د سالیادا ئەنفالان دا، سه‌رۆكێ هه‌رێما كوردستانێ داخوازا “ئێكرێزییێ و كارێ هەڤپشک بۆ پاراستنا ده‌ستكه‌فت و مافان” دکەت.
دەقێ راگەهاندنا نێچيرڤان بارزانى، سه‌رۆكێ هه‌رێما كوردستانێ د سالیادا ئەنفالێ دا
ئه‌ڤرۆ ل بیرەوەرییا سیھ و پێنج سالێن تاوانێن ئه‌نفالێدا كو رژێما بەرێ یا عێراقێ ل سالا 1988ێ، به‌رامبه‌ر خه‌لك و ئاخا كوردستانێ ئه‌نجام دایی، ب رێز و حورمەت ڤە پتر ل 182 هزار شه‌هيدێن ئه‌نفالێ ب بير دئینينه‌ڤه، سه‌رێ رێزێ ل هەمبەر گيانێ پاقژێ وان دا دچەمینین و سلاڤ ل خێزان و كه‌سوكارێن وان یێن سه‌ربلند دكه‌ين.
ل ڤێ بیرەوەرییێ دا دوپات دكه‌ين، دڤێت حكومه‌تا عێراقێ كه‌سوكارێن ئه‌نفالكرییان ژ هه‌موو روويه‌كێڤە قه‌ره‌بوو بكەت و بڕيارا دادگەها بلند یا تاوانێن عێراقێ جێبه‌جێ بكەت كو ئه‌نفال ب جينۆسايد و تاوانا دژى مرۆڤايه‌تییێ و تاوانا شەری ناساند، ل هه‌رێما كوردستانێ ژی هه‌ر چ د شییاندایه دڤێت باشتر خزمه‌تا وان بهێتە كرن و گرنگيىا پتر ب وان بهێتە دان.
قه‌واره‌ىێ ده‌ستووری یێ هه‌رێما كوردستانێ، به‌رهه‌مێ خه‌بات و تێكۆشانا ب سەدان هزار شه‌هيدێن تاوانێن سامناك یێن وه‌كو ئه‌نفالان و كيمياباران و قوربانيدانا گه‌لێ كوردستانێیه، ل ڤێ بیرەوەرییێ بلا ب ئێكرێزى و ته‌ڤايى و كارێ هەڤپشک بۆ پاراستنا ده‌سكه‌فت و مافێن مە، رێزێ ل گيان و بیرەوەرییا شه‌هيدان بکەین. هه‌روه‌سا دڤێت هه‌موو بزاڤان بکەین هەتاكو ئه‌نفال ل سه‌ر ئاستێ نێڤده‌ولەتی پتر ب جينۆسايد بهێتە نیاسین و چ جاران ل چ جهێن جيهانێ تاوانەکا وەسا دوباره نه‌بیته‌ڤە.
سلاڤ و رێز بۆ گيانێ شه‌هيدان.
نێچيرڤان بارزانى
سه‌رۆكێ هه‌رێما كوردستانێ
Comments are closed, but trackbacks and pingbacks are open.