پرۆژێ هایدروپاوه‌رێ دێره‌لۆك دێ كه‌نگى كه‌ڤیته‌ كارى

ئامێدیێ، بێوارحسێن
پرۆژێ هایدروپارێ دێره‌لۆك ئێكه‌ پرۆژێن گرنگێن ده‌ڤه‌رێ كو ب تمام بوونا وى دێ شێت 37 میگاواتێن كاره‌بێ ب رێكا ئاڤێ به‌رهه‌مئینت و وه‌سا بریار بوو دووماهیا سالا 2021 ب داوى بهێت و بكه‌ڤیته‌ كارى لێ ژ به‌ر چه‌ند ئه‌گه‌ره‌كان كار تێدا ب داوى نه‌هات.
محمود تەها راگەهاندنا رێڤەبەریا ناحیا دێرەلۆک بۆ بۆمالپەڕێ ” زێ بادینان ” دیار كر، پرۆژێ هایدروپاوه‌رێ دێره‌لۆك ئێكه‌ ژ پرۆژێن گرنگێن حكومه‌تا هه‌رێمێ و گۆت : ژبه‌ر كو ئه‌ڤه‌ ئێكه‌م جاره‌ ل كوردستانێ ب پرۆژه‌كى ب ڤى ره‌نگى بهێته‌ چێكرن كو ب رێكا ئاڤێ كاره‌بێ به‌رهه‌م بینت و دبێژنه‌ ڤان جوره‌ پرۆژان یێن ژینگه‌ه پارێز و ئه‌ڤ پرۆژێ هایدروپاوه‌رێ دێره‌لۆك پێك دهێت ژ دوو یونتا و دێ شێت 37.6 میگاواتێن كاره‌بێ به‌رهه‌مئینت و دیاكر، كوژمێ 129 ملیون دیناران ژلایێ ئاژانسا جایكا یا یابانى ڤه‌ بو ئه‌نجامدانا ڤى پرۆژه‌ى هاتینه‌ ته‌رخانكرن و دهێته‌ بجهئینان ژلایێ كومپانیه‌كا كوێتى بناڤێ فاراب گروپ و كومپانیا ئیرانى یا بناڤێ بلند پایه‌.
ناڤهاتى ئاشكرا كر، كو ل ژێر چاڤدێرى و سه‌په‌رشتیا كومپانیه‌كا ئیتالى و وه‌زاره‌تا كاره‌بێ یا حكومه‌تا هه‌رێما كوردستانێ ڤه‌ كارێ پرۆژه‌ى ب رێڤه‌ دچیت، و كو د پلانێ دا ئه‌ڤ پرۆژه‌ ل 20/4/2022 بكه‌ڤیته‌ د كارى دا و ب كاره‌با نیشتمانى ڤه‌ بهێته‌ گرێدان و ب كه‌ڤیته‌ د خزمه‌تا هاولاتیان دا.
و دیار كر، ئه‌ڤه‌ ژبلى به‌رهه‌م ئینانا كاره‌بێ ئه‌ڤ پرۆژه‌ى دێ ئاریشا ڤولتیا كاره‌بێ ژى ل ڤێ ده‌ڤه‌رێ چاره‌سه‌ر كه‌ت كو به‌رى نوكه‌ ئه‌ڤ ئاریشه‌ ل ده‌ڤه‌رێ هه‌بوویه‌ و تایبه‌ت كێمیا ڤولتیێ كارتێكرنا ل سه‌ر كارێ پرۆژێن ئاڤێ دكر.
ده‌ره‌بارێ گرنگیا ڤى پرۆژه‌ى ناڤهاتى دیار كر، كو كاره‌با ڤى پرۆژه‌ى دێ ب كاره‌با نیشتیمانى ڤه‌ هێته‌ گرێدان و دێ كارتێكرنێ كه‌ته‌ سه‌ر زێده‌ كرنا ده‌مژمێرێن كاره‌بێ و گۆت: كاره‌با وێ دێ یا گشتى بیت نه‌كو دێ بو ده‌ڤه‌ره‌كا دیار كرى بیت و ئه‌ڤ جورێن به‌رهه‌مئینانا كاره‌بێ گه‌له‌ك گرنگیا خوه‌ هه‌یه‌.
ناڤهاتى دیار كر، كو گه‌له‌ك جهێن دیتر یێن هه‌ی كو دێ دشیان دا بیت كاره‌بێ ب رێكا ئاڤێ به‌رهه‌م ئینن و گۆت: سه‌باره‌ت مه‌ ئه‌ڤه‌ ئێكه‌م جاره‌ پرۆژه‌كى ب ڤى ره‌نگى ل ده‌ڤه‌رێ بهێته‌ چێكرن و ته‌كه‌ز كر، كو گه‌له‌ك جهێن دیتر ل سه‌ر رووبارێ زێ و ل سه‌ر رووبارێ خابوورى ژى هه‌نه‌ پرۆژێن ب ڤى ره‌نگى لێ بهێنه‌ چێكرن .
و دیاركر، ئاماده‌كارى ژى هاتینه‌ كرن هند پروژێن دیترێن ب ڤى ره‌نگى كو ژینگه‌ پارێزن و مفا ژ ئاڤێ و سرۆشتى دهێته‌ وه‌گرتن ل سنورێ پارێزگه‌ها دهوكێ بهێنه‌ چێكرن.