دوور تومه‌تباركرنا خوه ب ئه‌وێ چه‌ندێ كو رێ ب خۆپشانده‌رێن سه‌درى دا بچنه دناڤا ده‌ڤه‌را كه‌سكدا گوت : ئه‌وى رێك نه‌دا خۆپیشانده‌ر بچنه ده‌ڤه‌را كه‌سك، لێ ره‌وش ل ژێر كونترۆلێ ده‌ركه‌ڤت، له‌وما هێزێن ئێمناهییێ نه‌شیان رێكێ ل چوونا خۆپیشانده‌ران بگرن.
ده‌ستوور و هه‌لبژارتن
مسته‌فا كازمى دبێژیت: ئه‌گه‌ر ئه‌و چووبا ناڤ ئه‌وان هه‌ڤركییان، دا ئالوزى پتر لێ هێن، نوكه‌ژى پێدڤییه ده‌ستوور بهێته هه‌مواركرن و هه‌موو ژى ل دوور ب رێڤه‌چوونا هه‌لبژارتنێن پێشوه‌خت رێكبكه‌ڤن.
راگرتنا پێكدادانان
كازمى ل دورر ئه‌گه‌رێن راگرتنا پێكدادانێن چه‌كدارى دناڤبه‌را لایه‌نگرێن سه‌درى و پشكه‌كا هێزێن حه‌شدا شه‌عبى دا ل به‌غدا گوت : ئه‌و راگرتنه ژبه‌ر فشارێن هه‌موو لایه‌نان بوو.
خه‌له‌تییا سه‌درى
كازمى كو ژلایێ چارچووڤێ هه‌ماهه‌نگییێ ڤه ب هه‌ڤپه‌یمانێ سه‌درى دهێته هژمارتن ئاشكراكر، سه‌درى خه‌له‌تى كر ده‌مێ خوه ژ په‌رله‌مانى ڤه‌كێشاى، ژبه‌ركو ب ئه‌وى كارى ده‌رفه‌ت دا هه‌ڤركێن خوه جهێ ئه‌وى پر بكه‌ن و ل په‌رله‌مانى ببنه زوورینه، له‌وما داخوازێ ژ سه‌درى دكه‌ت پشكدارى دانوستاندنان بیت، ژبه‌ركو ئه‌و رێكا ئێكانه‌یه.
هێز ل شوونا دیموكراسییێ
كازمى وه‌سا دبینیت، لایه‌نێن سیاسى هند باوه‌رى ب هێز و ده‌ستهه‌لاتێ هه‌یه، هند ب بهایێن دیموكراسییا راسته‌قینه نینه و دبێژیت: ده‌ستوور و قانوون و ده‌مێن ده‌ستوورى گه‌له‌ك دروون، لێ ب مخابنیڤه پێگیرى پێ نینه.
Comments are closed, but trackbacks and pingbacks are open.