هەستا نەتەویی بەری سەرهەلدانێ و پشتی سەرهەلدانێ و ئاڤاکرنا دەولەتێ

هەستا نەتەویی بەری سەرهەلدانێ و پشتی سەرهەلدانێ و ئاڤاکرنا دەولەتێ.

نازی محەمەد شەریف

جارێ پسیار ئەوە ئەرێ ئەم وەک کورد نەتەوینە یان نە؟
دەولەتا نەتەویی گرنگترین یەکەیا ژیانا سیاسیە د جیهانا مودێرندا.
لسەر دەمێ کەڤن ئمبراتوری و قبیلە و باژێرێن دەولەت یەکەیێن گرنگێن ژیانا سیاسی بوون.
نەتەوە لبەرامبەری تێگەهێن مینا باژێر و قبیلێ وەک یەکەیەکا سیاسی، تێگەهەکێ ئالۆزترە و لدۆر رەگەزێن پێکهینەرێن وێ بیروبۆچوونێن جودا جودا یێن هەین. هندک زانایا رەگەزێن کو نەتەوەی پێکدئینن بڤی رەنگی دیار کرینە وەکی کەلتور و زمانێ هەڤپشک و دیروکەکا هەڤپشک و …
هندەکێن دیتر دبێژن مللەت ئەوە کو د رێکخراوەکا سیاسیدا بیت. مللەت کومەکا خەلکیە لژێر حکومەتا یاسایەکێ بژیتن، لەورا چێبوونا مللەتی پێدڤی ب هەبووبا دەولەتێیە.
لەورا لدویف ڤێ بوچوونا دبێژیت ئەو مللەتێن چ دەولەت نەبن، ئەو نەمللەتن.ئەم کورد نەمللەتین و ژبۆ هندێ ئەم ژی ببینە مللەت پێدڤیە مە ژی وەک کورد دەولەتەک هەبیت.
ئەگەر دەستهەلات و حکومەت و دەولەتێن کەڤن بتنێ ئارمانجا وان پارستنا جان و مالێ مللەتی بیت،
لێ نها ئەرکێ دەولەتێ زور بەرفرەتر لێ هاتیە ژ سەردەمێن کەڤن و نها ئەمن و ئاسایش و ئەرک و ماف و خزمەتگوزاری و خوشگوزەرانی و عزت نفس و … هەمی ژ ئەرکێن دەولەتانە، ئەڤرۆ ئەو مللەتێن بێ دەولەت هیچ بهایەکێ خۆ نینەو زور ب ئاسانی زولم و ستەم گەل دهێتەکرن و هەمی جیهان ژی بێ دەنگ دمینیت.
لەورا گرنگە ئەڤرۆ زۆر گرنگی ب خەباتا نەتەوایەتی و بیاڤێ نەتەویی بهێتە دان و بەرفرە ببیت و پیڤەرێ سەرەکی یێ مللەتی بۆ هەلسەنگاندنا کارو چالاکیێن هەر پارت و لایەنێن سیاسی، بابەتێ نەتەویی بیت و مللەت پتر گرنگیێ ب بیاڤێ نەتەویی بدەت، هەتا ئەڤ مللەتە ژ ئالێ نەتەویی ڤە ئازاد وسەبخۆنەبیت و نە ببیتە خۆدان دەولەت، هەم ژ ئالێ دەرکی وهەم ناڤخۆی ڤە دێ زولم و ستەم لێ هێتەکرن، و ئەم یێ دبینین کو رۆژانە زولم و ستەم یا ل مللەتێ مە دهێتە کرن و بتنێ ژبەر نەبوونا دەولەتێ یە، لەورا فەرە ئەڤرۆ مللەت زێدەتر یێ هشیار بیت و خۆ رەوشەنبیر بکەت و مافێن خۆ بزانیت و نەگرنگە ل گەل کیژ لایەنێ سیاسی و پارتا سیاسی بی چ علمانی بیت یان ئیسلامی یان گرنگ ئەوە کو ئەو پارتا تو ل گەل پتر گرنگیێ ب بابەتێ نەتەوی و دەولەت بوونێ بدەت، چونکی هەبوونا دەولەتێ پەرچانێ سەرەکی و ئیکانە یێ کو مللەتان د پارێزیت ژ هەر زولم و ستەم و داگیرکاریەکێ.

لێ پسیارا سەرەکی ئەڤەیە ئەرێ هەستا نەتەوایەتی نها د چ ئاست دایە،
ئەرێ دێ چەوا هەستا نەتەوایەتی ل جەم من پەیدا بیت و بهێز کەڤیت، دەمێ ئەز وەک پێشمەرگە شەڤ و روژ بەرەڤانیێ ل ڤی وەلاتی بکەم بجان و مالێ خۆ، لێ هندەک کەس خو ئیک روژ خزمەتا ڤی ولاتی نەکری ب خۆشیێن ڤی ولاتی شاد ببن و بنتێ نەخوشی بەهرا من بیت و هزار میناکێن بڤی رەنگی.
رەنگە ئەگەر ئەم سەحا هزرا نەتەوایەتی بکەین بەری سەرهەلدانێ و پشتی سەرهەلدانێ، دوو بەرسڤ و میناکێن زور ژ هەڤ جودا پەیدا ببن.
براستی بەری سەرهەلدانێ بێ گومان هزرا نەتەویی زۆر بهێزتر و خورتر بوویە، هەر کەسەکی ب دلسوزی و ب مال و جانێ خۆ خەبات و قوربانی دایە و زۆر یێ دل شاد ژی بوویە ب خەباتا خۆ.
◦ لێ پشتی سەرهەلدانێ هەستا نەتەوایەتی هەتا ئاستەکێ زور لاواز بوویە، ئەوژی ژبەر وی شێوازێ حوکمرانیا ڤان پارت و کەسایەتی و لایەنێن سیاسی یێن کو نە دئاستێ داخازی و ئارمانج و قوربانیدانێن ڤی مللەتی بووینە،بەلکو زێدەتر گرنگی ب کورسیک و بەرژوەندیێن حزبی و کەسوکی دایە، و ئارماجا سەرەکی کو دەولەت بوون و خزمەتگوزاری و خوشگوزاریا مللەتی بیە ژبیر کریە، تایبەت ئەڤ گەندلیا هەی د هەمی بیاڤادا روحا نەتەوی لاواز کریە، چونکی دەمێ ئەو سەرکردێ شورەشگێرئ دهی د چەپەرێ خەباتیدا پشت بدەتە مللەتی و ئارمانجێن نەتەوایەتی، و بەرف خو دەولەمندکرنێ بچیت و برێکێن نە ئاسایی و یاسایی خۆ دەلەمەند بکەت لسەر حسابا خەباتا شورەشگێریێ و ببیتە ملیونێر لسەر کیستێ هەژارا، و هەتا بگەهیتە ئاستەکی هندەک ژ وان سەرکردا هێچ هێلەکا سور نەهێلن و هەمی کارەکی بکەن ژ پێخەمەت کورسیک و بەرژوەندیا خۆ بگرە ژ هەمی جورێن گەندەلیێ هەتا د گەهیتە وەلات فروشیێ، ڤی دەمی هیج رامانەک نامینیت بۆ هەستا نەتەوایەتی و خەباتا نەتەوی.
لەورا یا فەرە هەموو پارت و لایەنێن سیاسی پێداچوونەکێ ب کارێ خو یێ حزبی و سیاسی و ئیداری بکەن و بلا چ دیتر ئەم نەبینە دیڤەلانک بۆ ولاتێن داگیر کەر و دەم یێ هاتی کو ئەم پیڤەرێن نەتەوایەتی بلند بکەین و ببیتە کارێ هەرە سەرەکی بۆ هەر لایەنەکێ سیاسی بتایبەت پارتی زێدەتر لسەر ڤی بیاڤی کار بکەت وەک پارەتەکا کو زێدەتر ژ هەر پارتەکا دیتر یا کوردستانی بەرچەسپا نەتەوایەتی پێڤە دیارە و خودانێ مەزنترین کوتلا پەرلەمانی و جەماوەریە ل کوردستانێ و ئەز باوەرم پارتی دکاریت سەرکێشیا زۆر پروژێن ستراتیژی یێن نەتەوایەتی بکەت مینا ریفراندومێ.
مە ئەڤرۆ پێدڤی ب هەبوونا سەروک و سەرکێشەکی هەیە کو سالوخەت و تایبەتمەندیێن مینا سەروک گاندی و ماندلای هەبن کو مە ژ بن دەستی و داگیرکاريێ قورتال بکەت کو سەروک بارزانی نێزیکترین سەرکردێ کوردە بۆ هەبوونا ڤان سالوخەت و تایبەتمەندیا ، بتنێ پێدڤی ب ئیرادەکا زێدەتر هەیە ژبۆ هندێ ببیتە سەرکردەکێ نەتەوی و ژبلی کو سەروکاتیا پارتی بکەت، پرانییا خەلکێ کوردستانێ ب هەمی پارت و لایەنێن سیاسیڤە و ئایدلوژیێن ژ هەڤ جودا ب سەروکێ خۆ بزانن، چونکی ئەڤرو کوردستانێ پیدڤی یا سەروکی هەی کو دئاستێ کوردستانێ دا بیت.
ئەڤرۆ مللەتێ مە بتنێ لژێر سیبەرا دەولەتا کوردی دێ ژ ئەنفالکرن و قرکرنێ و تالانکرنێ و داگیرکاریێ قورتال بیت، ئەگەر ئەم خۆ چئنەکەین فەرە چاڤێ مە ل رەحم و دلوڤانیا دەولەتێن داگیرکار بیت و چاڤەرێ هەر داگیر کاری و زولم و ستەمەکێ بین.

نازی محمدشریف