پارتی دیمۆکراتی کوردستان پەیامەکا روهکرنێ دەربارەی رەوشا سیاسی و پەیوەندیێن ل گەل ئێکەتیا نشتیمانی یا کوردستانێ بەلاڤ کر.
مەحموود محەمەد، پەیڤدارێ پارتی د پەیامێ دا نڤیسیە،”بەیانا رۆژا ئێکشەمبیێ یا جڤاتا سەرکرداتیا ئێکەتێ دەربارەی پارتی و رەوشا سیاسی نەیەکسانی تێدا بوو، لەورا ب باشی دزانین رایا گشتی یا کوردستانێ ژ راستی و دروستیا بابەتی ئاگەهدار بکەین”.
هەروەسا نڤیسیە،”پشتی راگەهاندنا ئەنجامێن هەلبژارتنێن ئۆکتۆبەرێ یێن پەڕلەمانێ ئیراقێ، ل سەر راسپاردەیا سەرۆک بارزانی شاندەکێ مەکتەبا سیاسی یا پارتی ب ئارمانجا دەستڤەئینانا هەلوەستەکێ هەڤپشک و رێکخستنا ناڤمالا کوردی و پێکئینانا شاندەکێ هەڤپشک بۆ بەغدا ب ئارمانجا چەسپاندنا مافێن رەوا یێن گەلێ کورستانێ سەرەدانا هەمی ئالیێن کوردستانێ کر. هەر ل سەر ڤی بنەمایی کۆمبوونا مەکتەبێن سیاسی یێن پارتی و ئێکەتیێ هاتە دانان و سەرۆک بارزانی پێشوازی ل بافل تالەبانی، هەڤسەرۆکێ ئێکەتیێ کر و ئارمانجا سەرەکی یا کۆمبوونێ بەرهەڤکرنا بەرنامەیەکێ کوردستانی بوو بۆ پاشەرۆژا ئیراقێ و داخوازکرنا مافێن رەوا یێن گەلێ کوردستانێ و هەمی پرۆسەیا سیاسی”.
مەحموود محەمەد نڤیسیە ژی،”ئارمانجا مە ئەو بوو شاندەکێ هەڤپشک ژ هەمی ئالیێن سیاسی یێن کوردستانێ بهێتە پێکئینان، لێ مخابنیڤە ئەو سەرنەگرت و ب ئارمانجا دەستڤەئینانا ئێکرێزیێ ل سەر پێکئینانا شاندەکێ هەڤپشک یێ پارتی و ئێکەتیێ رێککەفتین داکو لێکتێگەهشتنێن دەستپێکی ب گەهنە قوناغا رێککەفتنا سیاسی. ژ بەر ڤێ یەکێ شاندێ هەڤپشک یێ پارتی و ئێکەتی ب سەرۆکاتیا عیماد ئەحمەد، ئەندامێن مەکتەبا سیاسی یا ئێکەتیێ سەرەدانا بەغدا کر و زنجیرەیەکا کۆمبوونان ل گەل ئالیێن ئیراقێ د ناڤا پرۆسەیا سیاسی کرن. لێ ب مخابنیڤە دیاربوو کو نوینەرێن ئێکەتیێ د ناڤا شاندی دا روانگەهێن روهن نەبوون و شیانێن بریاردانێ نەبوون. هەروەسا بێی ئاگەهدارکرنا پارتی خۆ ژ شاندێ هەڤپشک ڤەکێشا”.
پەیڤدارێ پارتی دیار ژی کریە،” ئێکەتیێ خۆ ژ ئێکەم کۆمبوونا پەڕلەمانێ ئیراقێ ڤەکێشا و ئێکەم گاڤ بوو بۆ تێکدانا ئێکرێزیا کوری ل جڤاتا نوینەران”.
دەربارەی بابەتێ سەرۆککۆماری پارتی دوپات کر کو ئەو پۆستە ئیستیحقاقێ گەلێ کوردستانێ یە و تنێ مولکێ چ ئالیان یان کەسێن دەستنیشانکری نینە. لەورا پێدڤیە تنێ بەربژێرەک هەبیت و پشتەڤانی و رازیبوونا هەمی ئالیێن کوردستانێ ل سەر هەبیت، لێ ئێکەتی یا رژد بوو ل سەر بەربژاکرنا کەسەکێ ژ دەرڤەی رازیبوونا ناڤمالیا کوردی و پۆستێ سەرۆککۆماری ژی وەک ئیستیحقاقەکێ تەمام حزبی دیت و ژ روانگەهەکا حزبایەتی کار بۆ کر نەک نشتیمانی.
پارتی راگەهاندیە کو پێدڤی بوو ئێکەتیا نشتیمانی دەربارەی سەرۆککۆماری و ئێکرێزیا ناڤمالیا کوردی ب نشتیمانیتر سەرەدەری کربوو، هەروەسا پێدڤی بوو بەرپرساتیا رەوشا نوکە و پاشەرۆژێ و ئەڤ ئالۆزیێن نوکە د ستوویێ خۆ دا دیتبوون.
Comments are closed, but trackbacks and pingbacks are open.