واشنتن داخوازا ناڤبەینکاریا لایەنێ سێیێ و چوارچوڤەکێ یاسای بۆ چارەسەریا کێشەیێن نەفت و گازێ دناڤبەرا هەولێر و بەغدا دا دکەت
هاریکارا وەزیرێ دەرڤە یێ ئەمریکا بۆ کاروبارێن رۆژهەلاتا نێزیک، بار برا لیڤ راگەهاند، پشتی بڕیارا دادگەها فیدرالی دەربارەی گرێبەستێن نەفتێ یێن هەرێما کوردستانێ، ئەمریکا چ دەستوەردانا ناکەت و د وێ باوەریێ دایە، پێدڤیە لایەنێ سێیێ ناڤبەینکاریێ دناڤبەرا هەولێرێ و بەغدا دا بکەت و بڕیارا دادگەها فیدرالی دێ رەوشا عیراقێ بەرەڤ خرابتر بەت.
مەها شوباتا دەربازبووی، دادگەها بلندا فیدرالی یا عیراقێ، د بڕیارەکێ دا گرێبەستێن نەفتێ یێن هەرێما کوردستانێ ب نە یاسای ل قەلەمدان و دەقێ یاسایا نەفت و گازێ یا هەرێما کوردستانێ ب دژی دەستوورێ عیراقێ دیارکر.
د بەرامبەر دا، سەرۆکاتیا هەرێمێ، پەرلەمان، حکومەت و جڤاتا بلند یا دادوەری یا هەرێما کوردستانێ بڕیارا دادگەها بلند یا فیدرالی ب سیاسی وەسکر و دوپاتی لسەر دەستووری بوونا یاسا نەفت و گازێ یا هەرێما کوردستانێ کر.
باربرا لیڤ، د داخویانیەکا رۆژنامەڤانی دا دەربارەی پرسیارەکێ لدوور پرسا نەفت و گازا هەرێمێ و بڕیارا دادگەها فیدرالی راگەهاند، د سەرەدانا خۆ یا ڤێ مەهێ دا بۆ بەغدا و هەولێرێ، پێشنیار کرییە، هەردوو لایەنێن ناکوک، هەولێر و بەغدا ب ناڤبەینکاریا لایەنێ سێیێ دەست ب دانوستاندنان بکەن.
گوت ژی: ” ئەوا من پێشنیار کری، ئەوە کو هەولێر و بەغدا رێکارێن پێدڤی بگرنە بەر ژ بۆ هندێ ب ناڤبەرینکاریا لایەنێ سێیێ کا وان کی پێباشە، دانوستاندنان بکەن و دەرفەتێ بۆ دانوستاندنان لسەر وێ پرسێ دروستبکەن.”
دوپاتكر، چاره‌سه‌ریا وێ ئاریشێ گەلەک ڤەکێشایە و چاڤەرێبوونەکا زێدە ل دووڤدا هاتیە و پێدڤیە ئەو پرسە بهێتە چارەسەرکرن و دەرئەنجامەکێ یاسای بۆ بهێتە دیتن و بابەتی پێدڤی ب هەبوونا یاسایەکا تایبەت ب نەفت و گازێ هەیە بۆ چارەسەرکرنا ئاریشان.
دیارکر، د وێ باوەرێ دایە پەیاما وێ ب باشی یا گەهشتیە هەولێر و بەغدا و گوت: ” پشتراستم سەرکردێن سیاسی یێن عیراقێێ ل هەولێر و بەغدا دێ شێن میکانزمەکا نوو بۆ دانوستاندنان دەربارەی وێ پرسێ بینن، ئەڤجا ب رێیا ناڤبەینکارییا فەرمی بیت یان ئەو ب خۆ و راستەوخۆ دەست ب دانوستاندنان بکەن.”
هاریکارا وەزیرێ دەرڤە یێ ئەمریکا بۆ کاروبارێن رۆژهەلاتا نێزیک، باربرا لیڤ ئاشکرا کر، ئەمریکا چ هەلویستەکێ یاسای و دەستووری دەربارەی وێ بڕیارا دادگەها فیدرالی دیار ناکەت، بەلێ ئەو بڕیارە رەوشا عیراقێ باشتر ناکەت.
Comments are closed, but trackbacks and pingbacks are open.