▪ زانیاریێن نوی دەربارێ لیستا مووچەی و هنارتنا 618 ملیار دیناران ئاشکرا بوون

 

پەرلەمانتارەكێ پارتی و ئەندامەكێ لژنا داراییا عێراقێ، زانیاری دەربارێ 618 ملیار دیناران و پرسا داخازکرنا لیستا مووچەیێن فەرمانبەرێن هەرێما كوردستانێ ژلایێ داراییا عێراقێ دیار کر.

شێروان دووبەردانی، ئەندامێ فراكسیۆنا پارتی دیموكراتی كوردستان ل پەرلەمانێ عێراقێ، بۆ (باسنیوز) راگەهاند: “ئەو 618 ملیار دینارێن جڤاتا وەزیرێن عێراقێ کو بریار دایە و قەرز نینە و پشکا مووچێن فەرمانبەرێن هەرێما كوردستانێیە ژ بودجەی، وەزارەتا داراییا عێراقێ ژی داخازا لیستا مووچەی كریە، بۆ هندێ کۆ تەمویلێ بدەنە هەرێما كوردستانێ.”

ئاماژە ب وێ کر: “بەری نوکە شاندێ حكوومەتا هەرێما كوردستانێ لیستا مووچەی و خەرجی و داهاتێ خۆ ب شەفافانە دایە بەغدا.”

ئاشكرا كر: “لیستا مووچەیێن فەرمانبەرێن هەرێما كوردستانێ ژلایێ دیوانا چاڤدێرییا داراییا عێراقا فیدرال هوربینی و پەسەند ژی كریە، تیمێن چاڤدێرییا داراییا عێراقێ ژی بەری دەمەکێ ل وەزارەتا داراییا هەرێما كوردستانێ بوون و ئەو دۆسیەیێن پێتڤی بوویە، حكوومەتا هەرێما كوردستانێ پێشكێشی وان كریە.”

شێروان دووبەردانی، بەحسا وێ كر كۆ: “وەزارەتا داراییا عێراقێ پشتی تەمویلا مووچەیێن وەزارەتێن خۆ، كۆ بڕیارە د ڤێ هەفتیێ مووچەیێن خۆ دابەش بكەن، پشتی وێ دێ تەمویلا 618 ملیار دیناران هنێریت، كۆ رەنگە بكەڤیتە سەرێ هەیڤێ.”

ژلایێ خۆڤە د. نەرمین مەعرووف، ئەندامێ لژنا داراییا پەرلەمانێ عێراقێ، بۆ (باسنیوز) ڕاگەهاند: “رۆژا 16ێ1ێ2024، وەزارەتا داراییا عێراقێ ب نڤیسارەکێ داخاز كریە، کۆ لیستا مووچەیێن هەیڤێن ئێک 2024 پنێرن، د ڤێ نڤیسارێدا ناڤێ وەزارەتا داراییا هەرێما كوردستانێ ژی دگەل سازیێن دی یێن دەولەتا عێراقێ هاتیە، واتە مووچەیێ فەرمانبەرێن هەرێما كوردستانێ نەهاتیە پشتگوهـ ئاڤێتن، هەتا یاسایا بودجەیێ 2024 یا عێراقێ بهێتە هەموار کرن.”

زەلال ژی کر: “ل دیف نڤیسارا داراییا عێراقا فیدرال، ئەو لیستا مووچەی کو داخاز كریە، دڤێت هەمی زانیاریێن مووچەخۆران ناڤێ سیانی، گوژمێ مووچەیێ بنەڕەتی، دەرماڵە، لێبڕینا خانەنشینیێ تێدا هەبیت.”

پەرلەمانتارێ لژنا دارایی، ئاشكرا كر: “مووچەیێ فەرمانبەرێن هەرێما کوردستانێ ژ هەموارکرنا یاسایا بودجەیدا ئێخستیە سەرخەرجیێ حاکیمە و ئاریشا مووچەی ب تەمامی دێ چارەسەر بیت.”

دوهی 17ێ1ێ2024، ئاوات جەناب نووری، وەزیرێ دارایی، راگەهاند: “ل دوماهیک سەرەدانا شاندێ حکوومەتێ بۆ بەغدا، لسەر ناڤەرۆکا هەموارا یاسایا بودجەی گەهشتینە ڕێککەفتنێ و چاڤەرێینە ل نزیکترین دەم جڤاتا وەزیرێن عێراقێ هەموارێ پەسەند بکەت، هیڤیدارین ل پەرلەمانێ عێراقێ بێ ئاریشە دەنگی لسەر رێککەفتنا هەموارێ بدەن.”

رۆژا 15ێ1ێ 2024، پێشەوا هەورامانی، پەیڤدارێ فەرمیێ حكوومەتا هەرێما كوردستانێ بۆ (باسنیوز) راگەهاند: “جڤاتا وەزیرێن عێراقێ بریار دا کۆ 618 ملیار دیناران بۆ مووچەخۆرێن هەرێما کوردستانێ پنێریت، ئەوا بریار لێ هاتیە دان، قەر نینە و سولفەیه و دەمکیە و هەتا یاسایا بودجەی 2024 بهێتە هەموار کرن، بڕیارە وی گوژمێ پارەی پنێریت، ئەوا کۆ تنێریت ژی دێ ب سێ سەد ملیارێن مووچەی کورت هێنان هەبیت.”

پێشەوا هەورامانی ئاشکرا کر: “ل دوماهیک سەرەدانا شاندێ حكوومەتا هەرێما كوردستانێ بۆ بەغدا، شاندێ مە بۆ مووچەی ل هەموارا بودجەی داخازا 875 ملیار دیناران کربوو، ڕێکكەفتن کریە و بۆ هندێ مووچە ژ هەمی پرسێن دی بهێتە جودا کرن، ژبەرکۆ تنێ دێ ئەو هەموار چارەسەرییا ئاریشا مووچەی کەت.”

سەبارەت ب دەمێ دابەشکرنا مووچەی، پەیڤدارێ حکوومەتێ گوت: “ئەم چاڤەرێ هنارتنا پارەی دکەین، پێشینا کارێ حکوومەتێ ژی دابەشکرنا مووچەیە، پارە بهێتە هنارتن ئەم ژی دێ مووچەی پێ دابەش کەین و ئەو کورتهێنانا کۆ هەیەژی، دڤێت وەزارەتا دارایی زەلالکرنێ بدەت، كۆ چاوا دێ شێین دگەل داهاتێ نافخۆدا مووچەیێ فەرمانبەران دابین كەن.”