پارێزگارێ هەولێرێ د کۆنفڕانسەکێ رۆژنامەڤانیدا ڕاگەهاند، بسەدەما لەهیا هەولێرێ ٨٦٧ ترۆمبێل زیان بەرکەفتنە و ٥٠٠ خانیێن وەلاتیان هەڕفتینە و زیان بەرکەفتنە، دبێژیت ژی، “لەهیێ نێزیکی ٢١ ملیار دیناران زیان هەبووینە”.
ئەڤرۆ ئێکشەمبێ، ئومێد خۆشناو پارێزگارێ هەولێرێ د کۆنفڕانسەکێ رۆژنامەڤانیدا ڕاگەهاند،بسەدەما لەهیا چەند رۆژێن دەربازبووی ١٢ وەلاتیان ژیانا خۆ ژ دەستدا، کو تەرمێ ١٠ ژ وان هاتیە دیتن و گەهاندینە نوژداریا داد هەولێرێ و پشترە ڕادەستی خێزانێن وان هاتینە کرن.
دوو وەلاتی ژی هەیا نها بێ سەروشینن کو ئێک ژ وان شڤانە بناڤێ “ئومێد شامل” و زارۆکەک بناڤێ “دانیار نەبەرز”.
پارێزگارێ هەولێرێ دەربارەی ئامارێن زیان ڤێکەفتیێن لەهیێ بەحسا وێیەکێ ژی کر، دوو هزار و ٥٠٩ خێزان کەلوپەلێن وان یێن ناڤ ماڵێ ئاڤ چوویە سەر و ژناڤ چووینە و نێزیکی ٥٠٠ خانیان ژی زیان بەرکەفتینە.
ئاماژە ب وێیەکێ ژی کر، ٨٦٧ ترۆمبێل زیان گەهشتینی، دناڤ واندا ژی ژمارەیەکا ترۆمبێلێن حکومی هەیە کو لدەما دهەوارا خەلکی چووین بن ئاڤ بووینە، دبێژیت ژی، هزار و ٥٠٣ دوکان و مارکێت و کارگەهـ و پێشانگەهێن ترۆمبێلان و گەراج زیان بەرکەفتینە.
دەربارەی کوما گشتیا وی پارەیێ کو بۆ زیانان دهێنە خەملاندن پارێزگارێ هەلێرێ گوت، زیان ب کۆژمێ ٢٠ تا ٢١ ملیار دیناران دهێنە خەملاندن.
ئومێد خۆشناو دبێژیت ژی، “د سەرێ سالێ دا وەکی پارێزگەها هەولێرێ بۆ رێزگرتنێ ل شەهیدێن چەند حەفتیێن دەربازبووی یێن داعش و ئەو کەسێن بسەدەما لەهیێ ژیانا خۆ ژ دەستداین و زیان گەهشتنینێ چ هەلکەفتەکا فەرمی ناهێتە گێران”.
ئەو ژی د دەمەکێ دایە، رۆژا ئەینیا دەربازبووی ل چەندین تاخێن هەولێرێ لەهی دروستبوو و لدیڤ ئاماران ١٢ کەسان ژیانا خۆ ژ دەستدا و دوو کەس ژی بێ سەروشینن، چەند کەس ژی برینداربووینە، دگەل وێیەکێ ژی ئاوارەبوونا خەلکەکێ زۆرژی لێ کەفتیە.
Comments are closed, but trackbacks and pingbacks are open.