یوسرا عومەر هاریكارا سەرۆكێ سەقاناسێن عیراقێ ڕاگەهاند، ژئەگەرێ نزمە فشارەكا گەرم، پلەیێن گەرمێ ل هندەك دەڤەرێن عیراقێ دێ گەهنە 51 پلەیێن سەدی، و ل هندەك دەڤەران ل بەر تیشكا ڕۆژێ پلەیێن گەرمێ دێ بۆ 60 هەتا 65 پەلەیان بلندبن.
د داخۆیانیەكا ڕۆژنامەڤانیدا، یوسرا عومەر گوت: دڤی وەرزێ هاڤینێدا بلندبوونا پلەیێن گەرمێ دێ كاریگەریەكا زۆر خراب كەتە سەر ژیانا خەلكێ عیراقێن نەخاسم ئەگەر دەمژمێرێن پێدانا كارەبێ كێم ببن، وی دەمی دێ كێشەیێن مەزن بۆ وەڵاتیان دورست بن.
ژلایێ خۆڤە نەتەوێن ئێكگرتی ژی هۆشداری ژ مەترسیێن بلندبوونا پلەیێن گەرمێ ڕاگەهاند.
هۆشداری ژ مەترسییا گهورینكاریێن سەقای و قەتیسبوون و بلندبوونا پلەیێن گەرمێ دبەردەوامن، دوی بیاڤیدا ڕێكخراوا نەتەوێن ئێكگرتی ڕاگەهاند، ژئەگەرێ بلندبوونا پلەیێن گەرمێ، مەترسی كەتییە سەر ژیانا زێدەتر ژ 400 ملیون كەسا لسەرانسەری جیهانێ.
دنووترین ڕاپۆرتا خۆدا ڕێكخراوا نەتەوێن ئێكگرتی دبێژیت: نوكە پلەیێن گەرما گۆیا زەمین 1,5 پلە ژئاستێ خۆ یێ ئاسایی بلندتر لێهاتییە، پێشبینی دهێتەكرن 2 پلەیان ژ ئاستێ خۆ یێ ئاسایی بلندتر ببیت.
نەتەوێن ئێكگرتی د ڕاپۆرتا خۆدا خۆیاكرییە، چالاكیێن مرۆڤان لسەر گۆیا زەمین، وەكو بەرهەمئینانا زۆرا دووەم ئوكسیدێ كاربۆن و گازێن ژەهراوی، دبنە ئەگەر پلەیێن گەرمێ لسەر ئەردی زێدەتر بلند ببن، ئەگەر ئەو بلندبوونە بەرەڤ دوو پلەیان بچیت، وی دەمی دئێكەم كاریگەریدا، دێ زێدەتر ژ 420 ملیون مرۆڤان رووی ب رووی مەترسییا پێلا توندا گەرما گۆیا زەمین بن.
د ڕاپۆرتا خۆدا نەتەوێن ئێكگرتی خۆیاكرییە، كاریگەریێن گوهرینا سەقای دێ بنە سەدەما پەیدابوونا برسێ و هەتا ساڵا 2050، دێ هژمارا وان كەسێن ژ نەبوونا خوارنێ دنالن، گەهنە 80 ملیون كەسا لسەرانسەری جیهانێ.
Comments are closed, but trackbacks and pingbacks are open.