((هاوردە كردنی چیڕۆك خەمی دوژمن بۆ گەلەكەم))

نووسینی: كەمال عەبدۆڵلا(كوردی)

دونیای سیاسەت جیهانێكی پڕ لە درۆ و دەلەسەیە و لەگەڵ ئەمەشدا هەندێ جار لێهاتوویی و توانای ئاستی درۆكردنی سیاسەتوان پێشان دەدات و زۆر جاریش گەمژەیی و نەزانینیان دەردەخات. زۆر جار بیستوومانە كە دەڵێن حكوومەت بە عەرەبانە كەروێشك دەگرێت، یان حكوومەت بە پەموو سەر دەبڕێت.
بەڵام ئایا حكوومەتی ژیر و هۆشمەندیشمان هەیە یان خود نا؟؟من یەك بە خۆم هیچ حكوومەتێكم نەبینیوە كە بە ڕاستی دادپەروەر و حاكمێكی باش بێت و ئەگەر شتێكیش دەكات بە ناوی دیموكراسی ئەوا دیسان هەمان ئەو فرت و فێلەیە كە بەناوی دیموكراسی ئەنجام دەدات بۆ ئەوەی بەرژەوەندیەكانی خۆی و یانیش لایەن و حیزبەكەی پی بگەیێنێت.
من لێرەدا نامەویت باسی سیاسەت و میاسەت بكەم چونكە كەم یا زۆر هەمووتان تا ڕادەیەك لە سیاسەت تێدەگەن و لە خواش بە زیاد بێت گەلێكی تەواو سیاسیمان هەیە و كەس وەكو ئێمە لە سیاسەت تێنەگەیشتووە لەوما حاڵ و ڕۆژمان لەو پەڕی باشی و خۆشگوزەرانی دایە، لێم ببوورن ئەگەر ئەم بابەتە تێكەڵ بە كۆمێدیا و گاڵتەجارییەوە دەكەم، چونكە ئەوەی بینیوم و مەبەستمە بۆتان بگیڕمەوە بەڕاستی لە گاڵتەجارییەك زیاتر نییە كە خەڵكی وەڵاتمی بە گەمژەیەكی تەواو لە قەلەم داوە، جا با سەرتان نەئیشێنم و مەبەستم و ئامانجەكەم بگەیینم، بۆیە گوێ لە چێڕۆكم بگرە.
” وەك هەمیشە دوای گەڕانەوە سەردانی هاوڕێ و برادەرێكم كرد لە ناو بازار كە خاەون پەڕاوگە و پەرتووكخانەیەكە و هاوڕێیەكی ڕۆشنبیری و ئەدیب و دڵسۆزی ئەم خاكەیە، دوای چاكو چوونی كردنمان چاوێكی بەسەر مێزەكەی بەردەم پەرتووكخانەكەیدا گێڕا كە جۆرەها پەرتووك و ڕۆژنامە و گۆڤاری لەسەر دانرابوو لە ناكاو چاوم بە كۆمەڵێ چیڕۆكی منداڵان كەوت كە پێموابوو تازە بە چاپ گەیشتوونە و بە لاچاوێك سەیریانم كرد و گوتم دڵێی پەرتووكی چیڕۆكی تازەی منداڵان بڵاوبووەتەوە؟؟؟ پێكەنی و گووت بەڵی بەس خۆماڵی نییە، قسەكەیم پێ سەیر بوو گووتم خۆماڵی؟؟؟!!! گووتی بەڵێ خۆماڵی نییە،هاوردە كراوە.
لێی تێندەگەیشتم و گووتم چیڕۆكی منداڵان ئەویش هاوردە كراو!!!،خۆ خۆمان بە هەزاران چیڕۆكی نەگووتراومان هەیە، بەسەدان نووسەرمان هەیە كە چیڕۆكیان نووسیوە و لە چەكمەچێ و دولاب و ڕەفەكانی ماڵیان وا خۆڵیان لەسەر دانیشتووە،بە سەدان وەرگێڕی باشمان هەیە كە شارەكارجیهانیەكان و چیڕۆكی هەرە باشی منداڵانیان وەرگێڕاوەتەوە سەر زمانی كوردی و لە سەر ڕەفەكانی ماڵەكەیاندا وا تۆزو خۆڵیان لەسەر دانیشتووە و زۆرێكیش بە ئاواتی چاپكردنی چیڕۆكەكانیان مەرگ دەرفەتیان پێنەدا و نەیانتوانی كتێبەكانیان لەسەر پێشخان و ڕەفە و قەفەزەكانی پەرتووكخانەكاندا ببینن.جا تۆ دەڵێی هاوردە كراوە؟؟؟ كە واتە مەبەستت ئەوەیە ئێمە قەیرانی ڕۆشنبیر و نووسەر و وەرگێڕا و چیڕۆكمان هەیە، كە واتە كەسمان نەماوە بۆ پەروەردەكردنی منداڵمان، بۆیە خەمی هاوردە كردنی چیڕۆكمان هەیە.
پڕ بە دڵ پێكەنی و گووتی خۆ ئەگەر قەیرانی ئەوانەمان نەبا هاوردە نەدەكرا و جا پێت وایە نرخی بە چەندە و بە چەند هاوردە كراوە؟؟؟ گووتم نازانم، دیسان پێكەنی گووتی بە دووسەد و پەنجا دەكڕین و بەپێنج سەد دەفرۆشین.
سەرم سووڕما چووم و یەكێكیانم هەڵگرت لەسەریانی نووسرا بوو” انتشارات ویهان” چاپی یەكەم زستانی 1399- نرخ 1000تمەن
تووشی شۆك بووم، لەم ساڵانەی قەیرانی پەرتووك و زیزبوونی كۆمەڵگا لە خوێندنەوەی پەرتووك و هەبوونی سوشیال میدیا و كونترۆڵی خەڵك بە هۆی تەكنۆلۆژیاوە، پڕۆژەی چیڕۆكی كوردی لە لایەن كۆماری بەناو ئیسلامی ئێرانەوە كوجا مەرحەبا،ئاخۆ دەبێ چ خەونێكیان بۆ ئێمە دیتبێت، دەبێ چ پیلانێكیان بۆ 15 بیست سالی داهاتووی منداڵەكانمان بینیبێت؟؟؟
ئەوەی ڕاستی بێت شەرمم لە خۆم و ڕۆشنبیری و زانایی خۆم كردەوە، خۆم و نووسەر و وەرگێڕەكانی وەڵاتی خۆم بە شیاوی زبلدان زانی كە لای دەسەڵاتی بەناو خەمخور و كورسی و پلە و پۆستدارەكانی وەڵاتم بایی فلسێكی سووتاو نرخمان نییە،شەرم و شوورەییم بە دەسەڵاتە كوردیەكەی خۆم هات كە تا ئەم ڕادەیە خەڵك و گەلەكەی سووك و ڕیسوا دەكات،ئاخر باشە یەعنی لەو هەموو بەر پرس و كاربەدەستە یەكێك نەبوو بڵێت بۆ دەبێت كلتوور و فەرهەنگی ئێران منداڵ و كۆمەڵگاكەم پەروەردە بكات،كێ ڕێگا بە هێنانی ئەم پڕۆژە نەگبەتیەكەی ئێرانی داوە، دەبێت وەزارەتی ڕۆشنبیری لە هەمبەر ئەم ئیهانەیە داوای لێبوردن لە نووسەر و ڕوناكبیرانی وەڵات بكات، دەبێت پێداچوونەوە بكات ئاخۆ كێ ڕێ بەمكارە و هاوردە كردنی داوە.
خۆ من نووسەر و وەرگێڕم و بە شایەتی هەموو ئەوانەی دەمناسن و هەڵسووكەوتیان لەگەڵمدا هەیە، دەزانن كە وا چەند كاری منداڵانم كردووە و ساڵانێكی ساڵە خوڵیان لەسەر دادەنیشێت و ئاوڕێكشیان لێ نەداینەوە،جا ئەمە ڕەوایە كە ئێمەی نووسەر كارەكانمان خوڵ و تۆز و خاشاك لەسەر بنیشێت و ئینجا حكوومەتە نازادرەكەمان چیڕۆكمان بۆ هاوردە بكات؟؟؟ خۆتان ناوبژیوانی بكەن.
بە بیرمە ساڵانێكی بەر ئێستا چەند شیعرە چیڕۆكی مامۆستای نووسەر و شاعیری بەناوبانگ خوالێخۆشبوو كاك مەرسوومم بە هاوكاری خودی ئەو بۆ تێسكت و دەقی فارسی وەرگێڕا كە بریتی بوون لە دە پەرتووكی منداڵان و مەبەستمان بوو لە وەڵاتی ئێران چاپ و بڵاویان بكەینەوە، دوای سەردانی كاك مەرسووم بۆ ئێران و بردنی وەرگێڕانەكان سەرەتا پێیان گووتبوو كە وا نابێت نازناوی نووسەر” كوردی” لەسەر پەرتووك بێت و ئینجا پەرتووكەكانیان بۆ وەزارەتی ئیرشادی ئیسلامی و بە مەبەستی بەراورد كردن بردبوون، دواتر گووتبوویان مادەم چیڕۆكەكان قورئانین پێویستە” حەوزەی عیلمیەی قوم” بڕیاری لەسەر بدات.لە كۆتاییدا گووتبوویان شێوازی ئەدەبیات و نووسینی ئەم پەرتووكانە نایاب و دەگمەن و لە ئێران تا ئێستا لەم ئاستەدا شت نەنووسراوە، بەڵام كە زانیبوویان وەرگێڕ خەڵكی دەرەوەی ئێرانە، بە تەواوی ڕەفزیان كردبووە و گووتووبوویان تا نووسەری ئێرانی هەبێت ناتوانین ڕێگە بدەین نووسەری بیانی پەرتووكی بڵاو ببێتەوە و پڕۆژەكەیان وەستاندبوو.
خۆ لە ڕاستیدا ئەمە یەكەم هەنگاوی بە فارسی كردنی نووسینەكانی نووسەرێكی كورد بوو بۆ زمانەكانی تر كە چی لەبەر ئەوەی نووسەری ئێرانی بەم كارە هەڵنەستابوو ئەوا پێیان شوورەیی بوو كە وا بیانییەك بۆیان بە فارسی بنووسێت.بەڵام ئا لێردەا دەبینین كە وا نووسەر و وەرگێری كورد هەم لە لایەن دەسەڵات و حكوومەتەوە و هەم لە لایەن خەڵكەكەوە بێ نرخ و بێ بەها كراوە و دەكرێت و ڕۆژ لە دوای ڕۆژیش بەهاو نرخەكەی كەمتر و كەمتر دەبێت و بێگومان دوژمنانی كورد باش لەم بێ نرخ و بەها بوونی ڕوشنبیر و نووسەر و هونەرمەندان تێگەیشتوونە و بۆیە دەرفەتیان قووستووتەوە بۆ ئەوەی لە ئەلف و بێیەوە دزە بكەنە ناو كلتوور و فەرهەنگەكەمان و بە پڕۆژەی منداڵانەوە هاتوونەتە پێش و خوا خۆی یارمەتیدەرمان بێت ئەگینا بەمجۆرە بەردەوام بین خوا دەزانێت بۆ 15 یان بیست ساڵی داهاتوو ئەو جیلەی بە پەرتووك و پەروەردەكردنی داڕێژەڕانی ئەم پڕۆژەیە گەورە دەبن چون خەون و خەیاڵەكانی كۆماری ئیسلامی دەهێنێنە دی و بە ئاسانی ئەم وەڵاتەیان دەدەنە دەست ئەوان.
بێ گومان ئەم مەسەلەیە زیاتری هەڵدەگرێت بەڵام من نامەوێت درێژەی پێبدەم و تووڕیی و گرژی دروست كەم و تەنیا لە كۆتاییدا دەلێم خۆ ئێمە هیچ شتێكمان لە خۆمان نییە. سەیری دەوروبەری خۆت بكە، هیچ شتێكی خۆمالی و هی خۆت نابینی هەموویان یان چینی، توركی و یانیش ئێرانین و خۆ هەواكەشت هی خۆت نییە و دەبینی كە چۆن توركیا دارەكانمان دەبڕێت بۆ ئەوەی بی ئاو و هەوامان بكات و ئیرانیش ڕووبارەكانمان لێ دەگرێتەوە بۆ ئەوەی هەناسەیەك بە ئاو و هەوایەكەی نەدەین، ئیجا مەهێلن ئەو دلووپە كلتوور و فەرهەنگە كوردییەش كە هەمان بیبەن،بە لانی كەمەوە مەهێلن منداڵی ئێستامان كە دەبێتە گەنج و هیوای داهاتوو دروشمی ” نە شەرقی، نە غەربی ، جمهوری ئیسلامی” بڵێتەوە و حاشا لە كورد بوونی خۆی بكات و بە مێژوو و كلتووری خۆی بیانی و نامۆ بێت.

((كوردی-2022)