مەحمود محەمەد: تا نوکە پارتی و ئێکەتی لسەر بەربژارەک هەڤپشک بۆ پۆستێ سەرۆک کۆماری نە گەهشتینە رێککەفتنێ

مەحمود محەمەد، پەیڤدارێ پارتی دیموكراتی كوردستان راگەهاند، پارتی و ئێکەتی تا نوکە دەربارەی بربژارەکێ هەڤپشک بۆ پۆستێ سەرۆک کۆمارێ عیراقێ نە گەهشتینە رێککەفتنێ.

پەیڤدارێ پارتی، د چوارچوڤێ کونگرەکێ ڕۆژنامەڤانی دا راگەهاند، د نوکە دا پارتی و ئێکەتی د قۆناغا دانوستاندنان دانە و تا نوکە نە گەهشتینە رێککەفتنا دوماهیێ دەربارەی ئێک بەربژار بۆ پۆستێ سەرۆک کۆمارێ عیراقێ.

دەربارەی ئاریشێن عیراقێ گوت ژی،” چ دەمەکی ئاریشێن عیراقێ سەرۆک کۆمار نەبوویە و ئەز نابینم بابەتێ سەرۆک کۆماری ئاریشە بیت، راستە تێگەهشتنا پارتی و ئێکەتی بۆ پۆستێ سەرۆک کۆماری یا جودایە، بەلێ ئاریشا عیراقێ گەلەک ژ هندێ مەزنترە کو ب سەرۆک کۆماری ڤە بهێتە گرێدان.”

مەحمود محەمەد ئاماژە کر:” کورتکرنا ئاریشان د پۆستێ سەرۆککۆماری دا، سیاسەتا مەدیایا پشکەکا لایەنێن شیعان بوویە د رابردووی دا، ب بهانا نەبوونا بەربژارێ هەڤپشک یێ کوردان ب مەزنترین بەربەست ل بەرامبەر پرۆسا سیاسی یا عیراقی بناڤکریە، بەلێ کورد و لایەنێن کوردی وەسا دبینن، وەک عەلی حسێن ئاماژە پێکری،” ئاریشا مەزن دناڤ مالا شیعان دا بوویە، نە یا کوردان.”