▪ شۆڕەشا گوڵانێ چ وانە نیشا مەدان…؟

غیاس خالد زێباری

ژ گرنگیێن زانینا دیرۆکێ مفا وەرگرتنە خالێن لاواز و بهێز، شۆرەشا گوڵانێ ئەوا پشتی مەزنترین پیلانا نیڤدەولەتی و هەرێمایەتی دژی شۆڕەشا مەزنا ئیلۆنێ و بزاڤا رزگاریخوازیا کوردستانی یا ٥ ێ ئادارا ١٩٧٥ ل جەزائیر ، ل ٢٦ ێ گوڵانا سالا ١٩٦٧ شۆڕەشا گوڵانا پێشکەفتنخواز پشتی بخوداچوونەڤە و هەلسەنگاندنەکا تێر و تەسەل و ئامادەکاریێن هەمەلایەنە، ب رێمایێن سەرۆک و رێبەر مەلا مستەفایێ بارزانی و بسەرپەرشتیا سەرۆک مەسعود بارزانی هاتە بەرپاکرن.
بەرپاکرنا شۆڕەشا گوڵانێ تنێ دەستپێکرنەڤا شەرێ چکداری نەبوو، شۆڕەشا گوڵانێ چەندین وانە و سەربۆڕێن ژیانا سیاسی و چەکدار و مرۆڤایەتی و جڤاکی داهێنان و پاشخۆ هێلان کۆ بۆینە هێمێ سەرکەفتن و خۆڕاگریا خەلکێ کوردستانێ و دارشتنا ئاراستەیەکا درست بۆ گاڤێن بدەست ئینانا ماف و ئارمانجێن ڕەوا یێن خەلکێ کوردستانێ.
بەری هەر تشتەکی خۆڕاگری و رادەست نەبوون، چونکی پشتێ وێ رێکەفتن و خیانەتکاریا نیڤدەولەتی یا ل جەزائیر ژی بزاڤا رزگاریخوازیا کوردستانی و شۆڕەشا مەزنا ئیلۆنێ، سەرکردایەتیا شۆڕەشێ زۆر ب لێزانی و خۆڕاگری بەرامبەر وێ پیلانا زۆر ل قەبارێ شۆرەشا کوردستانی راوەستا و سەرەدەری کر و ب کێمترین زیانێن مرۆڤی لێ دەرباز بوو، ژوانا گرتنا رێکا پەنابەریێ بۆ وەڵاتێ ئیرانێ ب ژمارەکا سنووردا، ئەگەر سەرکردیەتیا شۆڕەشێ رێ دابا ڕەنگە ژمارا پەنابەرا زۆر زێدەتر با و شەرێن مەزن و خوینا وی درست ببان، وی دەمی زۆر قۆربانی و وێرانکرن دا هەبن .
ڤەحەواندنا پەنابەرا ل وەڵاتێ ئیرانێ و بێ ئۆمێد نەکرنا وان، نەخاسمە ب رۆلێ کاک ئدریسێ هەردەم ساخ.
لدیڤرا قۆناغا هەلسەنگاندنەکا هەمە لایەنی یا شۆڕەشێ ب ڕەنگەکێ ڕاستگۆیی و وێرەکانە و خۆرێکخستنەڤێ ل کۆنفرانسێ تەباخا ساڵا ١٩٧٦ و دارشتنا ستراتیژیەت و بەرنامێ قۆناغا هاتی بناڤێ رێکا بزاڤا رزگایخوازیا کوردی، هەرچەندە بەری ڤێ کونفرانسێ ب سێ هەیڤا خەتیرا شۆڕەشا گوڵانێ هەلببۆ، لێ د چارچۆڤەکریبوون د وارێ پارتیزانی وەکی بەرسڤ و سەرهەلدانەڤە بوون و پاشان کاراکرنەڤا رێکخستنێن نهێنی و رێکخستنەڤا هێزێن پێشمەرگەهی، نەخاسمە پشتی پەسندکرنا بەلاغا کۆنفرانسێ تەباخا ساڵا ١٩٧٦ ل کۆنگرێ نەهێ یێ پارتی دیموکراتی کوردستان ل ساڵا ١٩٧٩ .
شۆرەشا گوڵانێ د ژیێ خۆ یێ ١٢ ساڵیدا ١٩٧٦ ـــ ١٩٨٨، ب سەرکەفتیانە د ئەزموونێن بزەحمەت یێن خۆڕاگریێ و مرۆڤایەتیێ و شۆڕەشگێریێ و گیانێ برایەتیێ و مرۆڤ پەروەریێ بسەرفیرازی دەرباز بوو، سەرکردایەتیا وێ مینا زانینگەهەکا بەرفرەها ڤان بوواران بوو، و هەر بووارەک ژی کرە ئەکادیمیەکا تایبەت، پێشمەرگەهێن شۆرەشگێر سەلماند کۆ شۆرەشا چەکداریا کوردی ژپێخەمەت ئاشتیێ و سەقامگیریێ و ئازادی و رزگریێ یە و دابینکرنا ماف و ئارمانجێن خەلکێ کوردستانێ یە و هێزەکن د کووراتیا جڤاکێ کوردستانێدا هەلکەفتینە و ب هێزێن پۆڵایین یێن داگیرکارا ناشکێن و ناچەمیێن، ژلایێ رێکخستنێن پارتایەتی ژی مینا شانەیێن مێشێن هنگڤینی یە و ب گرتن و ئەشکەنجەدانێ و چاڤسۆرکرنا رەفیق و ئستیغباراتێن رژێمێ ئیرادا وان یا کوردایەتیێ و پارتایەتیێ کز و لاواز ناکەت و چالاکیێن خۆ گەهاندنە دناڤ جەرگرێ دووژمناندا و شانەیێن وان هەمی گۆند و باژارێن کوردستانێ پاوانکرن .
ب کورت و کرمانجی شۆرەشا گۆڵانا پێشکەفتنخواز زۆر وانێن ژیانێ و مرۆڤایەتیێ نیشا مەدان و پێتڤی یە نفشێ ئەڤرۆ و داهاتی مفای لڤان وانا وەربگریت و بکەتە نەخشێ ژیانا داهاتی یا سیاسی و جڤاکی و وەڵاتپارێزی و پارتایەتی.
ل شۆڕەشا گوڵانێ فێری هەداریێ و خۆڕاگریێ ببن بەرامبەر پیلان و قەیرانا، ب بیرمەندی و بەرێکقەدانا کاودانا نەخش و پلانێن داهاتی دابرێژن،
بزانن کۆ ئێکرێزی و تفاق و راستگۆیی و دادوەری سەرکەفتنێ گرەنتی دکەن و پلانا ژناڤ دبەن، ئەگەر چەند د مەزن بن، ڤیانا وەڵاتی و وەڵاتپارێزی لسەرڤەی هەمی بەرژەوەندا بیت، رێکخستنا پارتایەتیا خۆبەخش و دیسپلینکرنی، ژیێ پارتیێ درێژ دکەت و دەستێن تابۆرێ پێنجێ د بڕیت، گیانێ شۆڕەشگێریێ لسەردەمێ باژێرڤانیێ ژی دا پێویستە، رێزگرتن و مرۆڤدووستی و ئازادی و دیموکراستی بهایێن جڤاکێ مەنە و ناهێنە ژدەستدان، خزمەتکرن و گەشەپێدان و ئاڤەدانی، ئەرکەکێ سرۆشتی یە.
ئەڤە و چەندین تەوەرێن دی مە ل شۆڕەشا گوڵانا پێشکەفتنخواز دیتی نە، ئەوێن بۆینە هێمێ سەرکەفتنا وێ.
شۆڕەشا گوڵانێ ب گشتی و سەرکردایەتیا وێ بتابیەت ئەڤ هەمی ساخلەتە ل رێبازا بارزانی وەرگرتینە و کربوونە نەخشە و پلانێن دوور و نێزیک، لەوما شیان هەمی ئاستەنگا ببڕن و ئازادی و رزگاری و گەشەبوونا ئەڤرۆ دابین بکەن و ئاسۆیێن گەش ژی بۆ داهاتی بەرجەستە بکەن.