غیاس خالد زێباری
هەرچەندە کوردستان و ئیراق وەکی جوگرافی و جڤاک دوو وەڵات و جڤاکێن جودانە ، لێ قەدەرێ و بەرژەوەندێن وەڵاتێن زلهێزێن جیهانێ ب نەچاری پێکڤە گرێدانە ، ئەڤ پێکڤە گرێدانا نەچارێ زیانێن مەزن گەهاندینە هەردوو جڤاکان ، لێ پشکا شێری ژ کاریگەریێن نیگەتیڤ یێن ڤێ پێکڤە گرێدانێ ژبەر کوردا کەفتینە ، ب درێژاهیا زێدەتر ل سەد ساڵا مفایێ کورد د ئیراقێ دا کوشتن و وێرانکرن و ئەنفال و کیمیا بارانکرن و …..هتد بوونە …!
سەرەرای ئاشتیخوازیا بزاڤ و شۆڕەشێن رزگاریخوازیێن کوردستانی ب رێبەریا نەمر مستەفا بارزانی و پارتی دیموکراتی کوردستان و پاشان ب رێبەریا سەرۆک مەسعود بارزانی بەردەوام ب وان پڕنسیپێن مرۆڤایەتی دا هەتا گەهشتە پێکئانینا بەرەیێ کوردستانێ ل ناڤەڕاستا سالێن هەشتێیان ل سەدێ بووری ، لێ ڕژێمێن ئێک لدیف ئێکێن ئیراقێ بەرۆڤاژی رەوشت و سەرەدەریێن بزاڤا رزگاریخوازیا کوردستانێ سەرەدەرێ دگەل کوردا دکر و ژبەر مەڕامێن سیاسی و شوفینیەتا دەستهەڵاتێ وەنەکر خەلکێ ئیراقێ دناڤ دەولەتا خودا ئارام و تەنا ببیت و هەتا نهۆ ل بنێ لیستا وەڵاتێن پێشکەفتێ و تەناو ئاڤەدان و بەختەوەر دهێت .
پشتی گۆڕینا سیستەمێ دەستهەڵاتداریا ئیراقێ لساڵا ٢٠٠٣ ێ ل تاکڕەوی و دکتاتۆریەتێ بۆ رژێمەکا فیدرالی و دیموکراسی و دەستووری شۆفینیەکا پشکەکا هەرە زۆرا دەستهەلاتدارین ئیراقێ ب هەمان عەقلیەتا بەرێ سەدەرێ دگەل کوردا دکەن و گۆهداریا دەستووری ناکەن و هەڤپشکیا کوردا وەکی دوویەم مەزنترین نەتەوە قەبۆل ناکەن .
هەولێن کوردا ژی بۆ گەهشتن ب ئارمانجێن خۆ سەرنەگرتن چونکی د بەرژەوەندێن وەڵاتێن دۆرماندۆر و هندەک وەڵاتێن زلهێز دا نینە ، لەوما کورد نەچارن رێکا بەغدایا پایتەختێ ئیراقێ بگرن ، لێ پسیار ئەوە کورد چەوا و ب رێک بچنە بەغدا ..؟
سەربۆرێن ڤان ١٩ ساڵێن کوردا دگەل دەولەتا ئیراقێ خۆیا دکەن کۆ باشترین ڕێک و کورترین ڕێک بۆ کوردا ئێک ڕێزی و ئێک هەڵویستیا لایەنێن سیاسی یێن کوردستانی یە بتایبەت پارتی دیموکراتی کوردستان و ئێکەتیا نشتیمانیا کوردستانی ، چونکێ ئێک گۆتاریا ڤان هەردوو پارتیا ل دەهـــ ساڵێن پێگەهێ کوردا دناڤ دەولەتا نوو یا ئیراقێ بهێز کر و دەستکەفتێن باش ژی پاش خۆ هێلان وەکی دەستوورێ ئیراقێ و ڤەژاندنا ئابۆری و پەیوەندیێن دبلۆماسی و …هتد
ئێک رێزی و نە ئێک گۆتاریا وان ژی زیانێن مەزن گەهاندنە کوردستانێ و بزاڤا رزگاریخوازیا کوردستانی ، ژوانا روودانێن پشتی ڕاپرسیا سەرخۆبوونا کوردستانێ یا ٢٠١٧ ژ ئەنجامێ خیانەکا پشکەکا سەرکردێن ئێکەتیێ ل ١٦ ێ ئکتۆبەرا هەمان ساڵ وەکی داگیرکرنا نیڤەکا ئاخا کوردستانێ و سەپاندنا گەماروویێن سیاسی و ئابۆری لسەر هەرێمێ و دەسپێکرنەڤا پرۆسا ب عەرەبکرنا دەڤەرێن کوردستانی یێن دەرڤەیئیدارا هەرێما کوردستانێ .
پشتی گۆڕینێن سەرکردایەتیا ئێکەتیێ و ناکۆکیێن لایەنێن عەرەبیێن ئیراقێ ب تایبەت ناڤماڵا شیعی دەلیڤەیەکا زێرین و ب ساناهیتر بۆ ئێک گۆتاریا لایەنێن سیاسی یێن کوردستانی هاتیە پێش و ئەگەر کورد بۆ دانۆستاندنێن چاوانیا پێکئینانا حکومەتا نوو یا ئیراقێ بەرەڤ ڕێکا بەغدا بچن دبیت سەردەمێن دوو هزار و پێنجێ هەتا دوو هزر دوازدێ بزڤرن و کورد ببنە ئەکتەرێن کاریگەر بۆ ڕێڤەبرنا حکومەتا نوو یا ئیراقێ و دەوڵەتێ ب گشتی .
ژلایەکێ دیتر خەلکێ ئیراقێ د هەلبژارتنێن ( ١٠ ) ێ ئکتۆبەرا بۆری دا هندەک لایەن و قەوارێن سیاسی یێن خودان پێگەهێن مەزن د جڤاتا نوونەران دا هەڵوەشاندن یان لاواز کرن پڕانیا وان ژی ئەو بوون یێن ب چاڤێ کەرب و کینێ سەرەداری دگەل هەرێما کوردستانێ دکر ، ژمارا نوونەرێن کوردان ژی ل جڤاتا نوونەران ئەگەر د ئێککرتی بن دێ شێن بنە یاریکەر و کارتێن بهزێن کۆ بشێن فشارێ بێخنە سەر حکومەتا داهاتی یا ئیراقێ بۆ پاراستن و دابینکرنا ماف مستەحەقاتێن دەستووری و یاسایی یێن خەلکێ کوردستانێ چونکی هەڤپەیمانی و لایەنێن سەرۆک وەزیری دیار دکەت پێتڤیا ب ئەرێبوونا دەنگێن کوردا هەیە و بەرژەوەندێن جڤاکێ نیڤ دەولەتی و وەڵاتێن زلهێز ژی دگەل بهێزبوونا پێگەهێ کوردا بیت ل بەغدا .
لسەر ئاستێ کوردستانێ ژی هیڤیا خەلکی ئەوە ئێکرێزیا لایەنێن کوردستانی نەخاسمە پارتی و ئێکەتی ڤەگەرێتەڤە و هەستا نەتەوایەتی و نشتیمانیا خەلکی دێ بهێزتربن کو ژ ئەنجامێ دووبەرەکیێ هەتا ڕادەیەکی لاواز بوویە ، کێمبوونا ڕێژا پشکداریا خەلکێ کوردستانێ لڤان هەلبژارتنێن چوویی بەڵگەنە لسەر ڤێ چەندێ .
ئەڤ لێک نێزیکبوونا ڤێ داویێ یا پارتی و ئێکەتیێ و کۆمبوونێن سەرۆک مەسعوود بارزانی دگەل لایەنێن سیاسی یێن کوردستانی و ئیراقی ئاماژێن دلخۆشکەرن بۆ زاڵبوون بسەر ئاستەنگێن ژێک دۆرکەفتنا لایەنێن سیاسی یێن کوردستانی و ئاڤاکرنا هێزەکا سیاسی و دبلوماسیا کوردستانی یا ئێکگرتی بۆ داکۆکیکرنێ ل ماف و ئارمانجێن خەلکێ کوردستانێ و بهێزکرنا قەوارێ هەرێما کوردستانێ ، چونکی سەرۆک مەسعوود بارزانی هەردەم ب هەستا کوردایەتی و نەتەوایەتی و نشتیمانی و مرۆڤایەتی ئاریشە و ناکۆکیا چارە دکەت و بەرژەوەندێن بەرتەسکێن حزبایەتی ب گرنگ نابینیت ، لەوما لبن ڕێنما و ئامۆژگاریێن سەرۆک بارزانی خەلکێ کوردستانێ بەرەڤ بەختەوەریێ و ئێمناهیێ و سەرفیرازیێ دچیت .
- نڤیسەرێ هێژا دکاری هەموو بابەتێن خۆ بینی یێن هاتیە
Comments are closed, but trackbacks and pingbacks are open.