وەزارەتا پەروەردەیا حکومەتا ھەرێمێ رادگەھینیت، پشتی وەرزێ ئێکێ یێ خواندنا خویندکاران ب دوماھی دھێت، دوو مەھان دێ وەک بھێنڤەدان وەگرن و ل دەسپێکا مەھا ئەیلولێ وەرزێ دووێ یێ خواندنێ دێ دەسپێکەت.
سەیوان عەلی، بریکارێ وەزارەتا پەروەردەیا حکومەتا ھەرێما کوردستانێ راگەھاند: د بەرنامەیێ وەزارەتا پەروەردەیێ دا نینە ب ئێک وەرز دوماھیێ ب پرۆسەیا خواندنێ بئینیت و وەرزێ ئێکێ یێ خواندنێ ھەتا دەسپێکا مەھا تیرمەھا ئەڤ ساڵە دێ بەردەوامبیتن و پشتی ب دوماھی ھاتنا وەرزێ ئێکێ و ئەنجامدانا تاقیکرنان خویندکار دێ دوو مەھێن بھێنڤەدانێ وەرگرن و پشتی بھێنڤەدانێ ژی راستەوخۆ پرۆسەیا وەرزێ دووێ یا خواندنێ ل رۆژا ئێکێ ئەیلولێ دێ دەسپێکەت ھەتا ١٦-١١-٢٠٢١ دێ بەردەوامبیت.
ھەروەسا ئاماژە ب وێ چەندێ ژی دا،” وەزارەتا پەروەردێ دێ بڕیارێن لیژنا بلندا روویبرووی بوونا کۆڕۆنایێ جێبەجێکەتن، ژ پێخەمەت سڵامەتیا گیانێ خویندکارانە ئەگەر ئەوشا کۆڕۆنایێ بەرەڤ خرابتر بچیت، بۆ تمامکرنا پرۆسەیا خواندنێ دێ پشت ب خواندنا ئەلکترۆنی گەرمکەیین ژبەرکو ئارمانجا وەزارەتا پەروەردێ سەرئێخستنا پرۆسەیا خواندنێ یە”.
بریارە ل رۆژا ١٠ێ نیسانێ لیژنا بلندا روویبرووی بوونا کۆڕۆنایێ جارەکا دی کومببیت و پشتی ھەڵسەنگاندنا مەترسیێن پەیژیکا کۆڕۆنایێ دێ بڕیارێن نوی سەیارەت خۆ پاراستنێ و دەسپێکرنا پرۆسەیا خواندنێ دەتن.
Comments are closed, but trackbacks and pingbacks are open.