▪ سەرۆکێ هەرێما کورستانێ ل دۆر رەوشا نوکە پەیامەک بەلاڤکریە

سه‌رۆكێ هه‌رێما كوردستانێ ل دۆر ره‌وشا نوكه‌ چ گۆت
سه‌رۆكێ هه‌رێما كوردستانێ به‌حس ل ره‌وشا ناڤخۆ یا هه‌رێما كوردستانێ و ئیراقێ كر و راگه‌هاند، نابیت پرسا مووچه‌یى تێكهه‌لى چ پرسێن دى بهێته‌كرن و گۆت: دڤێت ئالیێن كوردى زمانه‌كێ هه‌ڤپشك بۆ ناڤخۆ و ئیراقێ دروست بكه‌ن.

ئه‌ڤرۆ ل هه‌ولێرێ سه‌رۆكێ هه‌رێما كوردستانی د كۆنگره‌یه‌كێ رۆژنامه‌ڤانى دا به‌حس ل كێشه‌ و ئالۆزیێن ل گه‌ل حكومه‌تا ئیراقێ كر و به‌حس ل كێشه‌یێن ناڤخۆ و هێزێن پێشمه‌رگه‌ى ژى كر و گۆت: حكومه‌تا هه‌رێمێ هه‌مى پێگیریێن خۆ بجهئیناینه‌ و نابیت پرسا مووچه‌یى تێكهه‌لى چ پرسێن دى بهێته‌كرن.

ئاشكراكر ژى، ل ده‌مه‌كێ نێزیك سه‌رۆكوه‌زیر، جێگیرێ سه‌رۆكوه‌زیران و وه‌زیرێ دارایى دێ چنه‌ به‌غدایێ بۆ چاره‌كرنا كێشه‌یان و دڤێت ئیراق خۆ ئێكلا بكه‌ت كو سه‌ره‌ده‌ریه‌كا فیدرالى ل گه‌ل هه‌رێمێ بكه‌ت، چونكى ئه‌وا نوكه‌ به‌غدا دكه‌ت نه‌ سه‌ره‌ده‌ریه‌كا فیدرالى یە‌.

نێچیرڤان بارزانى دوپاتكر، حكومه‌تا نوكه‌ ب دانوستاندنێن هه‌موو ئالیێن ئیراقى و پشكداریا كورد، شیعه‌ و سونه‌یان هاتیه‌ پێكئینان و رێككه‌فتنا پێكئینانا حكومه‌تێ ل گۆڕه‌یى رێككه‌فتنه‌كا نڤێسى بوویه‌ و كورد پشكه‌كن ژ حكومه‌تێ و پشكه‌كا سه‌ره‌كى نه‌ و دڤێت ئالیێن كوردى زمانه‌كێ هه‌ڤپشك بۆ ناڤخۆ و ئیراقێ دروست بكه‌ن.

سه‌رۆك نێچیرڤان دبێژیت: داتاییێن حكومه‌تا هه‌رێمێ د دروستن، كێشه‌یێن مه‌ ل گه‌ل به‌غدایێ نه‌ بتنێ مووچه‌یه‌ به‌لكو كێشه‌یا مادده‌یا 140 و بجهئنانا رێككه‌فتنا شنگالێ ژى هه‌یه‌ و ئه‌مریكا ب به‌رده‌وامى بزاڤا چاره‌كرنا كێشه‌یان د ناڤبه‌را هه‌ولێر و به‌غدایێ دده‌ت و دیاركر، كێشه‌یا بودجه‌یى و مووچه‌یان په‌یوه‌ندى ب ئێك ئالى ڤه‌ نینه‌ و په‌یوه‌ندى ب هه‌موو كوردستانێ و ئالیێ وێ ڤه‌ هه‌یه‌ و دڤێت هه‌موو ئالیه‌ك پشته‌ڤان بن.

هه‌روه‌سا دیاركر، بۆ چاره‌كرنا كێشه‌یێن لگه‌ل به‌غدا دێ رۆلێ خۆ گێڕین و هه‌رێما كوردستانێ شكه‌ستن نه‌ئینایه‌ و دڤێت كێشه‌ ب دیالۆگێ ل گه‌ل به‌غدایێ بهێنه‌ چاره‌كرن و هه‌ر ده‌ما پێدڤى بوو دێ چینه‌ به‌غدایێ.

سه‌رۆكێ هه‌رێمێ به‌حس ل گه‌فێن ئیرانێ ل سه‌ر هه‌رێما كوردستانی كر و دڤى وارى دا دبێژیت: هه‌رێم نابیته‌ گه‌ف بۆ وه‌لاتێن جیران ب تایبه‌ت ژى ئیران و توركیا و هه‌رێم پشته‌ڤانا رێككه‌فتنا هه‌ولێر و ته‌هرانێ یه‌ و چ موبه‌رڕ نینن ئیران هێرشان بكه‌ت.

ل دۆر هه‌لبژارتنێن هه‌رێما كوردستانی ژى سه‌رۆكێ هه‌رێمێ گۆت: هه‌ولێر چاڤه‌ڕێى پێنگاڤێن ب كریارین یێن كۆمسیۆنا ئیراقێ یه‌ و به‌رهه‌ڤن بۆ كرنا هه‌لبژارتنان د ده‌مێ هاتیه‌ دیاركرن دا.

ده‌رباره‌یى ئێكگرتنا هێزێن پێشمه‌رگه‌ى سه‌رۆكێ هه‌رێما كوردستانێ دازانین، ئه‌مریكا گازنده‌ ژ پارتى و ئێكه‌تیێ ل دۆر ئێكگرتنا هیزێن پێمشه‌رگه‌ى هه‌نه‌، كار هاتیه‌ كرن لێ ئه‌و پێنگاڤێن هاتینه‌ هاڤێتن نه‌ پێنگاڤێن مه‌زنن.