سەلاح جەمیل سندی/ زاخۆ
ناڤێ وێ یێ ( فاتما محەمەد ئەحمەد عەلی )یە ل سالا ( ١٩٢٩)ێ، ل گوندەکێ سەر ب باژێرێ ( جولەمێرگێ ) ل باکوورێ کوردستانێ ھاتبوویە سەر دونیایێ. ھونەرمەند ( ئەحمەد خەلیل ) ناسناڤێ ( گول بھار ) بۆ وێ دانابوو. ھونەرمەند گول بھارێ ل سالا ( ١٩٦٣)ێ دەست ب کارێ ستران گۆتنێ ل رادیویا بەغدا بەشێ کوردی کربوو، ھەر دھەمان سال دا ئێکەمین سترانا خۆ بناڤێ ( کوڕێ گوندی بەژن دارێ حەیزەران ) بۆ رادیویا بەغدا تۆمارکریە. ھەر ل سالا ( ١٩٦٣)ێ تاکو سالا ( ١٩٨٧)ێ ( ٢٨٥) ستران گۆتینە بەلێ ھەمی سترانێن خوە ل رادیویا بەغدا تۆمارنەکربوون، پتریا وان ب شێوەیێ ڕاستەوخۆ بەلاڤ کربوون.
گول بھار ل سالا ( ١٩٧٣ )ێ دگەل ھونەرمەند ( محەمەد عارف جزیری و عیسا بەرواری ) بەشداری ڤیستەڤالا بەیدرا ل وەلاتێ لبنان دبەت و، ل سالا ( ١٩٧٦)ێ دچیتە وەلاتێ ( نەمسا و فرەنسا ) و لوێرێ چەند کۆنسێرتان سازدکەت، ھەروەسان ل سالا ( ١٩٧٨)ێ ژی دچیتە وەلاتێ ( برێتانیا ) و لوێرێ ژی چەند کۆنسێرتان سازدکەت و، ل سالا ( ١٩٨١)ێ ژی دچیتە وەلاتێ ( ئەمریکا ) و چەند کۆنسێرتان سازدکەت.
ھونەرمەند گول بھارێ چەندین ستران ب دوو قولی دگەل ھونەرمەندێن کورد گۆتینە، وەک ھونەرمەند ( عسیا بەرواری، محەمەد عارف جزیری، عەبدولا زێرین، سەمیر زاخۆیی، تەحسین تەھا،…
گول بھار ل سالا ( ١٩٨٧)ێ خانەنشین دبیت و ل باژێرێ بەغدا ئاکنجی دبیت و، پشتی پرۆسەیا ئازادکرنا عیراقێ ب ھەول و تێکۆشینا کۆمەکا رەوشەنبیرێن کورد و ب ھەڤکاریا حکۆمەتا ھەرێما کوردستانێ ل رۆژا ( ١٨/٣/٢٠٠٥)ێ مەڕاسیمەکا رێزلێنانێ ل پارێزگەھا دھۆکێ بۆ دھێتە سازکرن و ھەر ل پارێزگەھا دھۆکێ ئاکنجی دبیت و ل سالا ( ٢٠٠٧)ێ نەشتەگەرییەکا چاڤی بۆ دھێتەکرن بەلێ ب ئەگەرا ھەلەیا نەشتەگەریێ چاڤەکێ خوە ژ دەست ددەت، پاشنێ ژی ل سالا ( ٢٠٠٨)ێ جەلتەیەک لێ ددەت و تووشی شەلەلێ دبیت. ھونەرمەندا دەنگخۆش گول بھار ل سالا ( ٢٠٠٩)ێ دوماھی سترانا خوە بناڤێ ( چەلێ لبەر چەلا ) ب ھەڤکاریا تیپا دھۆکێ یا مۆزیکێ بەرھەم دئینت، بەلێ ب مخابنیڤە ل رێککەفتی ( ٢٣/٢/٢٠١٠)ێ ل باژێرێ بەغدا کۆچا دوماھیێ دکەت و لسەر وەسیەتا خوە ل باژێرێ نەجەف دھێتە ڤەشارتن.
- دکاری هەموو بابەتێن خۆ ببینی ….
Comments are closed, but trackbacks and pingbacks are open.