سەردار هێتوتی
رۆژێن بووری دناڤا لێگەریانا خۆ دا بۆ دید و نێرینێن هەڤاڵان لسەر پلاتفۆرمێن میدیا جڤاکی، من چاڤ ب گۆتنا کەسەی کەفت کو ب شانازیڤە هێرش دکرە سەر وان کەسێن ڕۆژا 31 ئادارێ ب بیردئینن کو د وێ ڕۆژێ دا پێشەوا قازی محەمەد هاتیە شەهیدکرن ب دەستێ داگیرکەرێن ئیرانی.
وی هەڤالی نەکو بۆ کێمکرنا کەساتیا سەرۆک کۆماری بوو، لی ب هێجەتا دیرکەفتنێ بوو ژ بۆ وانەیا خۆ بدەستڤەدانا گەلێ کورد و دیرکەفتن ژ ڤێ هزرا بترس ل نیک کوردا و خۆ کێم دیتنا وان ل هەمبەری داگیرکەران.
لێ بەرۆڤاژی ئەز نێرینا خۆ دیار دکەم و دخازم ب جۆشڤە ئەڤ ڕۆژە بهێتە ب بیرئانین و د ڤێ ڕۆژێ دا ل ناڤەندێن بلند یێن ئەکادمی کونفراسێن زانستی بهێنە لدارخستن و ل سە ر جادە و کولانان وێنەیێ پێشەوا بهێتە بلندکرن و ل پشت ڤی بابەتی کار بۆ ڤەلڤینا هەستا تۆلڤەکرنێ و بهێزبوونا هەستا کوردایەتیێ ل نیک گەنج و لاوان بهێتەکرن.
دبیت هەم مە و هەم ژی کاودانان خیانەت ل دۆزا مەکربیت، چونکی ئەم بۆ چ کاودانەکی یێن بەرهەڤ نەبووین و ب تنێ خەما مە گێرانا دوبەرەکیێ و ئاڤاکرنا میرگەهێن بچووک و حەزا ژێردەستیێ ل نیک سەرۆکێن مە هەبوو، پتریا سەرکردێن کوردا د ناڤا بازنەیەکا بچووک دا دزڤرین و کێم جارا بۆ لایێ حەز و ڤیانێن مەزن و دیر یێن نەتەوا خۆ چوونە.
لێ قازی محەمەد، وەک گەنجەک شیا ل کووراتیا دلێ دژمنی دا خۆ ئاڤا بکەت و خۆدان ئاستەکێ بلندێ زانستی بوو ژ بۆ وی سەردەمی و نێزیکی بزاڤێن نەتەوی یێن کوردی بوو، هەروەسا کەسەکێ ب باندوور ژی بۆ، شەهێدێ سەرکردە شیا کۆمارا کوردستانێ بدەتە ئاڤاکرن و بۆ نێزیکی ساڵەکێ ژی شیایە ل هەمبەری دژمنان خۆ ڕاگر بیت و خزمەتەک باش پێشکێشی زمانێ کوردی بکەت، لەوا وەرن پێکڤە ڤێ ڕۆژێ ب بیر بینین و بکەینە هێڤێنێ ئێکگرتنێ.
Comments are closed, but trackbacks and pingbacks are open.