مەسرور بارزانی، سەرۆکوەزیرێن هەرێما کوردستانێ و برێت مەکگۆرک، ھەماھەنگکارێ کۆشکا سپی بۆ کاروبارێن رۆژهەڵاتا ناڤەڕاست و باکوورێ ئەفریقا ب تەلەفۆنێ ئاخفتن، مەسرور بارزانی گوتیە: بەرپرسێ ئەمریکی “دوپاتی ل گرنگییا ئێکڕێزییا لایەنێن کوردستانی و باشترکرنا پەیوەندییێن دناڤبەرا پارتی دیموکراتی کوردستان و ئێکەتی نیشتیمانی کوردستان دا کریە.”
دەقێ ڕاگەھاندنا حکومەتێ دەربارەی پەیوەندییا تەلەفونی:
ئێڤاریا ئەڤرۆ، پەیوەندیەکا تەلەفونی ژ بەرێز برێت مەکگورک، ھەماھەنگکارێ کوشکا سپی بۆ کاروبارێن ڕۆژھەلاتا ناڤەڕاست و باکوورێ ئەفریقیا گەھشتە مە.
د پەیوەندیا تەلەفونی دا، بەڕێز مەکگورک ، ڕۆناھی ئێخستە سەر سەرەدانا ڤێ دوماھیێ بۆ بەغدا و ھەولێرێ و گوتوبێژ دەربارەی پێنگاڤێن داھاتی بۆ چارەسەرکرنا ئاریشەیێن دناڤبەرا ھەرێما کوردستانێ و حکومەتا فیدڕال دا لسەر بودجە و پرسێن دی کرن.
ھەروەسا دوپاتی ل گرنگییا ئێکڕێزییا لایەنێن کوردستانی و باشترکرنا پەیوەندییێن دناڤبەرا پارتی دیموکراتی کوردستان و ئێکەتی نیشتیمانی کوردستان دا کر.
د پەیوەندیێدا ، ھەر وەسا بڕیارا ڤێ دوماھیێ یا دادگەھا فیدڕالی یا تایبەت ب ڕێگیریکرن ل ھنارتنا وی کوژمێ پارەی یێ کو بڕیاربوو ژ لایێ حکومەتا فیدڕال ڤە بۆ ھەرێما کوردستانێ بھێتە ھنارتن گوتوبێژکر، مە دلگرانیا خۆ بۆ دەرکرنا وێ بڕیارێ دیارکر کو ئارمانج ژێ تێکدانا سەقایێ ئەرێنی و باشترکرنا پەیوەندییێن دناڤبەرا ھەولێر و بەغدا دایە و مەرەمەکا سیاسی یا ل پشت.
ھەماھەنگکارێ کوشکا سپی بۆ کاروبارێن ڕۆژھەلاتا ناڤەڕاست و باکوورێ ئەفریقیا، پشتەڤانییا وەلاتێ خۆ بۆ چاکسازییێن کابینەیا نەھێ، ب تایبەت چاکسازییێن وەزارەتا پێشمەرگەی، ھەروەسا پێشکەفتنا کەرتێ وزێ و باشترکرنا ژێرخانا ئابووری و بزاڤێن بەرھەنگاربوونا گۆھڕینا سەقای دوپاتکر.
هەردوولا ھەڤرابوون لسەر گرنگییا نەھێلانا هەمی بەربەستێن دکەڤنە د ڕێکا گەشەپێدانا کەرتێ وزێ دا و وەبەرهێنانا زێدەتر یا کۆمپانییێن ئەمریکی ل هەرێما کوردستانێ.
ھەر وەسا ھەڤرابوون لسەر ھندێ کو ھەردوولا د پەیوەندییێن بەردەوامدابن .
Comments are closed, but trackbacks and pingbacks are open.