▪ تێکستێن بارکری ژ جوانی و ڕامانێ

محەمەد چەلکی

دبێژن هەر سەردەمەکی هێژایێن خوە هەنە، ئەڤە بۆ ژیانێ، لێ بۆ جیهانا ئەدەبی ژی ڕاستە، مە چ گازندە هەبن ژ نڤشێ نووی ئەڤە وێ ناگەهینت کو ئەڤ نڤشە دبێ بەهرە و داهێنەرن!! ئەدەب ئەو مێرگە یا هشێ مرۆڤی و بیردانکا وی دهێلت ساخ و هشیار، ساخی و هشیاری نیشانا مرۆڤێ ساخە و خەمخۆرێ جڤاکێیە. رێنگزی ئەگەر چی ڕامانەکا نەگەتیڤ ددەت لێ رەوشا سەردەمی و کێرهاتی و بێکرێریا تاکێن وی سەردەمی دیاردکەت یا ئەم دبێژین: “پا رەوش یا رێنگزە.”
ئەدەبە ب واتە و ڕامانا خوە یا بەرفرهەڤە وێ رەوشێ و رێنگزیێ بێ ڕتووش و مەکاپ دگەهینت، ئەو نڤیسەرێ خوە ب کێش و بێشێن مرۆڤانڤە مژویل دکەت و بزاڤێ دکەت د رەوش و پەرگال و گەوشەکێن رێڤەبرن و کاسۆتییا گەندەلکار و بیڤپەرێسا شرۆڤە بکەت یان ژی هەما وێ رەوشێ و رێنگزیێ وەک هەی بدانتە بەرچاڤێن خاندەڤان، نەمریێ بۆ خوە مسوگەر دکەت. باشترین نموونە ژی دێستوییفسکی و تولستۆ و بەلزاک و … هەرچەندە پتر ژ سەد سال ب سەر مرنا وانڤە دەرباس بوونە، لێ هێشتا مینا چرایان رۆناهیێ دبەخشنە مرۆڤاتیێ.
من ئەڤرۆ خوە ب بەخت دیت و پر شاناز بووم کو چاڤێن من ب ڤان تیکستێن نڤیسەرێ گەنجێ کورد دلدار محەمەدی کەفتین. هەر ئێکسەر رەوش و پەرگالا ئەڤرۆ یا مە بێ رتوش و مەکاپ بۆ سەد سالێن بهێت ژی کرە کەڤالێن نەمر. رێنگزی و پەرگالا ئەڤرۆ یا مە هەردەما ببنە تێکستێن ئەدەبی و نڤیسەر خوە شۆری ڤەخاندنا کێشو بێشێن تاکێ کورد بکەن و شرۆڤە بکەن دێ ب سەر گەلەک گرێکێن هشکێن هشێ تاکێ کورد هەلبن کو بوونە سەدەم ئەڤ رێنگزی و پەرگالە ببنە ستڤانکێ بێ لەپەقۆتی و هێلیڤانکیا کوردان …
تێکستێن دلدار محەمەدی ئەڤێ چەندێ بۆ مە دیاردکەن. دلێن پاقژ و ئەڤیندار دەما هزرا خوە ل کێش و بێشێن قرکا مرۆڤی گرتین، بکەت دێ تێکستێن هوسا بەرهەم هێن … مێزە بکەن، چەند ب ب خەم و دلەکێ تژی ڤیان بۆ تاکێ کوردستانی ل کێشێن مرۆڤێ کوردستانی مێزە دکەت و دکەتە کەڤالەکێ پری واتە و هەلگرێ چەندین شرۆڤا و رەهەندایە، دلدار دبێژیت:
” رویێ پۆسیدەیێ وی گەنجێ هە،یێ سەر قژاڤژ، پاییز دەستڤالا هێلا. بەرزەبوون دناڤ رەشەبایێ بێ نانییێ هەمی وەرزان وی دوەرینیت.”
رەوش و پەرگال و رێنگزیا ڤێ قۆناغا ئەم تێدا دەرباز دبین بێ رتۆش بوویە کەڤالەک هەمی زۆرنابێژێن ڤی سەردەمی دەڤی لێ دبێنت. ناخازم زێدەتر بەرامبەری ڤان تێکستێن نەمر باخڤم و شرۆڤا بدەم … بلا ئەو بەهرا خاندەڤانان بت …
گەلەک کەیفخوەشم کو مزگینییا نڤیسەرەکێ هێژا د ناڤ ڤان تێکستان دا خوە پێشکێشی مە دکەت، دبتە شونیگرێ ئیبراهیم سەلمان، محمەد سەلیم سواری و نزار محمەد سەعیدی بەلکو قوناغا وان دەرباز کریە … هیڤی خازم دلدارێ مە ل سەر ڤێ شۆپا گرتی یێ بەردەوام بت. فەرموون تێکستێن( کن چیرۆکێن) دلدارێ مە بخوینن …

وەریان
رویێ پوسیدەیێ وی گەنجێ هە یێ سەر قژا ڤژ ، پایز دەستڤالا هێلا ، بەرزەبوون دناڤ رەشەبایێ بێ نانییێ هەمی وەرزان وی د وەرینیت
٭٭٭٭
2
ئاشتیا خوینەلو
ئەڤرۆ هەکو کوترا ئاشتییێ ل هنداڤی مالا مە دفری ، د شەرێ دژوار یێ هەردوو جیرانێن مەدا گولەیەک ڤەپەشی و سینگێ وێ کەلاشت
٭٭٭٭٭٭٭
3
بۆ پێخاسیێ
ئەوێ پێلاڤ بویاخ دکرن گوتە هەڤکارێ خۆ ، هەبوونا پێلاڤێن پیس رێکێ نادەت ب گرنژم ، هندی پیێن بێ پێلاڤ چاڤێن من دکەنە کانیکا روندکان
ـ پا تۆ وان پێلاڤا دنیاسی ئەوێن مرۆڤان دکەنە پیێن خۆ ؟!
٭٭٭٭٭
4
یاریا ژیانێ
بیرهاتنێن خۆ یێن وەرزشێ بۆ هەڤالێن خۆ دگوتن :
بومن هەمی یاری د خۆشن ، ژبلی وان یاریێن ئەز تێدا رولێ تەپێ دگێرم