دبیت گهلهك كهس ههبن خوه قهلهو بكهن ب رێیا شریناهى و ڤهخوارنێن غازى، ئهو رێك د ساخلهم نینن، چونكو گهلهك كهس ههنه سهنگێ وان یێ سرۆشتى یه و نهخۆشیێن دلى و شهكرێ ژ جورێ دوێ و گهلهك ئاریشێن دى یێن ساخلهمیێ ههنه كو پتریا جاران ئهو ئاریشه گرێداى مرۆڤێن قهلهون، لهورا یا گرنگه خوارنا ساخلهم بهێته خوارن، ئهڤ رێکێن ل خوارێ دیاركرى دێ هاریكاریا ته كهن كو ب رێیێن ساخلهم قهلهو ببى:
- زێدهكرنا كالوریێن لهشى: داكو مرۆڤ بشێت خوه قهلهو بكهت، پێدڤیه كالوریێن لهشێ خوه رۆژانه دناڤبهرا 300-500 زێدهتر ژ یێن دهێنه سۆتن وهربگریت، ههكه بڤێت ددهمهكێ كێمتر دا خوه قهلهو بكهت، پێدڤیه پتر وهربگریت، ب رێیا خوارنا روینێن ساخلهم و رێژهكا زێده یا ڤیتامین و ژێدهرێن خوارنێ.
- خوارنا پرۆتینان: پرۆتین ژێدهرهكێ سهرهكى یێ قهلهوبوونا مرۆڤانه، لهورا یاباشه رێژا پرۆتینان دناڤ خوارنا خوه دا زێدهبكهى، پرۆتین یێ ههى دناڤ ماسى، نریشك، گۆشت، چهرهزات و بقولیات.
- زێدهكرنا كاربوهیدر و روینا: ئهو كهسێ گرنگیێ ب خوه قهلهوكرنێ ددهت، یا فهره خوارنێن هێزێ ددهنه لهشى زێدهبكهت وهكو كالوریان، بهرههمێن شیرى، فیقیێن هشككرى، پتات، نان، چهرهزات.
- راكرنا سهنگێن گران و باشكرنا هێزا لهشى: داكو پشت راست ببى كو كالوریێن زێده دچنه دناڤ زهڤلهكێن تهدا و ناچنه دناڤ شانهیێن روینى دا، یا پێدڤیه سهنگا راكهى، لهورا یا گرنگه قهستا هولێن وهرزشێ بكهى و حهفتیێ 2-4 جارا سهنگا راكهى، ههروهسا تو دشێى هندهك راهێنانان بكهى یێن باشكرنا لێدانێن دلى، بهلێ نابیت گهلهك ئهنجام بدهى داكو گهلهك كالورى نهسۆژن.
گهلهك شیرهتێن دى ههنه كو هاریكارن بو زێدهكرنا كێشا لهشى ژوانژى: - بهرى خوارنێ ئاڤێ ڤهنهخوو: چونكو ههكه مهعیده تژى بوو، یا ب زهحمهته تو كالوریێن پێدڤى وهربگرى.
- زێدهكرنا دانێن خوارنێ: ب كارئینانا ئامانێن مهزن هاریكارن بو وهرگرتنا پتر كالوریان، چونكو ئامانێن بچووك مرۆڤ نهچاردبیت خوارنێ كێم بخۆت.
- نڤستنهكا باش: نڤستنا باش و ساخلهم یا گرنگه بو وهرارا زهڤلهكێًن لهشى، خوارنا پرۆتینى و پاش زهرزهواتات داكو مفاى ژێ وهربگرى.
- جگارهنهكێشان: گهلهك جاران هێلانا جگارهیان دبیته ئهگهرێ قهلهوبوونێ.
ئهو خوارنێن دبنه ئهگهر مرۆڤ قهلهو ببیت ( شیر، برنج، پتات، شوفان، فاسولیێن سۆر، ماسیێن سهلهمون، ئهڤوكادو، شكولاتێن تارى، هێك، پهنیر، مهعكهرون).
و.نۆش نیوز