كوردستان و ئیراق پشتى گشتپرسیا سه‌رخۆبوونێ

غیاس خالد زێبارى

ژ ئه‌نجامێ نه‌پێگیربوونا ده‌وله‌تا ئیراقێ ب ده‌ستوورێ هه‌رده‌مى و رێكه‌فتنێن لگه‌ل هه‌رێما كوردستانێ و زه‌فتكرنا مافێن خه‌لكێ كوردستانێ، مینا مادێ ( 140 ) ێ ده‌ستوورى و بڕینا مۆچه‌ى و بۆدجێ كوردستانێ و … هتد سه‌ركردایه‌تیا سیاسى یا كوردستانێ ب ده‌سپێشخه‌ریا سه‌رۆك مسعود بارزانى بریارا ئه‌نجامدانا راپرسیا سه‌رخۆبوونا كوردستانێ دا و لرۆژا 25 ێ ئیلۆنا سالا 2017 بسه‌ركه‌فتیانه‌ هاته‌ ئه‌نجامدان و پڕانیا خه‌لكێ كوردستانێ ب به‌لێ ده‌نگدا .
راسته‌ ژبه‌ر نه‌بوونا پشته‌ڤانیا نیڤده‌وله‌تى ئارمانج و مافێ سرۆشتى و ره‌وا یێ خه‌لكێ كوردستانێ بجهـ نه‌هات و حكومه‌تا ئیراقێ ژى پشتى راپرسیێ هه‌مى شیانێن خۆ یێن له‌شكرى و سیاسى و كارگێرى دژى هه‌رێمێ ته‌رخانكرن و بكارئینان، گه‌هشته‌ ئاستێ هه‌ولا داگیركرنا كوردستانێ بهێزا چه‌كى و گه‌ماروودانا وێ ژلایێ سیاسى و ئابوورى، ب مه‌ره‌ما نه‌هێلانا ڤى قه‌وارێ یاسایى و ده‌ستوورى .
پسیار ئه‌وه‌ ئه‌رێ هه‌رێما كوردستانێ پشتى ڤێ راپرسیێ چ لێهات ..؟ راسته‌ ژبه‌ر خیانه‌تكاریا ناڤخۆیى پشكه‌كا ئاخا وێ هاته‌ داگیركرن، لێ لده‌مه‌كێ كۆرتدا شیا وان هه‌مى پیلانا بهه‌ڵوه‌شینیت و ژناڤ ببه‌ت و سه‌نگا خۆ یا سیاسى و له‌شكرى لده‌ست نه‌دا ، سه‌ركردایه‌تیا سیاسى یا كوردستانێ بسه‌رۆكاتیا سه‌رۆك مسعود بارزانى و سه‌رۆك نێچیرڤان بارزانى ئه‌و گه‌ماروویێن سیاسى و ئابوورى شكاندن و په‌یوه‌ندیێن دبلۆماسى لگه‌ل جیهانێ مینا به‌رێ ڤه‌گه‌ڕاندن و هه‌ولێر بوویه‌ڤ سه‌نته‌ره‌كێ مه‌زنێ ئابوورى و ووزێ و پێگه‌هه‌كێ مه‌زنێ دبلۆماسى، ژلایێ ئابوورى و گه‌شه‌پێدانێ ژى، هیڤى و ئارمانجێن ده‌وله‌تا ئیراقێ ژناڤ برن كۆ دڤیا ب بڕینا بۆدجه‌ى و مۆچێ خه‌لكێ كوردستانێ و به‌ركه‌فتیێن پێشمه‌رگه‌هێن كوردستانێ ، ئابووریا كوردستانێ بهه‌رفینیت و بئێخیته‌ دناڤ قه‌ریرانه‌كا دوومدرێژا ئابوورى و جڤاكى و كاروانێ وێ یێ ئاڤه‌دانیێ و گه‌شه‌بوونا رابوه‌ستینیت، لێ به‌رۆڤاژا ئارمانجێن وان بوویه‌ راستى، لسه‌ر ده‌ستێ مه‌سرۆر بارزانى سه‌رۆكێ حكومه‌تا هه‌رێما كوردستانێ ، ب سیسته‌متركرنا زێده‌تر یا سازیێن حكومى و سیاسه‌تا ئابوورى یا پشت بخۆ به‌ستنێ و گاڤێن چاكسازیا، بێ میزانیا ده‌وله‌تا فیدرالى مۆچه‌ى به‌رده‌وام بوویه‌ڤه‌ و كاروانێ ئاڤه‌دانیێ و پرۆژێن خزمه‌تگۆزارى و ستراتیژى زێده‌تر بوون و ره‌وشا سیاسی و ئێمناهیى یا كوردستانێ د سه‌قامگیریه‌كا باشدایه‌ و به‌ره‌ڤ باشتربوونێ ژى دچیت .
به‌رامبه‌ر ڤێ چه‌ندێ پشتى راپرسیا سه‌رخۆبوونا كوردستانێ و گاڤێن ده‌وله‌تا ئیراقێ بۆ ژناڤبرنا قه‌وارێ هه‌رێما كوردستانێ، ره‌وشا ئیراقێ یا سیاسى و ئابوورى و ئێمناهى رۆژ بۆ رۆژ به‌ره‌ڤ قه‌یرانێن مه‌زنتر و دژوارتر دچیت و گه‌هشتیه‌ ئاستێ شه‌رێ ناڤخۆیى، ژلایێ ئیمناهى و نه‌بوونا خزمه‌تگۆزایێن سه‌ره‌تایى ئه‌ڤرۆ ئیراق ل پێشه‌نگا ده‌وله‌تێن پڕ مه‌ترسیێن جیهانێ دهێت، ده‌ستهه‌لاتا وێ كه‌فتیه‌ د ده‌ستێ میلیشیایێن تائیفى و بریارا وێ یا سیاسى كه‌فتیه‌ د ده‌ستێ وه‌لاتێن هه‌رێمى دا و چ سه‌روه‌رى نه‌مایه‌، كۆشتن و خۆنیشاندان د به‌رده‌وامن و چ چاڤدێرێن سیاسى نه‌شێن پێشبینیا سۆبه‌هى یا ئیراقێ بكه‌ن، ئیراق بوویه‌ ده‌وله‌ته‌كا بێ حكومه‌ت…! گه‌هشتیه‌ وى ئاستى په‌نایێ بۆ هه‌رێما كوردستانێ بینن بۆ ده‌ربازكرنێ ل قه‌یرانان .
ب ره‌نگه‌كێ گشتى هه‌رێما كوردستانێ خاندنه‌كا باش بۆ روودان و كارڤه‌دانێن پشتى راپرسیا سه‌رخۆبوونا كوردستانێ كرن و بوونه‌ فاكته‌رێن بخۆداچوونه‌ڤێ و پشت به‌ستن ب ئابوورێ خۆ و دانانا ستراتیژیه‌تا كۆرت خایه‌ن و درێژ خایه‌ن بۆ ڤه‌ژاندنا كوردستانێ ژلایێ ئابوورى و كارگێرى و جڤاكى و دابینكرنا خزمه‌تگۆزاریا و پرۆژێن ستراتیژى، ژلایێ ئێمناهى ژى نمۆنێ سه‌قامگیریا ده‌ڤه‌رێ مایه‌ڤه‌ .
لێ ئیراقێ مفا ل خه‌له‌تی و گاڤێن خۆ یێن نه‌ ده‌ستوورى و دوورى پرنسیپ و ره‌وشتێ مرۆڤایه‌تى و وه‌لاتیبوونێ به‌رامبه‌ر هه‌رێما كوردستانێ وه‌رنه‌گرتن، له‌وما كه‌فتیه‌ دمه‌ترسیه‌كا سیاسى و جڤاكى و ئێمناهى دا، ژبوورى داربازبوونا وێ پێتڤى یه‌ سه‌روه‌ریا خۆ بزڤرینیت و بریارێن وێ د ئیراقى بن و سه‌ره‌ده‌ریێن وێ لگه‌ل هه‌رێما كوردستانێ یێن ده‌ستوورى بن و پێگیریێ ب رێكه‌فتنێن دناڤبه‌را وان بكه‌ت، هه‌رێما كوردستانێ ژى بۆ به‌رده‌وامیبوونا ڤێ ئه‌رێنیێ و به‌ره‌ڤ باشتربوونێ، پێتڤى یه‌ به‌ره‌ڤ ئێكرێزبوونا لایه‌نێن سیاسى بچیت .