▪ بۆچی پەیوەندی پارتییەوە دەکرێت؟

فرسەت سەیدشکور

ئاراستەی بنەمای سیاسیی (پارتی) بەدرێژایی (٧٧) ساڵی ڕەبەق تا ئێستا بۆ خەڵک ڕوونە، نەنگی و دووڕوویی تێدا نییە، بۆیە زۆر ئاساییە کە خەڵکێک ئەگەر لە ڕابردوودا ڕەخنەی توندیشی لە پارتی ھەبووبێت، یان دژی پارتی کاری کردبێت، ئەمڕۆ لەگەڵ فیکری سیاسی و بەرنامەی پارتیدا خۆی ببینێتەوە، دروستیشە خەڵکی ناو پارتی بۆچوونی جودای خۆیان بڵێن، ئەمە دەرخەری فەزای ئازادیی پارتییە، بەڵام ڕووە گەورەکە ئەوەیە، فەلسەفە و جووڵە و بەرنامە و ئەجێندای پارتی سیاسەتێکی نێونەتەوەییە، سیاسەتی ھەموو شت قبووڵ نەکردنە، سیاسەتی بەرپرسیارێتی و رێزدانانە بۆ نیشتمان و پاراستنیەتی.

بەوپێیەی پارتی ئێستا بووەتە داینەمۆی پێکەوەژیان و دابینکردنی نەوای ئارام بۆ کوردستانیان لە کەرکووکی دڵی کوردستان، دەبینین کە ھاونیشتمانی کەرکووک، لە چین و توێژە جیاوازەکان، لە پارت و لایەنە سیاسییەکان، پۆل پۆل ڕووی تێدەکەن، ڕەنگە یەکێکی دیکە لە ھۆکارەکان ئەوە بێت کە پارتی ڕێگە نادات مافی کەس بەھەدەر بڕوات، هەڵوێستیە نیشتمانییەکانی پارتی لە کەرکووک و زیادبوونی دەنگەکانی لە هەڵبژاردنەکانی ڕابردوودا، دەرخەری بەهێزی پێگەی پارتییە لە کەرکووک.

پێشوازی کرد لە بنەماڵەی شەھید موراد کانی کوردەیی.
لە ھەمانکاتدا،

پارتی دیموکراتی کوردستان، ڕێگەیەکی دروست و ئاراستەیەکی یاسایی ڕاستەقینەی بۆ بەدیھێنانی دادپەروەریی و نەفەوتانی مافی زوڵم لێکراون لە کەرکووک گرتووەتە بەر، بۆ ئەوەش قوربانی زۆر دەدات، سەڕەڕای ئاڵنگارییە بەردەوامەکان بەڵام شانی داوەتە بەر بەرپرسیاریەتی مێژوویی لەپێناو دادپەروەریی و دابینکردنی سەقامگیریی و پارێزراوی مافی ھاونشتمانیانی پارێزگای کەرکووک.

“دیدی سەرۆک بارزانی سەبارەت بە کەرکووک”

هەڵوێستی سەرۆک مەسعود بارزانی، لە قۆناغی دوای نووسینەوەی دەستووری عێراق، تاوەکوو ڕابەرایەتیی شەڕی داعش لە پاراستنی کەرکووک و ناوچە کوردستانییەکان، پاشان سەلماندنی کوردستانیی کەرکووک لە ڕێگەی ڕیفراندۆم لە ساڵی 2017دا، سەلمێنەری ئەوەیە، شاری کەرکووک خاوەنی هەیە و هەرچەندی تەعریب و ڕاگواستن و بەعەرەبکردن بکرێتە بەرنامە، بەڵام هێزێکی نەتەوەیی، سازش لەسەر شارەکە ناکات.
لەدوای کارەساتی 16ی ئۆکتۆبەریشەوە، پارتی بەردەوام هەوڵی داوە، کە پارێزەری رەسەنایەتیی کەرکووک بێت، گەرچی ئالنگارییەکانی بەردەمی نەک زوڵم و ستەمـێکی لەپشتەوە بوو، بەڵکوو دەوڵەتانی ناوچەکە هەمیشە لە بیروباوەڕیان بەرامبەر کەرکووك، سڵیان کردووەتەوە.
لە کاتێکدا بەرەو هەڵبژاردنێکی چارەنووسسازی مێژوویی لە ئەنجوومەنی پارێزگای کەرکووک دەڕۆین، گرنگ و پێویستە کە لە پێش چاوی هەمووان ڕوون بێت، کە خەسڵەت و ئەدای کارکردنی ئێستای پارتی بۆ کەرکووک لەسەر ئاستی نەتەوەیی و پاراستنی ماف و داخوازییەکانی هاونیشتمانییانی کەرکووکە. هەڵبژاردنەکە هێندە گرنگە، کە ئیدی وەکوو هەمیشە دەبێت قەبارە و سەنگ و پێگەی کورد لە کەرکووک دیار و بەرچاو بێت، بۆ ئەم خواستەش، کەرکووکییە تێکۆشەر و دیکتاتۆر ڕەتکەرەوەکان، سیاسەتێکی ڕاستەڕێی نەتەوەییانە هەڵدەبژێرن.

پارتی دیموکراتی کوردستان لە کەرکووک باوەڕی بە پێکەوەژیانی ئاشتییانەی نێوان پێکهاتە ڕەسەنە مێژووییەکانی کەرکووک هەیە، بەڵام لەگەڵ سیاسەتی ناڕوون و خۆڕادەستکردوو، بێ گومان هەڵناکات، بێ گومان ئەوەی مەبەستی بێت لە کەرکووک لەگەڵ پارتیدا بسازێت، پێویستە لەسەر شاڕێگەی کوردستانیەت و پارێزگاریکردن لە خاکی کەرکووک، سڵ لە هیچ ئاستەنگ و ناڕەحەتییەك نەکاتەوە و بوێرانە لەسەر ئەم ڕێگا ڕاستەدا هەنگاو بنێت، لە پەیڕەو و پڕۆگرامی پارتیشدا ئەم خاڵە بە گرنگییەوە وا باس کراوە؛ کە پارتی باوەڕی بە فرەپێکهاتەیی لە هەرێمی کوردستان و کەرکووکدا هەیە و دان بە مافی پێکهاتەکاندا دەنێت، خەبات دەکات بۆ هێنانەکایەی کۆمەڵگایەک، لەسەر بنەمای هاووڵاتیبوون و یەکسانی و ڕێزگرتنی مافی هەموان، بێ جیاوازیكردن لەنێوان ڕەگەز و ئایین و مەزهەب و جیاوازییە کولتوورییەکان.