بێى پێشه‌كى و ئينانا ناڤێن سكالاكه‌ران، دادگه‌ها فيدرالى يا بلند ل چارشه‌مبيێ رێكه‌فتى 25/1/2023 حوكمێ خۆ يێ ل دۆر هه‌لوه‌شاندنا ژماره‌يه‌كا بڕيارێن جڤاتا وه‌زيران يا فيدرالى يێن ل دۆر هنارتنا پاره‌يان بۆ كوردستانێ دا.
پاره ژ ’شايسته‌يان و مووچه‌يان’ پێكدهێن و ئه‌ڤ بڕگه‌يه د تێكستا به‌لگه‌نامه‌يه‌كا ژ دادگه‌هێ ده‌ركه‌فتى دا هاتيه و ل بن سيناهيا وێ دادگه‌هێ بڕيارا خۆ ده‌رئێخست، ژماره‌يێن بڕيارێن هاتينه هه‌لوه‌شاندنان ژى ژ (8 يا سالا 2022، 401 يا سالا 2021، 335 يا سالا 2021، 257 يا سالا 2021، 226 يا سالا 2021 و 194 يا سالا 2021) پێكدهێن.
چ بڕگه د ياسايێن ئيراقێ يێن كارپێكرى دا نينن كو رێكێ بده‌ته ئاليه‌كێ دادوه‌رى يان كارگێرى مووچه‌يێ فه‌رمانبه‌ره‌كێ بۆ پتر ژ 10 رۆژان ببڕيت ئه‌و ژى پشتى ده‌ستنيشانكرنا سه‌رپێچيا وى و ب ئاوايه‌كێ نڤيسكى.
هه‌روه‌سا ژماره‌يه‌كا سزايان بۆ فه‌رمانبه‌رى د حاله‌تێ به‌ندكرنا وى يان زيندانكرنا وى ل سه‌ر تاوانه‌كێ -هه‌ر چ جۆر بيت- كو بخوازيته به‌ندكرنێ يان زيندانكرنێ هه‌نه و چ تێكستێن ياسايى نينن كو رێكێ بده‌ته رێككه‌فتنێ ل سه‌ر مه‌رجه‌كێ هه‌ڤدژ ل گه‌ل ياسايێ.
ئه‌گه‌ر دادگه‌هێ بوونا رێككه‌فتنه‌كا كه‌ڤن دناڤبه‌را به‌غدا و كوردستانێ دا كو دهێته نويكرن و ل گۆره‌ى هنده‌ك ياسايان كو دبنه شه‌نگسته‌يێ سكالايێ كربيته بنيات، ئه‌گه‌ر حوكم ل دۆر شايسته‌يان ژى بيت ره‌نگه بنياته‌كێ بۆ ببينيت، لێ نابيت دادگه‌هـ داخوازێ ژ سكالاكه‌رى بۆ ژێكجوداكرنا سكالايا وى دناڤبه‌را رێككه‌فتنه‌كا سياسى و مافه‌كێ ياسايى يێ وه‌لاتيێن هه‌رێمێ ب وه‌رگرتنا شايسته‌يێن خۆ ژ مووچه و ده‌رماله‌يان دا نه‌كه‌ت، ئه‌ڤه د سكالايێ دا نه‌هاتيه، هه‌روه‌سا ئه‌سته‌مه د تێكسته‌كێ ياسايى دا هاتبيت كو فه‌رمانبه‌رێن هه‌رێمێ كاره‌كێ تاوانكارى كربن كو ببيته ئه‌گه‌رێ راوه‌ستاندنا دانا مووچه‌يێن وان.
رسته‌يه‌ك د سكالايێ دا هاتيه كو ره‌نگه ستوينا سه‌ره‌كى يا حوکمێ دادگه‌هێ بيت، ئه‌و ژى بڕيارا هه‌لوه‌شاندنا بڕيارا بلندترين ده‌ستهه‌لاتا بجهئينانێ يه و د رسته‌يێ دا شايسته و مووچه ب پێكڤه هاتينه و سكالاكه‌رى ئه‌ڤه وه‌ك مافه‌ك و به‌رژه‌وه‌نديه‌ك بۆ خۆ ديتيه ژ به‌ر كو د لژنه‌يه‌كا په‌رله‌مانى دا ئه‌ندامه، يا دروستتر ئه‌وه كو دادگه‌هێ نه‌هێلابا بابه‌تێ مووچه‌يێن فه‌رمانبه‌ران ببيته پشكه‌ك ژ هه‌ڤڕكيا ياسايى يا ل به‌ر سينگێ وێ، ب ڤێ چه‌ندێ وێ مافه‌كێ د شيان دايه داگيڕان بۆ بهێته كرن ل گه‌ل مافه‌كێ پاراستى يێ فه‌رمانبه‌رێن كوردستانێ تێكه‌لكريه، ل ده‌مه‌كێ، فه‌رمانبه‌رێن كوردستانێ په‌يوه‌ندى ب ناكۆكيان،
هه‌ڤڕكيا سياسى و گيرۆبوونا رێككه‌فتنێ ڤه نينه.
ئه‌گه‌ر بنياته‌كێ ياسايى بۆ هه‌لوه‌شاندنا بڕياره‌كێ ل سه‌ر بنواشێ هه‌ڤدژيا وێ ل گه‌ل ياسايا بودجه‌يێ هه‌بيت ژى و سكالاكه‌رى و دادگه‌هێ وه‌ك بنيات وه‌رگرتبن، ئه‌رێ چ بنياتێ ياسايى بۆ تێكه‌لكرنا بابه‌تێ مووچه‌يان ل گه‌ل سكالايێ و تێکەلکرنا هەلوەشاندنا بڕيارێن ل دۆر مافه‌كێ ناكۆكى ل سه‌ر و مافه‌كێ پاراستى هه‌يه؟
فازل ميرانى
و. ژ عه‌ره‌بى: گاڤ
Comments are closed, but trackbacks and pingbacks are open.