رێڤه‌به‌رێ گشتی یێ چاندنێ ل پارێزگه‌ها دهۆكێ دیار كر، ئه‌ڤ ساله به‌رهه‌مێ گه‌نمی ل دهۆكێ سێ قات ژ سالێن بۆری زێده‌تربوویه و دبێژیت: پیشبینی دهێـته كرن ئه‌ڤ ساله 382 هزار ته‌نێن گه‌نمی ل دهۆكێ بهێنه به‌رهه‌مئینان.
ئه‌حمه‌د جه‌میل، رێڤه‌به‌رێ گشتی یێ چاندنێ ل پارێزگه‌ها دهۆكێ بۆ رۆژناما ئه‌ڤرۆ خویا كر، هه‌موو به‌رهه‌ڤی بۆ وه‌رگرتنا گه‌نمێ جۆتیاران ل پارێزگه‌ها دهۆكێ یێن هاتینه كرن و گۆت: “بڕیاره ل رۆژا 25/5/2023ێ ده‌ست ب وه‌رزێ دوورینا گه‌نمی ل دهۆكێ بهێـته كرن، ئه‌م پێشبینی دكه‌ین، ئه‌ڤ ساله به‌رهه‌مێ گه‌نمی بگه‌هیته 382 هزار ته‌نان، ئه‌ڤه ژی رێژه‌كا گه‌له‌ك باشه به‌رامبه‌ر سالێن بۆری و سێ قات زێده‌بوویه”.
ناڤهاتی ئاشكرا ژی كر كو ئه‌ڤ ساله هه‌موو گه‌نمێ جۆتیاران ژ جۆتیاران دێ هێته وه‌رگرتن و بۆ هه‌ر ته‌نه‌كا گه‌نمی ژی 850 هزار دینار هاتینه دانان و گۆت: “ل سایلۆیان به‌رهه‌ڤی هاتینه كرن، گه‌نمێ جۆتیاران بهێته وه‌رگرتن و هه‌موو ئاسانكاری و پشته‌ڤانی ژی بۆ جۆتیاران یێن هاتینه كرن بۆ وه‌رگرتنا گه‌نمی ل سایلۆیان”.
Comments are closed, but trackbacks and pingbacks are open.