لژنەیا بەرهنگاریا کۆرۆنایێ 14 بریار دان

لژنەیا بەرهنگاریا کۆرۆنایێ 14 بریار دا

زێ بادینان

کۆمبوونا لژنەیا بلندا بەرهنگاریا کۆرۆنایێ ب دوماهی هات و پێشنیازێن راگەهاندنا قەدەغەیا هاتنوچوونێ رەت کرن.

کۆمبوونا لژنەیا بلندا بەرهنگاریا کۆرۆنایێ کو ئەڤرۆ سپێدێ دەست پێ کربوو، بەری دەمەکێ کێم ب دوماهی هات و جۆتیار عادل، پەیڤدارێ حکومەتا هەرێما کوردستانێ د کۆنگرەیەکێ رۆژنامەڤانی دا بریارێن لژنێ راگەهاندن کو ئەڤێن ل خوارێ نە:

1- پێدڤیە کەسێن ل جهێن ئایینی و بازار و مۆل و جهێن گشتی و هۆتێل و مۆتێلان کار دکەن، ڤاکسینێ بدانن یان بەردەوام تێستا 72 دەمژمێری هەبیت و لژنەیێن قایمقامیان دێ دیڤچوونێ کەن و جهێ پێگیر نەبیت دێ هیتە داخستن.

2- پێدڤیە هەمی فەرمانبەر ڤاکسینێ وەربگرن و ب ماسک بچنە دەوامێ، یێ بجهـ نەئینیت، دێ ل گۆرەی یاسایا فەرمانبەران هێتە سزادان و لژنەیا بلندا بەرهنگاریا کۆرۆنایێ دێ هەلسەنگاندنێ بۆ بجهئینانا ڤێ خالێ کەت.

3-  رێ ناهێتە دان گەشتیارێن بێی ڤاکسین یان تێستا 48 دەمژمێری سەرەدانا هەرێما کوردستانێ بکەن.

4- هەر کۆمپانیەکا گەشتیاری یا تێستێن سەختە بکار بینیت، دێ ل هەرێما کوردستانێ هێتە قەدەغەکرن و چیتە د لیستا رەش دا.

5- سەپاندنا گرێدانا ماسکی ل جهێن گشتی و فەرمانگەهێن میری بۆ وان کەسێن ڤاکسین دانای ژی.

6- چوونا سەر قەبران و کۆر و کۆنفرانسان ب هەمی رەنگان قەدەغەیە و یێ پێگیر نەبیت، دێ هێتە سزادان، ل گۆرەی سزایێن بەری نوکە هاتینە دەستنیشانکرن. 

7- مەلەڤانگەهـ و جهێن وەرزشی ب مەرجێ بجهئینانا رێنمایان دێ ڤەکری بن.

8- هۆلێن سینەمایێ د ناڤ مۆل و بازار و جهێن گشتی دا دێ دگرتی بن.

9- هۆلێن شەهیانان و هۆلێن هەلکەفتان ل ناڤ هۆتێلان دێ دگرتی بن.

10- دانانا تازیان ب هەمی رەنگان قەدەغەیە و یێ پێگیر نەبیت دێ هێتە سزادان.

11- جهێن ئایینی ب بجهئینانا رێنمایان دێ ڤەکری بن و یێ پێگیر نەبیت دێ رێکار بەرانبەر هێنە وەرگرتن.

12- ژوورێن ئۆپەراسیۆنان ل پارێزگەهان دێ ڤان رێکاران بجهـ ئینن و دەستهەلات هەیە ئەگەر پێدڤی بیت رێکاران دژوار بکەن.

13- لژنەیا بلندا بەرهنگاریا کۆرۆنایێ داخواز ژ دەزگەهێن میدیایی دکەت هاریکار بن و هشیاریێ بەلاڤ بکەن و سوپاسیا وان دکەت کو تا نوکە دهاریکارن.

14- ئەڤ رێکارە بۆ دەمێ حەفتیەکێ نە و لژنەیا بلندا بەرهنگاریا کۆرۆنایێ دێ ل رۆژا 3/8/2021 کۆم بیتە ڤە و هەلسەنگاندنێ بۆ ڤان رێکاران کەت.