پارێزەر : روژھات شاکر:
ب درێژاھیا دیروکێ ژن یا تەپەسەربوویە وھەردەم بوویە قوربانا کاودان ورەوشا سیاسی وئابووری وداب ونەریتێن جڤاکی , ئەڤە ژی دزڤریت بوگەلەک ئەگەرا , ھندەک ژوان ئەگەرێن گرێداینە ب پەروەردەکرنا خێزانێ کو یا پابەندە ب داب ونەریتێن جڤاکی د پەروەردەکرنا زاروکی دا , وجوداکاریێ دکەت دناڤبەرا کچ وکورێن خودا , چونکی ل دویف وان داب ونەریتا کچ یا لاوازە و ئەو خودیکا نامیسا خێزانێ وعەشیرەتێ یە , بەلێ کور یێ بھێزە وسەرتراشتیە!! ئەز نزانم چەوا یا لاواز دێ ناڤێ عەشیرەتەکێ شکێنیت یان دێ بلند کەت؟ ئەرێ یا درستر ئەو نە بو کور ڤی ئەرکی بھەلگریت چونکی یێ ب ھێزە وئازادە؟
ل ڤێرێ مەرەما نەئەوە بێژم کو دڤێت کچ یان ژن یا سەربەردایی بیت , بەلێ دبێژم دڤێت مێر ژی یێ پابەندبیت , چونکی ھەر شاشیەکا مروڤ دکەت ئێکەم تشت مروڤ پێ شەرمزار دبیت پاشی خێزان وعەشیرەتا مروڤی , ڤێجا ئەڤ مروڤە ژن بیت یان مێر , ھەروەسا نابێژم ژن ومێر وەک ئێکن , بەلکو جوداکاری ھەیە دناڤبەرا وان ژلایێ فسیولوژی ڤە , ود جڤاکێ وەک جڤاکێ مەدا جوداکاری دناڤبەرا وان دا ھەیە ژلایێ شیانێن جەستەیی , بەلێ ژلایێ ھزرکرنێ ومێشکی ڤە وەک ئێکن , چونکی جوداکاریا مێشکی وھزرکرنێ نە لسەر بنەمایێ رەگەزی یە کانێ ژنە یان مێرە , بەلکو ل سەر بنەمایێ شیانێن مروڤایە .
وئەگەرێن دیتر ھەنە بو تەپەسەریا ژنێ ئەوژی ئەگەرێن ئابووری وسیاسی نە , و ل بابەتەکێ دی دا دێ ئاماژەی پێدەم .
یا لڤێرێ من دڤێت بێژم دەھان رێکخراوێن ژنان ھەنە (ئێکەتیا ئافرەتا , ئێکەتیا ژنا , ئێکەتیا خوشکان , کومەلا ئافرەتان ….ھتد) ئایا ھەبوونا ڤانا بوچیە ؟ چ مفا گەھاندیە ؟ ژبلی سەرەدانا وکێشانا وێنا وبەلاڤکرنێ ل سوشیال میدیایێ؟ ئایا نەیا فەر بوو ئەڤ رێکخراوە بەرنامەکی دانێن بو سەر ژنوی بەرھەڤکرنا کچ وکورا بەری ھەڤژینیێ پێک بینن؟ ئەرێ نە ئەرکێ وانە ئەو تێگەھێن جڤاکی بو ژنێ بگوھرن ؟ و ب شێوەکی مەیدانی چالاکیا ئەنجام بدەن ووورک شوپ و سمینارێن چر بو ژن وزەلاما وکچ وکورا پێکبینن , تێدا چەواتیا پێکئینانا خێزانێ و ھەلبژارتنا ھەڤژینێ یان ھەڤژینی , چەواتیا سەرەدەریکرنێ دگەل ئاریشا , وژیێ گونجایی بو شویکرنێ وپێکئینانا ھەڤژینیێ ویا ژھەمیا گرنگتر سەلماندنا مروڤایەتیا ژنێ , دیاربکەن .
ژن وەک تە مروڤە مێرێ ھێژا , چەوا تەھەست ھەنە وێ ژی ھەنە , چەوا تو دلگران وتورە دبی ئەوژی وەک تە , چەوا مافێ تەیە گازندا بکەی ودەنگێ خو بلند بکەی ئەوژی وەک تە , ھەرچەندە ئەز دگەل دەنگ بلندیێ وکێم کرنێ نیمە بو ژن ومێرا, ھەرگاڤا ئەم تێگەھشتین ژن مروڤە ھنگی مە چ ئاریشێن کوشتنێ وبەردانێ وژێکڤەبوونێ نامینن , وئەز داخوازیا ئێکسانیێ ناکەم دناڤبەرا ژن ومێرا دا , بەلکو داخوازیا دادپەروەریێ دکەم دناڤبەرا مروڤان دا , ول جھێ ھندە پارە ل رێکخراوێن ژنا بھێنە مەزاختن بلا ئەو پارە وبودجە بو رێکخراوێن مروڤی بن , بو سەلماندنا مروڤیا ژنێ و بدەستڤەئینانا مافێن مروڤان .
Comments are closed, but trackbacks and pingbacks are open.