وه‌زاره‌تا به‌ره‌ڤانییا ئه‌مریكا راگه‌هاند، ژ چارچووڤێ هه‌ڤپه‌یمانییا نێڤده‌وله‌تییا دژى داعشێ، ئه‌مریكا و فینله‌ندا ل هێلسنگییا پایته‌ختێ وى وه‌لاتى كۆمبوون و به‌حسا هاریكاریكرنا عیراق و رۆژئاڤایێ كوردستانێ كر.
ئه‌ڤرۆ 17ى كانوونا ئێكێ یا 2022ێ وه‌زاره‌تا به‌ره‌ڤانییا ئه‌مریكا ( پێنتاگۆن ) دراگه‌هاندنه‌كێدا گوت: كۆمبوون ل رۆژا 14ى ئه‌ڤێ هه‌یڤێ برێڤه‌چوو، پشكدارێن كۆمبوونێ گوتوبێژا كه‌مپینه‌یا ده‌ركرنا داعشێ ژ عیراق و سووریا كر و به‌حسا زێده‌كرنا هاریكارییێن مرۆڤى و سه‌قامگیركرنا ئه‌وان ده‌ڤه‌رێن ل باكوورێ رۆژهه‌لاتا سووریێ و عیراقێ ژ ده‌ستێ داعشێ قورتالبووین كر.
وه‌زارتا به‌ره‌ڤانییا ئه‌مریكا ئاماژه ب هندێ ژیدا، هه‌ردوو لایان به‌حسێ پێدڤییا ڤه‌گه‌راندنا ئه‌ندامێن داعشێ بۆ وه‌لاتێن وان و ره‌وشا ئاواره‌یێن رۆژئاڤایێ كوردستانێ كر.
ژبلى هندێ وه‌كو پێنتاگۆن دبێژیت: هه‌ڤپه‌یمانییا نێڤده‌وله‌تى هه‌لسه‌نگاندن بۆ چه‌وانییا هه‌ماهه‌نگییێ ل بابه‌تێ رووبرووبوونا داعشێن ل باژێرێ خوراسانا ئه‌فغانستانێ هه‌ین كر، دهه‌مان ده‌مدا به‌حس ل گه‌فێن رێكخراوێن تیرۆرستییێن ناڤه‌راستا باشوورێ ئاسیا و سه‌رانسه‌رى جیهانێ كر.
هه‌ڤپه‌یمانییا نێڤده‌وله‌تى ل هه‌یڤا ئه‌یلوولا سالا 2014ێ بۆ رووبرووبوون و شكاندنا تیرۆرستێن داعشێ هاتبوو دامه‌زراندن، كو ژ 85 وه‌لاتێن سه‌رانسه‌رى جیهانێ پێكدهێت، و ژلایێ مرۆڤى، له‌شكه‌رى، دارایڤه هاریكارییان پێشكێشى ئه‌وان ده‌ڤه‌ران دكه‌ت یێن كه‌ڤتینه به‌ر گه‌فێن داعشێ، و هێزێن پێشمه‌رگه‌یێ كوردستانێ و هێزێن سووریا دیموكرات هه‌سه‌ده به‌شه‌ك ژ ئه‌وێ هه‌ڤپه‌یمانێ نه.
Comments are closed, but trackbacks and pingbacks are open.