چه‌ند رۆژان به‌رى نها دادگه‌ها بلند یا عیراقێ بریاره‌ك ل دژى یاسا فرۆتنا په‌ترۆلا هه‌رێما كوردستانێ ده‌ركر، ڤێ یه‌كێ ژى كارڤه‌دانێن تۆند ل دویڤ خوه ئینان.
رۆژا سێشه‌مبى 15/2/2022، دادگه‌ها فیدرالى یا عیراقێ یاسایا نه‌فت و گازێ یا هه‌رێما كوردستانێ ب نه‌ده‌ستوورى هه‌ژمارت و حكومه‌تا هه‌رێمێ ب راده‌ستكرنا په‌ترۆلا خوه بۆ وه‌زاره‌تا په‌ترۆلا عیرقێ پابه‌ندكر. ڤێ یه‌كێ ژى كارڤه‌دانێن تۆند یێن سه‌ركرده و وه‌لاتییێن هه‌رێمێ ل دویڤ خوه ئینان. نه بتنێ لایه‌نێن كۆردى، به‌لكۆ هه‌ژماره‌كا مه‌زن یا لایه‌نێن عه‌ره‌بى ژى ئه‌و بریاره ب تۆندى ره‌تكر.
شێخ موزاحم ئه‌لحوێت، په‌یڤدارێ فه‌رمى یێ هۆزێن عه‌ره‌بى ل ده‌ڤه‌رێن كوردستانى یێن ده‌رڤه‌ى ئیدارا هه‌رێما كۆردستانێ راگه‌هاند، بریارا دادگه‌ها فیدرالى یا سیاسى و نه‌یاسیاى و نه‌ده‌ستوورى یه.
دیار ژى كرییه، مه‌ره‌م ژ وێ بریارێ درۆستكرنا ئالۆزییایه دناڤبه‌را هه‌ولێر و به‌غدایێ دا و ل سه‌ر بنه‌مایێن ده‌ره‌كى ده‌ركه‌تییه. هۆزێن عه‌ره‌بى ل ده‌ڤه‌رێن كوردستانى یێن ده‌رڤه‌ى ئیدارا هه‌رێمێ وێ بریارێ ب تۆندى ره‌تدكه‌ن و ده‌نگێ وان دگه‌ل ده‌نگێ حكومه‌تا هه‌رێما كوردستانێ یه.
ژلایه‌كێ دیڤه هه‌ڤپه‌یمانییا (سیاده) كۆ خودان 67 كۆرسییێن په‌رله‌مانێ عیراقێ یه ب سه‌رۆكاتییا محه‌مه‌د حه‌لبووسى راگه‌هاندنه‌ك به‌لاڤكرییه و تێدا دیاركرییه، ئه‌و بریارا دادگه‌ها فیدرالى دده‌مه‌كێ گه‌له‌ك هه‌ستیاردا هاتییه‌دان و داخواز ژى ژ حكومه‌تێن عیراقێ و هه‌رێما كوردستانێ كر ده‌ست ب گۆتۆبێژێن راسته‌خۆ بكه‌ن بۆ چاره‌كرنا كیشێن خوه.
هه‌روه‌سا ئینتیفاز قه‌نبه‌ر، سیاسیه‌تمه‌دارێ ناڤدار یێ عیراقى د توویته‌كى دا ب تۆندى ره‌خنه ل بریارێن دادگه‌ها فیدرالى یا عیراقێ گرتن و راگه‌هاند، دادگه‌ها فیدرالى كۆده‌تایێ ب سه‌ر ده‌وله‌تا عیراقێ دا دكه‌ت.
ئاماژه ب وێ یه‌كێ ژى دا، ئه‌و بریاره بۆ په‌كخستنا پرۆسه‌یا سیاسى ل عیراقی هاتینه ده‌ركرن.
Comments are closed, but trackbacks and pingbacks are open.