پەیڤدارێ حکومەتا هەرێما کوردستانێ ڕاگەهاند، مووچەرخۆرێن هەرێما کوردستانێ پشتراست دکەین کو هەمی ٢٥ی مەهێ مووچە دێ هێتە دابەشکرن.
جوتیار عادل، پەیڤدارێ حکومەتا هەرێما کوردستانێ د داخویاننیەکێ دا ب میدیا فەرمی یا پارتی ڕاگەهاند، “ئەولیەتا ئەوی داهاتێ کو دهێتە دەستێ حکومەتێ دێ بۆ مووچەی بیت و مووچەخۆرێن هەرێما کوردستانێ پشتراست دکەین کو هەمی ٢٥ی مەهێ مووچە دێ هێتە دابەشکرن.
پەیڤدارێ حکومەتا هەرێما کوردستانێ هیڤی ژی خواست د چەند روژێن داهاتی دا بەغدا ٢٠٠ ملیار دینارێن ڤێ مەهێ ژی بشینیت، بۆ وێیەکێ مووچەیێ فەرمانبەران بێ لێبرین و ١٠٠% بهێتە دابەشکرن.
هەڤدەم ئاماژە ب زێدەبوونا داهاتێ حکومەتا هەرێمێ کر ب سەدەمێ جێگیربوونا بهایێ پەترۆلێ و زەلال ژی کر، ئەگەر هات و بەغدا پارە نە شاند ژی ئەو دێ بزاڤێ کەن مووچەی بێ لێبرین دابەش بکەن.
پێشتر ئێن ئاڕ تی ژ ژێدەرەکی ژ وەزارەتا دارایی بەلاڤکربوو، “بریارە ٢٥ی ڤێ مەھێ پارڤەکرنا مووچەیێ فەرمانبەران بێ لێبرین دەستپێبکەت”.
د ١٤ی مەهێ ژی دا، فارس عیسا سەرۆکێ نوینەراتیا حکومەتا هەرێمێ ل بەغدا ب ئێن ئاڕ تی ڕاگەهاند، ئەنجومەنێ وەزیرێن عێراقێ ب کوما دەنگان بڕیار دایە ٢٠٠ ملیار دیاناران بۆ هەرێمێ بشینیت.
سەرەرای وێیەکێ دەمێ چەند مەهەکان بوو داهاتێن حکومەتا هەرێمێ بەردەوام د زێدەبوونێدا بوون و تێرا پارڤەکرنا مووچەی دکر بێ لێبرین، لێ مەها دەربازبووی، ل دەمێ بەغدا رێژا ٢٠٠ ملیار دینار بو هەرێمێ شاندین و چ هێجەت نەمان بو بەردەوامیێ ب لێبرینێ، بریار هاتە دان مووچە بێ لێبرین بهێتە پارڤەکرن تا کو وی دەمێ بەغدا ل شاندنا وێ رێژەیا پاران بەردەوام بیت.
Comments are closed, but trackbacks and pingbacks are open.