کۆمسیۆنا بلندا سەربەخۆیا هەلبژارتنێن عێراقێ ڕاگەهاند، “ئەنجامێن بهەڤبەرکرن و جوداکاریا دەنگدانێ ب دەستی و ئەلکترۆنی د پرۆسەیا دەنگدانا تایبەت دا سەد ژ سەدێ وەکهەڤبوو“.
ئەڤرۆ شەمبی، جومانە غەلای پەیڤدارێ کۆمسیۆنا بلندا سەربەخۆیا هەلبژارتنان بۆ ئاژانسا فەرمیا نووچەیێن عێراقێ ڕاگەهاند، پشتی کو دەنگدانا تایبەت تەمامبووی، ئەنجامێن ئەلکترۆنی بسەر بریکاراندا هاتنە پارڤەکرن هەیا ب دەستی جارەکا دی دەنگان جودا بکەن و بهێنە هژمارکرن.
ئاماژە ب وێیەکێ کریە، جوداکرن و هژمارکرنا ئەلکترۆنیا وان بنگەهێن هاتینە دەستنیشانکرن، بهەڤبەرکرن ب وان دەنگێن ب دەستی هاتینە جوداکرن و هژمارکرن دەرەکەفتیە ئەنجام ١٠٠% وەکهەڤبوون.
ئەڤە ددەمەکیدایە، پرۆسەیا دەنگدانا تایبەت ل دەمژمێر ٧ی سپێدێ دەستپێکر ل دەمژمێر ٦ی ئێڤاری ب داوی هات و تەڤایا سندوقێن دەنگدانێ هاتنە دائێخستن و ئامیرە ژی ب رەنگەکێ ئۆتۆماتیکی ڤەمرین.
ل تەڤایا عێراقێ، ئێک ملیۆن و ٧٥ هزار و ٧٢٧ کەسان ژ هێزێن ئەولەکاریێ مافێ پشکداریا دەنگدانێ هەبوو، ١٢٠ هزار و ١٢٦ ئاوارەیان ژی مافێ دەنگدانێ هەبوو، د گرتیخانەیان ڤە ٦٧١ کەسان مافێ دەنگدانێ هەبوو.
سوبەهی ١٠ی ١٠ دەنگدانا گشتی ل تەڤایا عێراقێ دێ دەستپێکەت و تێدا نێزیکی ٢٥ ملیۆن کەسان مافێ دەنگدانێ هەیە بۆ مەرەما هەلبژارتنا ٣٢٩ ئەندام پەرلەمانێن نوی بۆ جڤاتا نوینەرێن عێراقێ.
Comments are closed, but trackbacks and pingbacks are open.