به‌نكا ناڤه‌ندى یا ئیراقى راگه‌هاند كو د حه‌فتیا بهێت دا دێ هنده‌ك بڕیارێن نوى هێنه دان و ره‌نگه ب شێوه‌یه‌كێ مه‌زن د كێمكرنا بهایێ دۆلارى به‌رانبه‌ر دینارى دا د هاریكار بن.
به‌نكا ناڤه‌ندى ئه‌ڤرۆ پێنجشه‌مبیێ ئاماژه دا پێشكێشكرنا پێشنیاره‌كێ ل دۆر هاورده‌كرنا كه‌لوپه‌لان ب رێكا ده‌رگه‌هێن سنوورى هه‌روه‌سا ئاشكرا كر كو د حه‌فتیا بهێت دا دێ هنده‌ك بڕیارێن نوى هێنه دان و ره‌نگه ببنه ئه‌گه‌رێ كێمبوونا بهایێ دۆلارى.
عه‌مار حه‌مه‌د خه‌له‌ف جێگرێ پارێزگارێ به‌نكا ناڤه‌ندى د چاڤپێكه‌فتنه‌كێ دا ل گه‌ل ئاژانسا فه‌رمى یا نووچه‌یان یا ئیراقى گۆت “به‌نكا ناڤه‌ندى پشكه‌كا حه‌فتیانه ژ دۆلارى دده‌ته كۆمپانیێن پاره‌گوهۆڕینێ ژ بۆ فرۆشتنا وان ب گه‌شتیاران ب بهایێ فه‌رمى و ب بڕا ده‌ستنیشانكرى یا 3 هزار دۆلاران بۆ هه‌ر گه‌شتیاره‌كێ”.
زێده ژى كر “ئه‌ڤ كۆمپانیێن هه‌نێ یێن پاره‌گوهۆڕینێ ژ لایێ به‌نكا ناڤه‌ندى ڤه ل گۆره‌ى رێسایان مووله‌ت پێ هاتیه دان و ئه‌و پێگیریێ ب یاسایا به‌رسینگگرتنا سپیكرنا پاره‌ى دكه‌ن”.
ناڤهاتى دیار ژى كر؛ ئێك ژ ئه‌ركێن سه‌ره‌كى یێن هه‌مى كۆمپانیێن پاره‌گوهۆڕینێ A و B و ناڤبه‌ینكاریێ C به‌رده‌ستكرنا دۆلارى یه بۆ گه‌شتیاران ب بهایێ فه‌رمى و ب وێ بڕا ده‌ستنیشانكرى ژ لایێ به‌نكا ناڤه‌ندى ڤه.
ئاماژه ب وێ چه‌ندێ ژى كر كو پلاتفۆرمه‌كا ئه‌له‌كترۆنى هه‌یه و به‌نكا ناڤه‌ندى هه‌ر ژ ده‌ستپێكا ئه‌ڤ ساله كار ل سه‌ر پێشڤه‌برنا وێ دكه‌ت و زێده ژى كر “هه‌مى پرۆسێسێن فرۆشتنا دۆلارى ب وه‌لاتیان ب رێكا وێ پلاتفۆرمێ دهێنه ئه‌نجامدان كو ب ئاوایه‌كێ هویربین ژ لایێ به‌نكا ناڤه‌ندى ڤه چاڤدێرى ل سه‌ر دهێته كرن”.
خۆیا ژى كر “به‌نكا ناڤه‌ندى ب رێكا ڤێ پلاتفۆرمێ ته‌مویلا بازارى ب دۆلارى ژ بۆ بازرگانان و بازرگانێن بچویك هه‌روه‌سا ب رێكا كۆمپانیێن پاره‌گوهۆڕینێ بۆ گه‌شتیاران دكه‌ت”.
جێگرێ به‌نكا ناڤه‌ندى ئاماژه دا وێ چه‌ندێ ژى كو “به‌نك ب رێكا حه‌واله‌یان و كرێدیتێن بۆندان ته‌مویلا بۆندێن كه‌رتێ تایبه‌ت و كه‌رتێ حكومى دكه‌ن، هه‌روه‌سا هنده‌ك ژ وان به‌نكان وه‌كى رافیده‌ین و ره‌شید دۆلارى ب كاش ب رێكا فرۆشگه‌هێن خۆ ل فڕۆكه‌خانه‌یان دفڕۆشنه گه‌شتیاران، كۆمپانیێن پاره‌گوهۆڕینێ ژى ب تنێ ب فرۆشتنا دۆلارى بۆ گه‌شتیاران د تایبه‌تمه‌ندن”.
هه‌روه‌سا ئاماژه دا وێ چه‌ندێ “به‌نكا ناڤه‌ندى پێشنیاره‌ك ژ بۆ ده‌رگه‌هێن سنوورى و گۆمركان پێشكێشكریه، ئه‌و ژى هه‌ر كه‌لوپه‌له‌ك بهێته د ئیراقێ دا پێدڤیه بهێته پشتراستكرن كو بازرگانى ئه‌و كه‌لوپه‌لێن هاورده‌كرى ب رێكا به‌نكا ناڤه‌ندى یا ئیراقى ته‌مویلكرینه”.
ناڤهاتى خۆیا ژى كر كو به‌نكا ناڤه‌ندى ژماره‌یه‌كا بڕیاران ل دۆر كه‌رتێ به‌نكى ده‌ركرینه و ئاشكرا ژى كر “ژماره‌یه‌كا بڕیاران د حه‌فتیا بهێت دا دێ هێنه دان كو ره‌نگه ب شێوه‌یه‌كێ مه‌زن د كێمكرنا بهایێ دۆلارى دا د هاریكار بن”.
وه‌زاره‌تا گه‌نجینه‌یێ یا ئه‌مریكا ل رۆژا 19/7/2023 سزایێ قه‌ده‌غه‌كرنا مامه‌له‌یێ ب دۆلارى ل سه‌ر 14 به‌نكێن ئیراقى د بزاڤه‌كێ دا بۆ كێمكرنا گه‌هشتنا دۆلارى بۆ ئیرانێ و رێگرتنێ ل سپیكرنا پاره‌ى سه‌پاند بوو و پشتى وێ بڕیارێ بهایێ دۆلارى به‌رانبه‌ر دینارى ل هه‌رێمێ و ئیراقێ بلند بوویه.
وول ستريت جۆرنال دیاركربوو كو ژ به‌ر سه‌ره‌ده‌ریا وان به‌نكان ل گه‌ل هنده‌ك كه‌سێن سزایێن ئه‌مریكا ل سه‌ر و مه‌ترسیا مفاوه‌رگرتنا ئیرانێ ژ سه‌ره‌ده‌ریێن وان به‌نكان، هه‌روه‌سا ژ به‌ر كارێن سه‌ردابرنێ و سپیكرنا پاره‌ى ئه‌و سزایه ل سه‌ر وان به‌نكان هاتیه سه‌پاندن.
هه‌روه‌سا ئه‌مریكا ل نوڤه‌مبه‌را سالا بۆرى ژى سزایێ قه‌ده‌غه‌كرنا گه‌هشتنێ ب دۆلارى ل سه‌ر چار به‌نكێن ئیراقى سه‌پاند بوو.
Comments are closed, but trackbacks and pingbacks are open.