غیاس خالد زێباری
راستە ڤولکانێن سرۆشتی کارەسات و زیانێن مەزن پاش خۆ دهێلن ، لێ لڤی سەردەمی ئامادەکاریێن پێشوەخت بۆ کێمکرنا وان دهێنە کرن ، زیانا سنووردار دکەن و ژبلی زیانێن گیانی زیانێن دیتر زوی دهێنە قەڕەبۆکرن ، ئانکۆ پڕۆسەیەکا دەمەکی یە و کاریگەریێن وێ یێن زیانبەش و نەڕێنی ئەگەر ب تەمامی ژی زوی ژناڤ نەچ زۆر کێم دبن .
لێ ڤولکانێن دەستکرد مینا گەندەڵیێ و نەدادوەریێ دناڤ دەستهەڵاتان دا ڤۆلکانێن کۆژەک و پڕ زیانن ، زیانێن ڤان ڤۆلکانێن دەستکرد سەرتاسەرێ وەڵاتی ڤەدگرن و هەمی تاکێن جڤاکی زرار مەند دبن ، و چ قەڕەبۆکرنی ژی بۆ نینە .
ئاگر و تێهن و کاریگەریا ڤان ڤۆلکانا جڤاک و وەڵاتان دئێخینە دناڤ دوزەخەکا کەڵ و بەردەوام ، بەردەوامی و بەرفرەهبوونا وان جڤاکا ژناڤ دبەن و د هەڵوەشیننن .
پابەندیێن نەتەوایەتی و نشتیمانی ژلایێ تاکی لاواز دکەن و دگەهیتە وی ئاستی خەلک رێزێ ل پیرۆزیێن خۆ نەگریت .
ئەگەر دویر نەچین نمۆنێن سووریا ، لیبیا ، یەمەن ، لبنان و ئیراقێ بینینە پێش چاڤێن خۆ کۆ کەرب و تۆڕەیا خەلکی ل نەدادوەری و گەندەڵیا دەستهەڵاتێ چەوا کۆچک و تەلار و دەستهەڵاتێن وان ئینانە خار و هەتا نهۆ ئاگرێ وێ ڤۆلکانێ یێ بەردەوامە و دیار نیە کەنگی دێ ڤەمریێت ..! و چ کارەساتێت دروست کرینە .
بێ ووژدانیە ئەگەر دەستهەڵاتداریا هەرێما کوردستانێ لگەل دەستهەڵاتێن دکتاتۆریێن وان وەڵاتا بەڕاوورد بکەین نەخاسمە ژلایێ ئازادیا سیاسی و بیر و بۆجوونا ، لێ شێوازێ دەستهەڵاتداریا کوردستانێ ژلایێ گەندەڵی و نەدادوەریێ بەرەڤ ئاراستەیێن وان دچن و سەنتەرێ ڤۆلکانەکا دەستکرد هاتیە دانان و بەردەوامیا گەندەڵیێ و نە دادوەریێ دێ بیتە ئەگەرێ کارەساتەکا مەزن .
هەرچەندە پشتی کابینا ۹ یا حکومەتا هەرێما کوردستانێ ب سەرۆکاتیا مەسروور بارزانی هەوڵێن هەڵوەشاندنا وی سەنتەری هاتینە هاڤێن و ئەڤ پرۆژێ سەرۆک حکومەتێ یێ بەرهنگاریا گەندەڵیێ و چاکسازیا و پەیاما بەری چەند رۆژا یا نێچیرڤان بارزانی سەرۆکێ هەرێما کوردستانێ لدەمێ سۆندخوارنا هژمەرکا دادوەران و بەری وان ژی پرۆژە و بەرنامێن سەرۆک مەسعوود بارزانی یێن چاکسازیێ ، بەڵگەنە لسەر درۆستکرنا بناغێ وی سەنتەرێ ڤۆڵکانا دەستکرد ل کوردستانێ و ب رێگری نەکرنا وێ کارەساتێن مەزن یێن سیاسی و جڤاکی دێ بەرهەم ئینیت .
براستێ کەرب و کینا خەلکێ کوردستانێ بەرامبەر هژمارەکا بەرپرسێن نە بەرپرس و گەندەلکار گەهشتیە ئاستێ تۆڕەبوونێ و ئەگەر ڤیانا وەڵاتی و ڤان دەستکەفتێن نشتیمانی نەبیت نەڕازیبوونێن بەرفرەهــ دێ سەرهەلدەن ، لێ خەلکێ کوردستانێ یێ ڕەوشا جڤاکی و ئێمناهی و ئابووریا وان وەڵاتان دبیت یێن کەرب و کینا خۆ پێ دەرکری .
ئەز باوەرم سەرکردایەتیا کوردستانێ بتایبەت سەرۆکێ هەرێمێ و سەرۆکێ حکومەتێ ڤان مەترسیا دزانن لەوما دەست ب هەوڵێن بەرفرەهــ یێن بەرهنگاریا گەندەڵیێ و سەروەریکرنا یاسایێ کرینە و پێتڤی یە ئەڤ هەوڵە بەردەوام و بلەزتر بن و ئەنجام ژی بۆ خەلکی دیار ببن .
پێتڤی یە خەلکێ کوردستانێ ژی زێدەتر یێ ب هەدار بیت و باوەری ب بڤان گاڤ و پرۆژا هەبیت چۆنکێ ئاسۆیێن ڤەکرنا دەرگەهێن خێرێ نە ، پشتی حکومەتا هەرێما کوردستانێ شیای لسەر زۆر ئاستەنگا زاڵ ببیت . چونکێ نەیار و دوژمنێن خەلک و قەوارێ کوردستانێ و ڤێ کابینێ ئەوێن نەشیای بهێزا چەکی و پیلانێن سیاسی و ئابوورێ قەوارێ هەرێما کوردستانێ لەنگەر بکەن لبەندا ڤۆلکانەکا بڤی ڕەنگی نە .
- نڤیسەرێ هێژا ئەو ناڤێ تە لخاری هاتیە نڤیسین دکاری هەموو بابەتین خۆ ببنی
Comments are closed, but trackbacks and pingbacks are open.