پارتى و خه‌لك یان بارزانى و خه‌لك

غیاس خالد زێبارى

پارتى دیموكراتى كوردستان و په‌یڤا بارزانى پێكڤه‌ هاتینه‌ گرێدان، ئه‌ڤه‌ ژى ژ ئه‌نجامێ دامه‌زراندنا وێ یه‌ لسه‌ر ده‌ستێ رێبه‌رێ رۆحى و كنیاتیێ نه‌ته‌وا كورد و كاریگه‌رترین كه‌سایه‌تیێ سیاسى و جڤاكیێ كورد و كوردستانى و رێبه‌رێ مه‌زنترین شۆره‌شێن كوردستانى مه‌لا مسته‌فاى بارزانى ئانكۆ ( بارزانیێ نه‌مر ) ، ئه‌و پارتیا ب رێنمایى و چاڤدێریا جه‌نابێ وى لسه‌ر رێبازا پیرۆزا بارزانى ئه‌و رێبازا به‌رى زێده‌تر ل سه‌د و پێنجى سالا لسه‌ر ده‌ستێ پێشه‌وایێن بارزان ده‌ست ب خه‌باتا نه‌ته‌وى و نشتیمانى و جڤاكى كرى ژ پێخه‌مه‌ت ئازادى و رزگاریا كورد و كوردستانیا .
راستگۆیى و دادوه‌رى و ده‌ستپاكیا رێبازا بارزانى ل سه‌رپه‌رشتیكرنا شۆره‌شا و رێڤه‌برنه‌كا ساخله‌م ئه‌گه‌رێن كۆم كۆم په‌یوه‌ندیكرنا خه‌لكى بۆ ب شۆره‌شێ و رازیبوون ب ده‌ستهه‌لات و سیاسه‌ت و به‌رنامه‌ و ستراتیژیه‌تا پارتى دیموكراتى كوردستان بۆ سه‌رده‌م و پاشه‌رۆژا كوردستانێ .
هه‌بوونا پارتى دیموكراتى كوردستان ژى ئامرازه‌ك بوویه‌ بۆ رێكخستنا شۆره‌شێ و رێڤه‌برنێ لسه‌ر بنه‌مایێن رێبازا بارزانى ، پشتى وه‌غه‌را بارزانى نه‌مر سه‌رۆك مه‌سعوود بارزانى ژ بلى كو وه‌كى سه‌رۆكێ پارتى هاته‌ هه‌لبژاردن ، وه‌كى پێشه‌وایێ رێبازا بارزانى جهێ بارزانى نه‌مر گرت و به‌رده‌وامى دا رێبازا بارزانى و لسه‌ر ده‌ستێ جه‌نابێ وى پێشڤچوونێن مه‌زن بخۆڤه‌ دیتن و زێده‌تر هاته‌ نیاسین و دلسۆز و وه‌فادارێن وێ زێده‌تر بوون بتایبه‌ت پشتى سه‌رهه‌لدانا پیرۆزا سالا 1991 ێ .
د هه‌مى هه‌لبژارتناندا ناڤێ بارزانى و رێبازا بارزانى ئه‌گه‌رێن سه‌ره‌كى بوون كۆ پارتى دیموكراتى كوردستان پێشه‌نگا هه‌مى پارت و قه‌وارێن سیاسى بهێت و زۆرینه‌یا په‌رله‌مانى پێك بئینیت .
ژبه‌ر رێبازا بارزانى و ناڤێ بارزانى زۆرینه‌یا خه‌لكێ كوردستانێ به‌رده‌وام باوه‌ریێ دده‌نه‌ پارتى و وان هه‌مى گله‌ و گازنده‌ و ره‌خنه‌یێن ل هژماره‌كا زۆرا پله‌دار و به‌رپرسێن پارتى د كه‌رتێن جودا جودا دده‌نه‌ ره‌خه‌كى .
كێمیا پشكداریا خه‌لكێ كوردستانێ د هه‌لبژراتنێن پێشوه‌خت یێن جڤاتا نوونه‌رێن عیراقێ دا یێن ( 10/10/2021 ) و كێمبوونا ده‌نگێن پارتى دیموكراتى كوردستان ئاماژه‌یه‌كێ هایداركرنێ یه‌ ژلایێ خه‌لكێ كوردستانێ بۆ پارتى دیموكراتى كوردستان كۆ سیاسه‌تا وێ یا ناڤخۆیى و رێڤه‌برنێ و دارایى یا له‌نگه‌ره‌ و خه‌لك زێده‌تر ڤێ گه‌نده‌لى و نه‌دادوریه‌ قه‌بۆل ناكه‌ت ، هه‌رچه‌نده‌ هێشتا پارتى ب دۆراتیه‌كا زۆر پێشه‌نگا هه‌مى پارتیێن كوردستانى یه‌ لێ بۆ پارتیه‌كا بناڤێ رێبازا بارزانى خه‌لكه‌كێ زۆر ل پارتى دۆر كه‌فتیه‌ و ئه‌ڤا هه‌ى ژى ژ ئه‌نجامێ سیاسه‌تا ده‌رڤه‌ و هه‌ڵویستێن وێ یێن نه‌ته‌وه‌یى و نشتیمانى و ناڤێ رێبازا بارزانى و سه‌رۆك مه‌سعوود بارزانى یه‌ ، ژبلى نه‌رازیبوونا خه‌لكى ل سیاسه‌ت و ئیداره‌دانا پارتى ، رێژه‌یه‌كا زۆرا كادرێن پارتى ژى هه‌مان گله‌ و گازنده‌ هه‌نه‌ و نه‌مانا پارتایه‌تیێ و هه‌لسه‌نگاندنێ سه‌رپشكا هه‌مى رۆنشتن و خڕڤه‌بوونێن وانن ..! ئه‌ڤه‌ ژى كاره‌ساته‌ .
ئگه‌ر ره‌وش بڤى ئاوایى بیت ل هه‌لبژارتنێن داهاتى كاره‌سات دێ مه‌زنتر بیت ، له‌وما پێتڤى یه‌ پارتى پێداچوونه‌ڤه‌كا بله‌ز بكه‌ت و ده‌ست ب ئه‌نجامدانا گۆڕانكاریێن بنه‌ڕه‌تى بكه‌ت و به‌رپرسیاریه‌تێ ب هه‌ژى و دلسۆز بده‌ت و كه‌سێن بن په‌ردا پارتى و رێبازا پیرۆزا بارزانى ده‌ست ب گه‌نده‌لیێ و نه‌دادوه‌ریێ و پاراستنا به‌رژه‌وه‌ندێن خۆ و ماڵباتا خۆ كرى بهێنه‌ سزادان و بێ ده‌ستهه‌ڵات بكه‌ن ، و پارتى ڤه‌گه‌ڕێته‌ڤه‌ بۆ دادوه‌رى و ده‌ستپاكى و ئیداره‌دانه‌كا ساخله‌م لسه‌ر بنه‌مایێن رێبازا بارزانى و مینا ساڵێن به‌رێ خه‌لك كۆمه‌ڵ كۆمه‌ڵ به‌ره‌ڤ پارتى دیموكراتى كوردستانێ بهێت ، چونكى خه‌لكێ كوردستانێ باش رێبازا پیرۆزا بارزانى دناسیت و پێنه‌ڤێت د هه‌وێن هه‌لبژارتناندا ماڵ بماڵ بگه‌رێن .
ئه‌ڤ نه‌ڕازیبوونا خه‌لكى ، نه‌ نه‌رازیبوونه‌ ل پارتى و رێبازا بارزانى ، لێ نه‌رازیبوونه‌ لڤى شێوازێ رێڤه‌برنێ یێ نه‌دادوه‌ر و نه‌ساخله‌م ، ئه‌وێ كێمترین خزمه‌ت پێشكێشى هه‌ژار و به‌له‌نگاز و چینا ژێرى یا جڤاكى و ئۆرگانێن پارتى یێن خوارێ دكه‌ت و چینا سەرده‌ست باشترین مفاداره‌ .

نڤیسەرێن هێژا بۆ دیتنا بابەتێن خۆ ئەو ناڤێ خۆ لبن ڤێ نڤیسینێ لێبدە هەموو بابەتین تە هێن …. دگەل رێز