وەلاتی رۆژێ

دلڤین خەلەف

لڤی سەردەمی تەنگاڤ و ڤێ رەوشا هەستیار کو کوردستان و دەڤەر بگشتی پێرە دەرباس دبێ پێدڤیە ل سەر هەر کوردەكی خودان وژدان و خەمخۆرێ وەلاتێ خۆ ئەڤێ پرسیارێ ب دلسۆزی بکەت گەلۆ کەنگی وێ نەحەز و خۆفرۆشێن گەلێ مە شەرمێ ژ خۆ کەن ل سەر رەفتارێن خۆ یێن قرێژ ئەوێن ل دژی مللەتێ خۆ بکار دهینن و هەولێن تێکدانا ڤی وەلاتێ خوەش و رەنگین دکەن و کەنگی وێ زانبن ئیرادا ب هێز یا سەرکردایەتیا پارتی و سیاسەتا سەرکەفتی یا جەنابێ سەرۆك بارزانی بتنێ زامنێ ئارامی و پێشکەفتنا کوردستانەکا ئازادە و هەر ئەون ڤی مللەتی بەرەو قوناغەکا هیمن و سەردەم دبەن و هەر ئەون وەلاتێ مە ئاڤەدان دکەن و ناهێلن دوژمن و نەیارێن گەلێ مە بدەستێن خۆ یێن قرێژ ئازادیا بخوینا هەزاران شەهیدێن قەهرەمان هاتیە پێش وێران و پوچەل بکەن، ما وێ کەنگی خوە فرۆش دەست ژ تێکدانا رەوشا کوردستانێ بەردەن و هێلن ئەڤ خەلکە ب ئازادی هزر ل چارەنڤیسێ خۆ بکەت و ما ئەوان چی ئەگەر هەنە ژبلی کو بووینە کۆلە و خزمەتا دوژمنێ ڤی مللەتی دکەن هەتا ئەڤان پیلانێن خراب ل پێشیا ئازادیا ڤی وەلاتی دروست دکەن، ئەرێ هەتا کەنگی وێ چاڤێن خوە فرۆشان ل چەنیکێن نانێ دوژمنێ ڤی گەلی بێ ما دەم نەهاتیە لخوە ڤەگەرن، گەلۆ چما ئەو نکارن نانەکی ب سەربلندی بخۆن و بدەنە زارۆکێن خوە، ما نە بەسە خزمەتا دوژمنا و داربەدەستی و کۆلەداری، ما دەم نەهاتیە مێشکێ خۆ بدەنە کاری و وژدانێ خوە زەلال بکەن و هزر د هەبوونا ژیانەکا سەرفەراز و وەلاتەکی ئازاد دە بکەن، ما وێ کەنگی هزر ژبۆ پاشەرحژا زارۆك و نەڤیێن خوە بکەن و لاپەرەکی پاك و سپی ژبۆ پێشهاتیێ وان ڤەکەن، گەلۆ ما ئەو نزانن ڤەخوارنا فڕەکە ژ ئاڤا ئازادیێ ب سەرەکی بلند بەرامبەر دەریایەکا هنگڤینێ ب سەرشۆریە کو دکەڤە سەر زمانێ هەر مرۆڤەکی خودان بیرو باوەر.
هەر ژ دەستپێکا هەبوونا مرۆڤایەتیێ و هەتا نها هەموو گەلێن لسەر رویێ ڤێ ئەردێ داخوازا ژیانەکا ئارام و دوور ژ کێشە و ئاریشا دکەن و هەر وەکە ئەوان هەموویان ئەڤرۆ مللەتێ کورد ژی داخوازا تیشکێن ئازادیەکا بێ سنور و بسەرفەرازی د وەلاتەکی سەربەست و کۆمەلگەهەکا ئاشتیخواز ب هەموو پێکهاتە و ئۆل وئاینین خوەڤە دکەت و داخوازا ژیانەکا گەش و ئارام د کوردستانەکا رۆناك و سەربەخوە و سەقامگیر دا دکەت.
مللەتێ کورد بهیڤینە ل دەمەکی نێزیك و لژیر سیاسەتا راستەقینە یا جەنابێ سەرۆك بارزانی ب ئازادیا کوردستانەکا ئارام وێ شادبە و هەموو کۆلەدار ودوژمن و نەیارێن وەلاتێ مە وێ روورەش شەرمەزار مینن و کەڤنە بەر نفرەتێن دیرۆکێ. هەر بژی کورد و بژی کوردستان.

دلڤین خەلەف/
ئەنداما سکرتاریەتا ئێکەتیا ئافرەتێن کوردستانێ