پیڤه‌ره‌كێ نوو بۆ رێكخستنا باجێ هاتیه‌ دارێشتن

زێ بادینان ، ئابووری .

فه‌رمانگه‌ها میدیایى و زانیاریێن حكومه‌تا هه‌رێما كوردستانێ راگه‌هاند، فه‌رمانگه‌ها هه‌ماهه‌نگى و دووڤچوونا حكومه‌تا هه‌رێما كوردستانێ راپۆرتا چاكسازیان ل دۆر باجێ هنارتییه‌ په‌رله‌مانێ كوردستانێ ‌.

فه‌رمانگه‌ها میدیایى و زانیاریێن ئاشكرا كر، د چارچووڤێ هێلا گشتى یا حكومه‌تا هه‌رێما كوردستانێ د وارێ چاكسازیێ و پێداگیریێ ل سه‌ر چاكسازیا سیسته‌مێ باجێ و ب شێوه‌كێ دادپه‌روه‌رانه‌، هه‌موو رێكارێن قانوونى و كارگێرى بۆ رێگرتن ل خوه‌ دزینێ ژ باجێ و میكانیزم و پیڤه‌ره‌كێ نوو بۆ رێكخستنا باجێ هاتیه‌ دارێشتن .

راگه‌هاند ژى، د ڤى واری دا حكومه‌تا هه‌رێما كوردستانێ كۆمه‌كا رێكاران گرتینه‌ به‌ر و ژ وانا، ب فه‌رمانا سه‌رۆكێ جڤاتا وه‌زیران تایبه‌ت ب وه‌رگرتنا باجا ده‌رامه‌تى ل سه‌ر به‌رهه‌مێ په‌ترۆلێ و سۆته‌مه‌نیان و مه‌ودایێ كیمیایى یێ تایبه‌ت ب سۆته‌مه‌نی و به‌رمایكێن وان، باج دێ ژێ هێته‌ وه‌رگرتن و ل رێكه‌فتى 5-3-2021 ئه‌و بریار چوویه‌ د وارێ بجهئینانێ دا، مامه‌له‌یێن چ كۆمپانیایێن په‌ترۆلێ و غازێ ژى وه‌رناگرن هه‌تا نڤێسارا باجێ دگه‌ل دا نه‌بیت.

هه‌روه‌سا باج ژ كارمه‌ندێن بیانى یێن د وارێ په‌ترۆلێ و غازێ دا كار دكه‌ن دێ هێته‌ وه‌رگرتن و ل رێكه‌فتى 17-1-2021 ئه‌و بریار چوویه‌ د وارێ بجهئینانێ دا.