هەژمارەكا ئەندام پەرلەمانێن عیراقێ ئیمزایان ل سەر داخوازییەكێ دكەن ژ بۆ وێ یەكێ مستەفا كازمی نەچار بكەن ئیحسان عەبدولجەبار، وەزیرێ پەترۆلێ ژ پۆستێ وی دویربێخن.
ئەو ئیمزایە ل 10ی تشرینا ئێكێ یا ئەڤسالە ژلایێ فالح خەزعەلی، ئەندامێ فراكسیۆنا سەنەد هاتینە كۆمكرن كۆ هەڤدەم ئەندامێ لیژنا پەترۆل و گازێ یە ل پەرلەمانێ عیراقێ.
د وێ نڤیسارێ دا 52 ئەندامێن پەرلەمانێ عیراقێ ئیمزا ل سەر كرینە و داخوازدكەن كۆ بریارەك ژ پەرلەمانی بهێتە دەركرن ژبۆ نەچاركرنا مستەفا كازمی ب لادانا ئیحسان عەبدولجەبار، وەزیرێ پەترۆلێ ژ پۆستێ وی ژبەركۆ ئەو یێ پێگیر نەبوویە ب یاسایا جڤاتا وەزیران و پەیرەوێ نافخۆ یێ پەرلەمانی و ئامادەی كۆمبوونێن پەرلەمانی نەبوویە سەرەرای كۆ چەندین جاران ژێ هاتییە داخوازكرن ئامادەببیت.
ئیحسان عەبدولجەبار، وەزیرێ پەترۆلێ كۆ هەڤدەم وەزیرێ دارایی یێ عیراقێ یە ب وەكالەت، ژ پێكهاتا شیعەیە.
كۆمكرنا وان ئیمزایان ژی هەڤدەمە دگەل روینشتنا دادگەها بلند یا فیدرالی یا عیراقێ دەربارەی سكالایا محەمەد حەلبووسی، سەرۆكێ پەرلەمانێ عیراقێ كۆ ل دژی مستەفا كازمی تۆماركربوو داكۆ بریارەكا جڤاتا وەزیران دەربارەی راسپاردنا ئیحسان عەبدولجەبار بۆ برێڤەبرنا وەزارەتا دارایی ب وەكالەت، ب هەلوەشینییت.
Comments are closed, but trackbacks and pingbacks are open.