هێرشێن موشەکی و بێ دەنگیا ئەمریکا

هێرشێن موشەکی و بێ دەنگیا ئەمریکا

نازی محەمەدشەریف،زێ بادینان .

ئەڤە چەندین جاران ژ ئالێ گرۆپێن چەکدارڤە ل عیراقێ هێرشێن موشەکی دکەنە سەر هەڤلێرا پایتەخت و بنگەهێن ئەمریکی ل عیراقێ و هەتا نها ئەمریکا هیج بەرسڤەکا جدی نەبوویە کو دئاستێ بەرسڤدانێ بیت، و ئەڤە ژی چەندین بابەت و پسیارا دئازرینیت.
ئیک ژ وان بابەتێن سەرەکی کو دبیتە جهێ پسیارێ، ئەرێ ئەمریکا هەتا چ ئاست یا بەرهەڤە قوربانیا بدەت پێخەمەت بەرژوەندیێن خۆ ل عیراقێ کو ل عیراقێ بمینیت.
د سیاسەتا دەرەکیدا بەرژوەندیا دەولەتێ بەری تشتەکی دهێت و هەر دەولەتەک ل گورەی بەرژوەندیا خو ،سیاسەتا دەرکی دادرێژیت و کار دکەت.
لەورا ئەمریکا ژی لگورەی بەرژوەندیت خو کار دکەت، لێ پسیار ئەوە کا ئەمریکا نها هەتا چ ئاست شیان هەنە کو بەرژوەندیت خۆ پاریزیت و وان ئارمانجێن ل عیراقێ هەی ب دەستڤە بینیت.
چونکی عیراق نها هەتا ئاستەکێ باش یا کونترول کریە ژ ئالێ ئیرانێ ڤە و ئەمریکا نەشیا پشتی ژناڤ برنا سەدام عیراقێ کونترول بکەت و رۆژ بۆ رۆژێ زێدەتر گڤاشتن یێن ل ئەمریکا دهێنە کرن کو عیراقێ چول بکەت.
ئەڤرۆ ئیران وەک پشتەڤانەکا سەرکی ژبۆ دژاتیا ئەمریکا دهێتە هەژمارتن کو ب ئاشکەرا دژی بەرژوەندیێن ئەمریکا ل هەمی دەڤەرێ کار دکەت، نمونە پشتەڤانیا حزب اللە لبنانی و حوسیا و گرۆرپێن سوری و عیراقی دکەت و هەتا نها ئەمریکا نکاریە ڤێ پشتەڤانیا ئیرانێ بۆ ڤان گروپا راگریت، بەلکو ئیران یا بەردەوامە و ئەمریکا ژی یا بێ دەنگە.

ئەرێ ئەڤ سناریویا ل ئەفغانستانێ دێ ل عیراقێ ژی دووبارە بیت کو ئەمریکا پشتی چەندین سالا ژ ئازادکرنا ئەفغانستانێ ژ هێزێن تالبان ئەڤرۆ جارەکا دیتر ئەمریکا ئەفغانستان ب جی هێلا و دووبارە تالبان یا دبیتە خودان دەستهەلات.
ئەڤ رویدانێن ل ئەفغانستانێ چێبووی، دێ زێدەتر دژبەرێن ئەمریکی و گروپێن عیراقی یێن دژی ئەمریکا دلخوش کەن و ئەکتیف کەن کو پتر کارو چالاکیا دژی ئەمریکا ل عیراقێ ئەنجامبدەن و ئەمریکا نەچاربکەن کو عیراقێ چول بکەن ودویر نینە دئەنجامدا ئەمریکا خۆ ژ عیراقێ ژی ڤەکێشیت و عیراق بکەڤیتە دەست قەدەرەکا نەدیار و ببیتە دەپێ شانوویێ بو هێزین ناڤخۆی و هەرێمی و پروژێ ئەمریکی ل عیراقێ ب دیماهیک بهێت.

هەروەسا مگرتیا دوویێ ئەگەر ئەمریکا عیراقێ چوول نەکەت، پێدڤیە دربەکا کوژەک ل ڤان گروپێن موشەک هاڤێژ و ژێدەرێن پشتەڤانیا وان دکەن بدەت و بشیێت بڤی رەنگی ڤان گروپا بێ دەنگ بکەت و هێزێن خۆ بەرفرەتر بکەت و پرچەکتر بکەت.
هەروەسا هەرێما کوردستانێ ژی بەردەوام یا تێتە موشەک بارانکرن،جونکی کورد ئیکەم مللەتن ل دەڤەرێ کو پشتەڤانیێ ل ئەمریکا دکەن و دخازن ل دەڤەرێ بمینن، چونکی نەمانا هێزیێن ئەمریکی ل دەڤەرێ زەرەمەندێن ئێکێ و سەرەکی کوردن.
لەورا فەرە کورد خۆ بۆ ڤێ سناریویێ بەرهەڤ بکەن و ئەوێ مگرتیێ ب داننە پێش چاڤێت خۆ کو ئەگەرا هندێ هەیە کو مینا ئەفغانستانێ ئەمریکا هێزێن خۆ ل عیراقێ ژی ڤەکێشیت و عیراق بەرەف شەرێ ناڤخۆی و وێرانیێ بچیت،لەورا یا گرنگە کو کورد زێدەتر ناڤ مالیا خۆ ئاڤا بکەن و ئیدارەکا ئیک گرتی و لەشکرەکێ ئیکگرتی ئاڤا بکەن و بنەمایێن دیموکراسی و دادپەروەریێ بهێز بکەن و یاسا و حکومەتێ بهێز بکەن و خۆ بەرهەڤ بکەن بۆ هەر رویدانەکێ ل عیراقێ.

 نازی محەمەدشەریف