ژدایکبوونا ئێکەتیا نوی و دەستهەلات و شەرعییەتا پاڤێل

ژدایکبوونا ئێکەتیا نوی و دەستهەلات و شەرعییەتا پاڤێل .

نازی محەمەد شەریف

پاڤێل د ئێکەم پێنگاڤا خۆدا یێ سەرکەفتی بوویە ژبۆ لادانا لاهور و هەمی کابینا وی و داروفەستێن وی ژ دەستهەلاتێ و کونترولکرن و خۆ فەرزکرنا لسەر هەمی ناڤەندیێن دەستهەلاتێ و ئورگانێن حزبی و شیا ب سانەهی هەمی سەرکردیێن ئێکەتیێ و نەیارێن خۆ بێ دەنگ بکەت و ببیتە سەرۆکەکێ بێ هەڤرک ل هەمی زونا سەوز و ب هەلکەفتا جەژنا قوربانێ باس ل ئێکەتیەکا نوی کر.
ئەرێ ئەڤ ئێکەتیا نوی یا پاڤێل راگەهاندی دێ یا چەوا بیت ژ ئالێ رێکخستنێڤە و دێ چەوا سەرەدەريێ دگەل پارتی و حکومەتا هەرێمێ و ئیرانێ و حەشدا شەعبی کەت؟
ئەڤە و چەندیێن بابەتیێن دیتر دبنە جهێ پسیارێ.

براستی ئەگەر ئەم نها سەحا کەسێن خودان هێز و جەمسەربەندیێن دەستهەلاتێ و بال و ئورگانێن حزبی دناڤا ئێکەتیێ دا بکەین ، دێ بینین بێ دەنگیەکا مەزن هەمی سەرکردە و ئورگان و بالێن دناڤا ئێکەتیێ دا یا ڤەگرتی و ئەڤ گوهرین و رویدانێن هند قاسی مەزن و هەستیار دناڤا ئێکەتێ دا پەیدا بووی، لێ ئەڤێن مە لسەری باسێ وان کری هەمی د بێ دەنگن و هیچ سەرکردە و ئورگانەکا حزبی هەلوێستەکێ روهن و بەرچاڤ نەبوویە کو د ئاستێ ڤێ رویدانا مەزن دا بیت.
رەنگە ئەڤە ژی دوو مگرتیا پەیدا دکەت.
١- رەنگە هەتا ئاستەکێ مەزن پرانیا سەرکردێن ئێکەتیێ ب دلێ وان بیت کو لاهور ژ دەستهلاتێ هاتیە لادان ژبەر کو لاهور پرانیا سەرکردێن ئێکەتیێ ژ گورەپانێ لادابین.
هەروسا ئەو کریارێن لاهور و رەشکێن وی ئەنجامدای هەر ژ خەیانەتا ١٦ی ئوکتوبەرێ و ژەهرکرنا سەرکردا و بازرگانیا تریاکێ و بێ بها کرنا زونا سەوز و ب دەهان کریارێن بڤی رەنگی. تێرا هندێ هەبوون کو ژ مێژە لاهور و رەشکێن وی هاتبانە سێدارەدان، لێ چونکی ئەڤ هەمی کریارە لژێر پەردێ دژاتیا پارتی ئانجامددان، ئێکەتیێ لاهور کربوو کاریزما و قارەمانەکێ بێ وێنە. هەتا گەشتیە ئاستەکی لاهور هەمی پیروزیێن نەتەوی و نیشتیمانی پێ پەس کرن و کەرکوکا دلێ کوردستانێ رادەستی دوژمنا کر و بتنێ ب مەرەما دژاتیکرنا پارتی و چێکرنا ئارشیە ئاستەنگا بو حوکمرانیا کوردی، کو نها زور بەرپرس و روژنامەڤان و راگەهاندنێن سەر ب ئێکەتیێڤە باس ژ ڤان کریارێن لاهور دکەن.

٢- هەروەسا رەنگە ئەگەرێ بێ دەنگیا سەرکردێن ئێکەتیێ ترسا وان سەرکردا بیت ژ پاڤێل، چونکی پاڤێل هەڤسەروک بوویە و کەسێ دوویێ بوویە و ئاگەهداریی پرانیا کریارێن لاهور بوویە، بتابەت لادانا سەرکردێن کەڤن ژ دەستهەلاتێ و هەوەسا پاڤێل زۆر ب وێرەکی و ب سانەهی لاهور و رەشەکێن وی بێ دەنگ کرن، کو ئەڤە ژی زەنگەکا مەترسیێ یە بۆ هەمی سەرکردێن ئێکەتيێ کو خۆ بێ دەنگ بکەن بەرامبەری پاڤێل یان خو رادستی ئیرادا ئەوی بکەن، پێخەمەت بدەستڤە ئینانا هندەک پوستا.

ئەڤ سەروبەرێ نها ئێکەتی تێدا دژیت، باشترین دەلیڤەیە ژبۆ هندێ کو ئێکەتیەکا نوی ژ دایک ببیت، ئێکەتیەک کو لدویف حەز و بەرنامێ پاڤێل بیت و دویر بیت ژ کەسانێن مینا لاهوری و باشترین دەلیڤەیە کو پاڤێل بکاریت جارەکا دیتر ئێکەتێ زندی بکەتەڤە و بینیتە سەر رێکا راستا کوردایەتیێ و ولات پەروەريێ و رێکا ریفراندومچیا، و ئێکەتیا نوی و پاڤێل ببنە جهێ باوەریێ بۆ جەماوەر و ئەندام و دلسوزێن ئێکەتیێ.

ئەرێ ژدایکبوونا ئێکەتیا نوی دێ کەڤیتە بن رەحما پارتی یان دێ بیتە پارتەکا هەڤرک و د هەمان دەمدا شریکەکا راستەقینە بۆ حوکمرانیێ. رەنگە هێشتا زی بیت پێشبینییەکا دروست بۆئێکەتیا نوی بهیتە کرن، لێ هەتا رادەکێ ئەم د کارین بێژین ئێکەتیا نها دێ یا لاواز بیت هەر ج نەبیت بۆ دەمەکێ کورت هەتا ناڤ مالا خو یا حزبی پاقژ دکەت و خۆ رێک دئێخیتەڤە، و ژبۆ هندێ کو ئەڤ ئێکەتیا نوی یا پاڤێل باس ژێ دکەت ئێکەتیەکا بهێز بیت، پێدڤییە جاکسازیێن ناڤخۆیی یێن راستەقینە بهێنەکرن د ئایدلوژی و بەرنامە و ستراتیژی و شێوازێ کارکرن و سەرەدەریا دگەل حکومەتێ و … و ئەو شاشیێن بەری نها دووبارە نەکەتەڤە تاتبەت یێن سەردەمێ لاهور.
هەروەسا ئەگەر پاڤێل جاکسازیێن راستەقینە بکەت د وارێ حزبی و ئیداری و حکومی دا و نەهێلانا گەندەلیێ دڤان بیڤاندا، دێ بیتە کارتەکا فشارێ لسەر پارتی ژی کو دەست ب جاکسازیێن زێدەتر بکەت دناڤخو و حکومەتیدا.
سەبارەت شەرعیەتا دەستهەلاتا پاڤێل رەنگە پارتی ژی بخازیت و پشتەڤانیا ئێکەتیەکا نوی بکەت کو بنەمالا جەلال خودان دەستهەلات بیت و مینا مام جلال سەرەدەریێ دگەل پارتی بکەن و ب ئێک تلفون پاڤێل و سەروک بارزانی چارەسەریتا ئەریشا بکەن، هەروەسا هەبوونا کاک قوباد د چەندین کابینادا وەک جێگرێ سەروک وەزیران و رۆلێ وی یێ ئاڤاکەر و ئاشتتانە، ئەڤەژی خالەکا بهێزە ژبۆ شەرعییەت دانا کریار و گورانکاريێن پاڤێل دئیدارا زونا سەوزدا و موکمکرنا دەستهەلاتا خۆ.

هەروەسا فەرە بزانین کو ئیرانێ وەک هەڤالبەندەکا کەڤنا ئێکەتیێ ژی رول و کارگەریەکا زور یا هەی لسەر ئێکەتیێ و ئیرانێ ژی پشکا خۆ دڤیت د گورانکاریێن دناڤا سەرکرفایەتیا ئێکەتیێدا پەیدا دبن. لەورا فەرە بەری کو ئیران رولەکێ سەرەکی بگێریت د ئاڤاکرنا پێیکەرێ ئێکەتیا نوی و کونترولا سەرکردایەتیا نوی بکەت و بۆ ئالێ خۆ راکێشیت، ڤێت پارتی لەزێ بکەت ژبۆ کارکرنا لسەر ئێکەتیا نوی.

نازی محمدشریف
٢٤/٧/٢٠٢١