هه‌ڤپه‌یمان: بۆ گه‌شه و پێشكه‌فتنا زێده‌تر یا چاكسازیێ دێ به‌رده‌وام پشته‌ڤانییا وه‌زاره‌تا پێشمه‌رگه‌یی كه‌ین
د كۆمبوونه‌كێ دا، ب ئاماده‌بوونا شیره‌تكارێن بلند یێن هه‌ڤپه‌یمانان، پرسا چاكسازی و داوی پێشكه‌فتنێن وه‌زاره‌تا پێشمه‌رگه‌یی و به‌رده‌وامیدان ب پڕۆسا خانه‌نشینیێ و پله بلند كرنا ئه‌فسه‌ران، ل گه‌ل فه‌رمانگه‌ها هه‌ماهه‌نگی و دویڤچوونێ ل جڤاتا وه‌زیران چه‌ندین دانوستاندن ئه‌نجامدان.
ئه‌ڤرۆ” د كۆمبوونه‌كێ دا ل دیوانا وه‌زاره‌تا پێشمه‌رگه‌یی، ب ئاماده‌بوونا شۆڕش ئیسماعیل، وه‌زیرێ پێشمه‌رگه‌یی و د. عه‌بدولحه‌كیم خه‌سرۆ، سه‌رۆكێ فه‌رمانگه‌ها هه‌ماهه‌نگی و دویڤچوونێ ل جڤاتا وه‌زیران و سه‌ربه‌ست له‌زگین، بریكارێ وه‌زاره‌تێ و كۆلۆنێل دۆگلاس و كۆلۆنێل پاول و كۆلۆنێل ده‌یڤد، شیره‌تكارێن بلند یێن ئه‌مریكا و هۆله‌ندا و بریتانیا یێن هه‌ڤپه‌یمانییا نێڤده‌وڵه‌تی و بۆردێ بلند یێ چاكسازیێ ل وه‌زاره‌تا پێشمه‌رگه‌یی و تیمێ دیڤچوونێ ل سه‌رۆكاتییا جڤاتا وه‌زیران، گاڤێن نوكه یێن چاكسازیێ و ئه‌و ئاسته‌نگێن دكه‌ڤنه ل پێشییا وان گوتۆبێژ كرن.
وه‌زیرێ پێشمه‌رگه‌یی، دووپات كر كو پڕۆسا خانه‌نیشینیێ دێ به‌رده‌وام بیت و بزاڤێن وه‌زاره‌تێ بۆ ته‌مامكرنا دۆسییه و خشتێ پله بلندكرنا ئه‌فسه‌ران ته‌مام بوویه و چاڤه‌رێی ڤه‌گه‌ریانێنه ژ جڤاتا وه‌زیران.
شیره‌تكارێن هه‌ڤپه‌یمانان دیار كر: ئه‌و دلخۆشن ب پێشكه‌فتنێن پێشمه‌رگه‌یی و پشته‌ڤانییا وان دێ یا به‌رده‌وام بیت بۆ وەزارەتا پێشمەرگه‌یی و ب ڤی چه‌ندێ دێ پڕۆژێن باشتر یێن له‌شكه‌ری بۆ هێزێن پێشمەرگەیی بجهـ ئینن و بزاڤێن وان ژی ژ پێخه‌مه‌ت بجهئینانا ئارمانج و ناڤه‌رۆكا رێفۆرما چاكسازییا سه‌ربازییه بۆ دروستكرنا هێزه‌كا ئێكگرتی و سه‌رده‌میانه.
Comments are closed, but trackbacks and pingbacks are open.